Read Kalanga Zumbunulo 6 Bible Online

Zumbunulo 6 - Kalanga bible

Zumbunulo 6

¹Ngono ndakabona Pkhwizana izhula tjizhalilo tje kutanga mu zwizhalilo zwili kutendeka, ngono ndakahwa tjimwe tje zwibumbiwa zwinotjila zwinna tjilebeleka nge hwi linonga nsindo we gole tjiti, “Izha!”

²Ndakalinga, ngono abona mbizi tjena, ntathi wayo wakabe akabhata dati, ngono kapiwa tjiala tje bushe. Kayenda ali nkundi kunokunda.

³Pkhwizana ikati izhula tjizhalilo tje bubili, ngono ahwa tjibumbiwa tjinotjila tje bubili tjiti, “Izha!”

⁴Kukabhuda imwe mbizi kakale, ili shaba kwakabondelela. Ntathi wayo wakapiwa masimba kudusa mbakiso mu shango, kuti ndizo bathu babulayane. Ngono kapiwa thumo gulugulu.

⁵Pkhwizana ikati izhula tjizhalilo tje butatu, ahwa tjibumbiwa tje butatu tjiti, “Izha!” Ndakalinga, ngono abona mbizi thema. Ntathi wayo wakabe akabhata ikale mu luboko gugwe.

⁶Ndakahwa nsindo unonga hwi udwa pakati kwe zwibumbiwa zwinna liti, “Lithara ye korong i ndipo ye zhuba, lithara dzili thatu dze bhali i ndipo ye zhuba. Koga musitjinye mafuta ne nkumbi.”

⁷Ikati izhula tjizhalilo tje bunna ahwa tjibumbiwa tje bunna tjiti, “Izha!”

⁸Alinga, ngono abona mbizi ye mbala we dundubadzi. Ntathi wayo wakabe edang'wa kuyi Lufu, ngono bugalo gwe bafi gwakansala shule, ngono bapiwa simba pezhugwi kwe lubabi gwe bunna gwe shango, kubulaya nge thumo nenge bhamba nenge bugwele nenge kushingisa phuka dze shango.

⁹Pkhwizana ikati izhula tjizhalilo tje bushanu, abona kusi kwe tjibeso meya ye bathu bakabulayigwa dama le Ndzimu ne butendeki gwabakapa.

¹⁰Bakabe bedana nge hwi lipezhugwi beti, “She Masimbawose, wakayengemala, una malebeswa, kowotola lubaka gungapani, musathu mukasumikilisa bathu ba muno mu shango, ne kubgwilizila malopa edu abakatebula?”

¹¹Mmwe ne mmwe wabo wakapiwa zwiambalo zwitjena. Ngono bakadwiwa kukayi banyaluluke kwe tjibaka tjilefana, kudzina balanda sa ibo ne zwikamu zwabo, zwibulawebo ngobe zwabe pejo ngobulawa, sa ibo bakabulawa, kuti mbalo iswike.

¹²Ngono ikati izhula tjizhalilo tje butathatu, alinga abona kutengenyeka kwe shango kukulu, zhuba likashanduka likabe dema se jila dema le tjililo ne mwedzi ukashanduka ukanga malopa.

¹³Nyenyedzi dzikawila pasi se phaya dzisakabidwa, dzishashamuka mu nti ha phepo ina masimba iwuzunguza.

¹⁴Zhuzhugwi kukanyelela se lukwalo gupetiwa, dombo limwe ne limwe ne tjigwizi tjimwe ne tjimwe tjikadusiwa mu magalo atjo.

¹⁵Ipapo bomambo be shango ino ne babusi ne balauli be babhayani ne bafumi ne bana masimba ne bathu bose, balanda ne bakasungunuka bakabgwata mu makuhwu ne kusi kwe shongwe mu matombo.

¹⁶Bakadana matombo ne shongwe nge hwi lipezhugwi beti, “Mutiwile, mutisumbikile buso gwa iye ugele mu tjigalo tje bushe ne bushongola gwe Pkhwizana!

¹⁷Zhuba gulu le bushongola gwabo latjizha, ngono ndiani ungalimilila?”