Read Kalanga Zumbunulo 22 Bible Online

Zumbunulo 22 - Kalanga bible

Zumbunulo 22

¹Ntumwa wakandilakidzabo gwizi gwe vula ye butjilo, ingadzima se deemani, idwa mu tjigalo tje bushe tje Ndzimu ne tje Pkhwizana,

²guwunga na pakati kwe zila imu nzi nkulu, mu phili dzago dzose seli eyi na eyija kwakamela nti we butjilo, unozwala mitjelo kagumi lina kabili nge gole kang'ompela nge mwedzi, ngono mazhani awo anopodza zwitjaba.

³Akutjawobe ne bhiso kakale. Tjigalo tje bushe tje Ndzimu ne Pkhwizana tjowobe tjili muuli, ngono balanda bawo banowounamata.

⁴Banowobona buso gwawo, ngono ne zina lawo lowobe lakakwagwa mu phazha dzabo.

⁵Akutjawobe ne busiku kakale, ngono abatjowoshaka mavone kene tjedza tje zhuba, ngobe She Ndzimu unowobe ali tjedza tjabo, ngono banowobusa nge kusingapele kose.

⁶Ntumwa we kudzimu kandidwa kati, “Matama iyawa anogalikabgwe, malebeswa. Ngono She, Ndzimu we meya ye balebesambeli watuma ntumwa uwe we kudzimu kuwolakidza balanda babe tjakafanila shingikala mu misi ipejo pejo.”

⁷“Koga bonani, ndozha tjinyolotjo. Kwakakombolegwa iye unolondolodza matama e ndebelombeli imu lukwalo igogu.”

⁸Imi Johani, ndimi ndakabona ahwa zwithu izwezwi. Ngono ndakati ndizwihwa ne kuzwibona awila pasi kunamata pa makumbo e ntumwa we kudzimu wakandilakidza izwezwi zwithu,

⁹koga kandidwa kati, “Usikushinge, ndi nlanda sawe ne zwikamu zwizo, ibo balebesambeli, koga sa bose banolondolodza matama a mu lukwalo igogu. Namata Ndzimu.”

¹⁰Ngono wakati kundili, “Usitongo zhalila matama e ndebelombeli e lukwalo igogu ngoti tjibaka tjabe pejo.

¹¹Iye usakalulwama, ngaadwilile asakalulwama; iye una shambgwa ngaadwilile ana shambgwa, na iye wakalulwama ngaadwilile ethama zwakalulwama na iye wakayengemala ngaadwilile akayengemala.”

¹²“Bonani, ndaswika tjinyolotjo, ndozha ne mbhayilo wangu kulipa mmwe ne mmwe sekwa akashinga.

¹³Ndimi wekutanga ne we bupelo, ndimi kutangisa ne bupelo.”

¹⁴Kwakakombolegwa ibabo banosuka hazu dzabo, kuti ndizo babe ne fanilo dze kuja ntjelo we nti we butjilo nenge kuti bangine mu nzi nkulu nge mikoba.

¹⁵Ngono kuzhe kuna mbgwa ne malipa ne phombgwe ne babulayi be bathu ne banonamata midzimu ne banoda kunyepa.

¹⁶“Imi Jesu ndatuma ntumwa wangu we kudzimu ku kuli nge butendeki kugupa makubungano. Ndimi we lutshinga gwa Dafite, kakale ndi nyenyedzi inopenya ye Masasi.”

¹⁷Meya ne Nlongo banoti, “Izha.” Ngakuti iye unohwa ati, “Izha.” Iye una nyota ngaazhe. Iye unoshaka ngaatole vula ye butjilo kuzhe kwe thengo.

¹⁸Imi Johani, ndotjenjedza mmwe ne mmwe, unohwa matama iyawa e ndebelombeli ye lukwalo igogu; ha mmwe angaapaphidza, Ndzimu unowompaphidzila shamu dzalebgwa mu lukwalo igogu.

¹⁹Koga ha mmwe angadusa tjimwe mu matama e ndebelombeli iyeyi ye lukwalo igogu, Ndzimu unowontolela gobe lile le ntjelo we nti we butjilo ne le nzi nkulu wakayengemala, izo zwinolegwa nge kwazo mu lukwalo igogu.

²⁰Iye unopa butendeki ngekwe zwithu izwezwi kati “Ee, tjose ndozha tjinyolotjo.” Ngakujalo. Izhani, She Jesu.

²¹Ngoni dza She Jesu ngadzibe ne bayengemali bose. Ngakujalo.