Read Kalanga Zumbunulo 9 Bible Online

Zumbunulo 9 - Kalanga bible

Zumbunulo 9

¹Ntumwa we kudzimu we bushanu kalidza lunyanga gugwe, ndakabona nyenyedzi yakawila pasi mu shango. Nyenyedzi iyeyo ikapiwa tjizhulo tje gomba lakangina kusina tjilizanyo.

²Nyenyedzi ikazhula gomba, ngono busi gukatutunyuka mulili se busi gunobhuda mu bibi le moto, zhuba na pezhugwi kukati zwititi nge busi gunodwa mu gomba.

³Kukadwa phashu mu busi igogu dzikadelukila mu shango ngono dzikapiwa masimba anofanana ne masimba e gungubudza.

⁴Dzakabudziwa kuti dzisitongo hwisa zogwadza bushwa kene miti kene tjimwe ne tjimwe tje mbala we bgwelele tjinomela mu shango, koga dzihwise zogwadza bathu ibabo basina lutjwayo gwe Ndzimu mu phazha dzabo.

⁵Dzakapiwa ndetjedzelo kubahwisa zogwadza mimwedzi ili mishanu, koga dzisibabulaye, gwadza ikoko kwakabe kunga kwe nthu walumwa nge gungubudza.

⁶Mu mazhuba iyawo banowoshaka lufu, ngono abatowogubona. Ndizo banowoshaka kufa koga kufa kowobatizha!

⁷Phashu idzedzo dzakabe dzilingika se mbizi dzalulwamisigwa ngwa; mu misholo yadzo kwakabe kuna zwithu zwinolingika se zwiala zwakathamiwa nge golide, ngono njiso dzadzo dzinga njiso dze bathu.

⁸Mavudzi adzo enga mavudzi e bakadzi, meno adzo enga meno e shumba.

⁹Dzakabe dzina makwapa anonga zwivikili zwe ngwa zwinombagwa mu ifuba, ngono zhoba ye mapapilo adzo yakabe inga zhoba ye kara njinji dze ngwa dzakakwebiwa nge mbizi dzakalabukila ku ngwa.

¹⁰Dzina mimwise inonga ye gungubudza lina bushungu, simba ladzo le kuhwisa bathu zogwadza mwedzi mishanu lakabe lili mu mimwise yadzo.

¹¹Dzina mambo unodzibusa, ntumwa we gomba lakangina kusina tjilizanyidzo. Zina lile nge Tjihebheru ndi Abhadoni, nge Tjigiriki zina lile ndi Apoliyoni.

¹²Zogwadza zwe kutanga zwapinda. Bonani, zogwadza zwe mbumbiko mbili zwitjazha.

¹³Ntumwa we kudzimu we butathatu kalidza lunyanga gugwe ngono ahwa hwi lidwa mu nyanga nna dze tjibeso tje golide mbeli kwe Ndzimu.

¹⁴Hwi lakati ku ntumwa we kudzimu we butathatu “Sunungula batumwa be kudzimu banna bakasungwa ku gwizi bukulu gwe Yufuratesi!”

¹⁵Batumwa ibabo banna be kudzimu bakasunungugwa, bakabe bakalulwamisigwa zhuba ilelo ne mwedzi iwoyo ne gole ilelo, ku bulaya ngabo ye butatu ye bathu.

¹⁶Mbalo ye babhayani bakatatha mbizi yakabe ili miliyoni dzili mazana mabili, mbalo yabo ndakaihwa.

¹⁷Ngono tjandakabona mu mbono yangu ndiyetji; batathi badzo bakabe bana matale akabakilila zwifuba zwabo ali mashaba se moto, ana mbala unonga we makole, kakale kuli mbala we ditima, misholo ye mbizi yakabe inga misholo ye shumba, ngono mu milomo yadzo kubhuda moto ne busi ne salifa.

¹⁸Ngabo ye butatu ye bathu yakabulawa nge shamu idzedzo thatu, bakabulawa nge moto ne busi ne salifa zwidwa mu milomo ye mbizi idzedzo,

¹⁹ngobe masimba e mbizi idzedzo amu milomo yadzo ne mu mimwise yadzo. Mimwise yadzo inonga nyoka ina misholo, ngono dzoishingisa kukubadza.

²⁰Bathu bose bakabe basala, ibabo bakabe basabulawa nge shamu idzedzi, abazotongo lasha mishingo ye maboko abo mibi, kene kuli kuletja kunamata meya mibi kene midzimu ye golide ne siliva ne phangula ne mabgwe nenge zwikuni, iyo isingake ikabona kene kuli kuhwa kene kuyenda.

²¹Abazotongo shanduka mu mbulayo dzabo dze bathu, kene mu buloyi gwabo kene mu bupombgwe kene mu bubava gwabo.