Read Kalanga Zumbunulo 5 Bible Online

Zumbunulo 5 - Kalanga bible

Zumbunulo 5

¹Ndakabona mu luboko gwe luji gwa iye ugele mu tjigalo tje bushe, lukwalo gwakakwagwa mukati na kuzhe, gwakapetiwa gwakazhaligwa nge zwizhalilo zwili kutendeka.

²Abona ntumwa we kudzimu wakasima elebeleka nge hwi lipezhugwi eti, “Ndiani wakalizanila kuzhula lukwalo igogu?”

³Koga kwakabe kusina ne nng'ompela kudzimu kene mu shango kene kusi kwe shango wakabe etubula kuzhula lukwalo ne kulinga zwimukati.

⁴Ndakalila kwazo, ngobe kwakabe kusina wawang'wa akalizanila kuzhula lukwalo kene kubala zwimukati.

⁵Ipapo mmwe we bakulu kabe eti kundili, “Usilile, bona, Shumba ye ludzi gwa Juda, we ludzi gwa Dafite, wakunda, kodwa kuti ungazhula zwizhalilo izwezwi zwili kutendeka kazhula lukwalo.”

⁶Ndakabona Pkhwizana yakabe ilingika seyakabe yatongobulawa ili mile pa tjigalo tje bushe ne zwibumbiwa zwinna zwinotjila, yakabe ina nyanga dzili kutendeka ne mesho ali kutendeka ali meya ye Ndzimu ili kutendeka yakabe yatumwa mu shango yose.

⁷Pkhwizana ikayenda ikanotola lukwalo mu luboko gwe luji gwe ugele mu tjigalo tje bushe.

⁸Yakati yatola lukwalo, zwitjili zwinna ne bakulu bakabe bali makumi mabili ana bathu banna, bakawila pasi mbeli kwe Pkhwizana, mmwe ne mmwe wakabe ana dende ne ndilo dze golide dzili zhele motsha zwili milile mitembezelo ye bayengemali.

⁹Bakamba lumbo butshwa, beti, “Wakalizana kutola lukwalo ne kuzhula zwizhalilo zwago, ngoti wakabulawa ngono nge malopa awo wakadzutunulila Ndzimu bathu kudwa mu ludzi gumwe ne gumwe ne mu lulimi gumwe ne gumwe ne mu bathu bamwe ne bamwe ne mu tjaba dzose.

¹⁰Wakabathama itjaba tje bushe, bapirisiti banoshingila Ndzimu wedu, ngono banowobusa mu shango.”

¹¹Ipapo alinga, ngono ahwa hwi le batumwa be kudzimu banjinji, bali zwiwulu wulu kupoteleka tjigalo tje bushe ne kupoteleka zwibumbiwa zwinotjila ne bakulu.

¹²Bakamba nge hwi lipezhugwi beti, “Pkhwizana yakabe yabulawa yakalizana kuamutjila bushe ne fumwa ne butjenjedu ne simba, ne gudzo ne ndumbidzo ne kukombolegwa.”

¹³Ngono ndakahwa tjibumbiwa tjimwe ne tjimwe kudzimu ne mu shango na kusi kwe shango ne mu gungwa na zose zwimba zwiti, “Kunli ugele pezhugwi kwe tjigalo tje bushe ne ku Pkhwizana ngakube ne kukombolegwa ne gudzo ne tjedza ne simba nge kusingapele kose.”

¹⁴Zwibumbiwa zwinotjila zwinna zwakashandula zwiti, “Ngakujalo.” Ngono bakulu bakawila pasi, bakanamata Ndzimu.