Read Kalanga Ruti 2 Bible Online

Ruti 2 - Kalanga bible

Ruti 2

¹Naomi wakabe ana gamu le ludzi gwe nlume uwe Elimeleki liyi Bhoazi, akafuma kakale ana ntutshi.

²Ruti we N'moabu kadwa Naomi kati, “Imani ndinonunga mamburumburu[2] shule kwe bavuni kuna unowobe andihwila ngoni.” Naomi kabe eti kunli, “Yenda mwanangu.”

³Ngono kayenda kanotangisa kununga mamburumburu shule kwe bavuni mu nnda. Kukashingikala kuti azwiwane eshinga mu nnda wa Bhoazi wakabe ali we ludzi gwa Elimeleki.

⁴Bhoazi kazha edwa ku Bhetelehema ngono kati ku bavuni, “Yahwe ngababe namwi!” Bavuni bakashandula beti, “Yahwe ngabamukombolele!”

⁵Ipapo Bhoazi kabhuzwa nlanda uwe wakabe ali nlingi we bavuni kati, “Mwanadi iwoyu nge waani?”

⁶Nlingi we bavuni kadabila eti, “Mwanadi we N'moabu wakabuya na Naomi edwa ku shango ye Moabu.

⁷Wati kati, ‘Ndokumbila kununga mamburumburu asala shule kwe bavuni.’ Tjinga kwaazha mangwanana kashinga kuswikila ngwenu, aazotongo nyaluluka ne kutukununu kose.”

⁸Ipapo Bhoazi kadwa Ruti kati, “Tjihwilila mwanangu, usitongo yenda ukanonunga ku nnda we mmwe usiya iwoyu, koga sala shule baanadi bangu.

⁹Mesho awo ngaalambile mu nnda wabanovuna, ubasale shule. Ndabudza bazhuzha, kuti basitongo kuti tjimwe. Ha ungabhakhwa nge nyota uyende pa hali ung'we vula yatjegwa ne bazhuzha.”

¹⁰Ipapo Ruti kathigama kazwiyisa pasi ngokotamila pasi eti kunli, “Ini tjayita kuti mundihwile ngoni, mundiyitile hanya ipapa imi ndili ntaya?”

¹¹Koga Bhoazi kanshandula eti, “Kose kwawakashingila mmezwale babo nlume uwo asinofa, ndakakubudziwa nge buzhalo, ne sekwa wakasiya tate babo na mmeyabo ne shango ya kanyi kwenyu uzha ku bathu bausakatongo ziba.

¹²Yahwe ngabakupe mbhayilo we mishingo iyo, uwane mbhayilo uzhele muna Yahwe, Ndzimu we Iziraela, iwo wawawana dizhilo kusi kwe mapapilo awo.”

¹³Ipapo Ruti kashandula eti, “Dwililani mundihwile ngoni, she wangu, ngoti mandinyaladza mukalebeleka nge buthu nami nlandakadzi wenyu, nenguba ndisingafanane ne mmwe we balandakadzi benyu.”

¹⁴Nge tjibaka tje zojiwa zwe masikati Bhoazi kandwa kati, “Izha ngeno uje zojiwa usebe ne nkumbi unoshababa.” Ndizo kagala kubapa ne bavuni, ngono kabe empa mathunde akakangiwa. Kaja kaguta kasiya mamwe.

¹⁵Kati womilika kunonunga, Bhoazi kadwa bazhuzha babe kati, “Munletje anunge ne pakati pe zwishwa zwe bhali izwezwi zwimile, musindzibile.

¹⁶Mushomole misholo mimwe mu zwishwa munsiyile iyo kuti anunge, musindzibile.”

¹⁷Ndizo kanunga mu nnda kuswikila madekwana. Ipapo kashokola zwaakanunga, ngono kukalizana makabha mabili e bhali.

¹⁸Kasenga kazha nawo ku nzi. Mmezwale babe bakabona kuti wanunga kungapani. Ruti katola mathunde akakangiwa abe eja ngono kasiya kabapabo.

¹⁹Mmezwale babe bakambhuzwa bakati, “Washwa ununga ngayi nasi? Washinga ngayi? Ngaakombolegwe nthu wakuyitila hanya!” Ruti kabudza mmezwale babe nthu waashwa ashinga kunli kati, “Zina le nthu wandashwa ndashinga kunli loyi Bhoazi.”

²⁰Ipapo Naomi kati ku nlongo uwe, “Ngaakombolegwe ndi Yahwe, ibo bana lubu gusakatongo siya batjili kene bafi!” Naomi kapapha eti kunli, “Nthu iwoyo ludzi naswi, mmwe we bapejo naswi mu thaka.”

²¹Ruti we N'moabu kabe eti, “Wabuya kandidwa kati, ‘Ube ne balanda bangu kuswikila bepedza kuvuna.’ ”

²²Naomi kabe eti ku nlongo uwe, “Koyita mwanangu, kuti uyende ne baanadi babe, pamwe mu minda ipoga balume bangakudziyidza.”

²³Ndizo kalambila pejo ne baanadi ba Bhoazi enunga kuswikila kuvuna mathunde e bhali ne korong kupela, egala na mmezwale babe.