Read Kalanga Ruti 4 Bible Online

Ruti 4 - Kalanga bible

Ruti 4

¹Ipapo Bhoazi kayenda ku lubazhe pa nkoba we nzi kagala pasi. N'galithaka upejo wakalingisana ngogalathaka, tjinyolotjo kapinda, iye Bhoazi waakabe aleba, ngono kan'dana kati, “Zha ngeno nkwinya ugale pasi.” Ngono kazha kagala pasi.

²Bhoazi katola balume bali gumi bali bamwe be bakulu be nzi kabadwa kati, “Galani pasi ipapa.” Bakagala pasi.

³Ngono kabe edwa n'galithaka iwoyo eti, “Naomi hwoyu wabuya edwa ku shango ye Moabu unotengesa nnda iwoyu wakabe uli wa Elimeleki, mwana wa tate bedu.

⁴Ndakumbula kuti ndikubudze nge kwako, ngono nditi uutenge mbeli kwa ibaba bagele ipapa nenge mbeli kwe bakulu be lutshinga gwangu. Ha ili kuti unoutengunula uutengunule. Koga ha usingautengunule, undibudze kuti ndizibe, ngoti akuna mmwe wakalingisana umbeli kuko ungautengunula. Imi ndimi ndinokutobela.” Iye kabe eti, “Ndoutengunula.”

⁵Ipapo Bhoazi kabe eti, “Zhuba launotengunula nnda iwoyo kuna Naomi unotengunulilanya na Ruti we N'moabu we tjilikadzi, kudwilidza zina le wakafa mu thaka iye.”

⁶N'galithaka iwoyo kati ehwa ikoku kati, “Andingautengunule, ngoti ndingadwa nditjinya thaka yangu. Tola fanilo dzangu uuzwitengunuligwe.”

⁷Mu misi ya zhulo mu Iziraela tjilenje tje kutengunula ne tje kuteetshanya thundu tjakabe tjithamwa sahwoku: nlume wakabe embula shangu iye ing'ompela eipa ikamu tjitje. Ikoku ndiko kwakabe kulakidza kuti tjidumano tjawila nge Tjiiziraela.

⁸N'galithaka upejo kadwa Bhoazi kati, “Uuzwitengunuligwe,” kambula shangu iye.

⁹Ipapo Bhoazi kati ku bakulu ne ku bathu bose bakabe bali ipapo, “Nasi mu batendeki bekuti ndatenga kuna Naomi kose kwakabe kuli kwa Elimeleki ne kwakabe kuli kwa Kilioni na Mahiloni.

¹⁰Na Ruti we N'moabu, nkadzi wa Mahiloni, ndantengelanyabo kube nkadzi wangu kudwilidza zina le nfi kuti lisife mu ludzi gugwe mu lubazhe gwa kanyi kukwe. Nasi mu batendeki.”

¹¹Ipapo bathu bose bakabe bali pa nkoba ne bakulu bakati, “Ti batendeki. Yahwe ngabathame iwoyu nkadzi unozha ku ng'umba iyo ange Rahele na Liya bakabaka ng'umba ya Iziraela. Iwe uthame bana mu Efurata ube ne zina mu Bhetelehema.

¹²Bana baunowopiwa ndi Yahwe nge ndwana iwoyu utjintjetjana, bathame nsha uwo unge wa Perezi wakazwagwa ndi Juda na Tama.”

¹³Ndizo Bhoazi katola Ruti kanlobola. Bakashangana ngono Yahwe bakankombolela kazwisenga kawana mwana we tjilisana.

¹⁴Ipapo bakadzi bakati ngekwa Naomi, “Ngakukudziwe Yahwe nasi, basakusiya, usina ntjengeti. Zina lile ngalizibgwe mu Iziraela!

¹⁵Unowothama butjilo gugo gukabe butshwa, kabe n'yengi uwo mu kukula kuko. Nlongo uwo unokuda, unopinda bakololo bali kutendeka ku kuli, ngobe wanzwala.”

¹⁶Naomi ipapo katola mwana kanfukatila kabe nledzi uwe.

¹⁷Bakadzi be babakidzani bakampa zina beti, “Nkololo wazwaligwa Naomi.” Bakantumila beti Obedi. Ndiye wakabe ali tate ba Jesi, Jesi tate ba Dafite.

¹⁸Ogu ndigo ludzi gwa Perezi: Perezi wakazwala Hezironi,

¹⁹Hezironi kazwala Ramu, Ramu tate ba Aminadabhu,

²⁰Aminadabhu kazwala Nashoni, Nashoni tate ba Salimoni,

²¹Salimoni kazwala Bhoazi, Bhoazi tate ba Obedi,

²²Obedi kazwala Jesi, Jesi tate ba Dafite.