Read Kalanga Zumbunulo 3 Bible Online

Zumbunulo 3 - Kalanga bible

Zumbunulo 3

¹“Kwalila ntumwa we kudzimu we gubungano limu Sadisi sahwoku: “Awa matama a iye una meya ili kutendeka ye Ndzimu ne nyenyedzi dzili kutendeka. Ndoziba mishingo iyo, unodang'wa kuyi unotjila, ngono wakafa,

²ndizo muka, ngono usimise tjaunatjo na itjo tjabe pejo ngofa, nge kuti andizowana mishingo iyo ili yakapelela mu mesho e Ndzimu wangu.

³Ndizo, alakana zwidiyo zwawakadiyiwa. Bhatilila mu zwili utjile, ushandukile matjinyo awo. Ha usingamuke, ndowozha ku kuli se mbava, ngono autowoziba tjibaka tjandinowozha nditjo.

⁴Koga kutjina basibangana mu Sadisi basakazhadza zwiambalo zwabo shambgwa, ngono banowoyenda nami bakaambala zwiambalo zwitjena, ngoti kwakabafanila.

⁵Iye unokunda unowombadziwa sa ikoko, zwiambalo zwitjena, ngono anditowobukusha zina lile mu lukwalo gwe butjilo. Ndowoleba zina lile pana Tate nepa batumwa babo.

⁶“Iye una zebe, ngaahwe tjinolebgwa nge Meya ku makubungano.

⁷“Kwalila ntumwa we kudzimu we gubungano limu Filadelifiya sahwoku: “Awa matama e wakayengemala, una malebeswa, una khiyi ya Dafite, unozhula kukashaya ungazhalila, unozhalila kukashaya ungazhula.

⁸Ndoziba mishingo iyo. Bona, ndazhula nkoba mbeli kuko, iwo usina unotubula kuuzhalila. Ndoziba kuti muna masimba matukununu, koga makalondolodza dama langu kakale amuzondizwilandula.

⁹Bona, ndowothama ibabo be ng'umba ya Satani, banozwidwa beti Bajuta, ngono basi ibo koga benyepa, bonani, ndowothama kuti bazhe banamate pa makumbo enyu, bazibe kuti ndakamuda.

¹⁰Nge kuti makalondolodza ndayo yangu nge kudzikitadza nge moyo nlefu, ndowomulondolodza mu nsi we ndiko inozha mu shango yose, kulika ibabo bagele mu shango.

¹¹Ndozha tjinyolotjo, bhatisisani tjamunatjo, kuti ndizo kusitongobe ne mmwe ungamutolela tjiala tjenyu.

¹²Iye unokunda ndowonthama phanda mu Ng'umba ye Ndzimu wangu. Aangatjafe abhuda muili. Ndowokwala munli zina le Ndzimu wangu ne zina le nzi nkulu we Ndzimu wangu, Jerusalema ntshwa, unodeluka udwa ku Ndzimu wangu kudzimu. Kakale ndowokwala zina langu dzwa munli.

¹³“Iye una zebe ngaahwe tjinolebgwa nge Meya ku makubungano.

¹⁴“Kwalila ntumwa we kudzimu we gubungano limu Laodikeya sahwoku: “Awa matama anodwa kuna Ngakujalo, ntendeki unogagwabgwe we malebeswa, budwilo gwe lubumbo gwe Ndzimu.

¹⁵Ndoziba mishingo yenyu, amutotothola kakale amutopisa. Kwabe kungayita ha mabe mutothola kene mupisa!

¹⁶Ndizo, se mudziya, musingatothole kakale musingapise, ndowomuthwa amudusa mu nlomo wangu.

¹⁷Ukati, ‘Ndakafuma, ndimile zubuyanana, andina tjandinosheta.’ Koga autoziba kuti umu buyendasi, unohwisa ngoni! U nshayi, u mbujo kakale u bhofu.

¹⁸Ndizo, ndokukumbuludza kuti utenge golide mundili yakatjenesiwa ngopisiwa mu moto kuti ufume, ne zwiambalo zwitjena ufuke uzwimbe mbujo iyo inobhatisa shoni kuti isibong'we, utenge ne mafuta aungazhodza mu mesho awo kuti ubone.

¹⁹Ibabo bandinoda ndobatjemela abalaya. Ndizo, simisila ushandukile matjinyo awo.

²⁰Bonani, ndimile pa nkoba ndokokodza, ha mmwe angahwa hwi langu kazhula nkoba, ndowongina aja naye, ngono na iye unowoja nami.

²¹Iye unokunda ndowompa ndetjedzelo kugala nami mu tjigalo tje bushe gwangu koga sekwa ndakakunda, ndigele na Tate mu tjigalo tje bushe gwabo.

²²“Iye una zebe ngaahwe tjinolebgwa nge Meya ku makubungano.”