Read Kalanga Ruti 1 Bible Online

Ruti 1 - Kalanga bible

Ruti 1

¹Kwakati mu misi yakabe ibusa Basumikilisi kukabe ne bhamba mu shango. Ngono mmwe nlume we Bhetelehema mu ntuthu we Juda kayenda kunolubila mu shango ye Moabu ana nkadzi uwe ne bakololo babe babili.

²Zina le nlume iwoyo lakabe liyi Elimeleki le nkadzi uwe kuyi Naomi, mazina e bakololo babe kuyi Mahiloni na Kilioni, bali Baefurata be Bhetelehema mu Juda. Bakayenda ku shango ye Moabu bakanogalako.

³Elimeleki nlume wa Naomi kafa, ngono Naomi kasala ne bakololo babe babili.

⁴Bakololo ibabo bakalobola bakadzi be Moabu, zina le mmwe kuyi Opha, le mmwe kuyi Ruti, ngono bakagala ikoko makole ali gumi.

⁵Mahiloni na Kilioni bakafabo, ndizo Naomi kasala asitjina bana ne nlume.

⁶Ipapo kamilika ne balongo babe kubgwilila kanyi kwabo, ngobe ahwa ali mu Moabu kuti Yahwe bakakumbula bathu babo bakabapa zojiwa.

⁷Kadwa ne balongo babe babili kwaakabe egala, bakatola zila kubgwilila ku shango ye Juda.

⁸Ngono Naomi kadwa balongo babe babili kati, “Yendani mmwe ne mmwe wenyu abgwilile ku nzi wa mmeyabe. Yahwe bamubhate zubuyanana sekwa makabhata bafi nami.

⁹Yahwe bamupe kugadzikana, mmwe ne mmwe wenyu mu nzi we nlume unowonlobola.” Ipapo kabaputa, ngono bakamilidza mahwi abo bakalila.

¹⁰Bakandwa bakati, “Aa, iswi tobgwilila namwi ku bathu bakanyi kwenyu.”

¹¹Ngono Naomi kabe eti, “Bgwililani bana bangu. Mowobe muyendilani nami? Apa kutjina bamwe bakololo mu ntumbu wangu bangamulobola kene?

¹²Bgwililani bana bangu. Yendani zwenyu, ngoti ndakwegula andingatjabe ne nlume. Na iko ha ndingati ndina kugalabgwe kuti ndingawana nlume mu busiku igogu abe ne bakololo,

¹³mungabalindila kuswikila bekula kene? Mungagala musina balume? Aa, bana bangu, ndakabhaika kwazo kupinda sekwa muli iko, ngoti tjiazha tja Yahwe tjobhayana nami.”

¹⁴Ipapo bakamilidza mahwi abo kakale, bakalila kwazo. Opha kaputa mmezwale babe kabawoneka, koga Ruti kabanamatila.

¹⁵Naomi kabe eti, “Bona nlongwana uwo wabgwilila kuna bakanyi kwabo ne ku midzimu iye, bgwilila naye.”

¹⁶Koga Ruti kashandula eti, “Musinditshindilidze kuthubukana namwi ne kuti ndisimutobele, ngoti kwamunoyenda ndowoyendaboko ne kwamunolala ndowolalaboko, bakanyi kwenyu banowobe bakanyi kwangubo ne Ndzimu wenyu unowobe Ndzimu wangubo.

¹⁷Pamunofila ndowofilabopo abuya abiganyiwapo. “Yahwe bandilobe bapaphulule, ha tjimwe tjingandithubukanya namwi kuzhe kwe lufu.”

¹⁸Naomi kati ebona kuti Ruti wakazwimisila kuyenda naye, kanletja.

¹⁹Ndizo bubili gwabo bakayenda kudzina benoswika ku Bhetelehema. Bakati beswika mu Bhetelehema nzi wose ukadzongeka ngekwabo, ngono bakadzi bakati, “Ndi Naomi iwoyu kene?”

²⁰Naomi iye kabe eti ku bali, “Musindidane muti ‘Naomi,’ mundidane muti ‘Mara,’[1] ngoti Masimbawose bakathama kuti butjilo gwangu gubipe kwazo.

²¹Imi ndakayenda ndakatuta, koga Yahwe bandibuza ndakalembedza maboko. Mondidanilani muti ‘Naomi?’ Yahwe bakandifupatila, Masimbawose bakandidziyidza.”

²²Ndizo Naomi kabuya edwa ku Moabu ana Ruti we N'moabu nlongo uwe, bakaswika mu Bhetelehema mu tjibaka tje kuvung'wa mathunde anoyi bhali.