Read Kalanga 1 Samuele 14 Bible Online

1 Samuele 14 - Kalanga bible

1 Samuele 14

¹Kwakati limwe zhuba Jonatani nkololo wa Saulo kadwa nsengi we zwibhayano zwizwe kati, “Ngatiyende, ku ikwata tje babhayani be Bafilisitiya tjandiyeno.” Koga wakabe asabudza tate babe.

²Saulo wakabe egala ku ndzibo we Gibiya kusi kwe nti we pomegiranate mu Migironi, ana bathu bangabe mazana ali matathatu (600).

³Mubali kwakabe kuna Ahija nkololo wa Ahitubu, batatenini babe ili Ikhabodi, Ahija iwoyu, batategulu babe bakabe bali Finihasi nkololo wa Eli mpirisiti wa Yahwe mu Shilo. Ahija wakabe e ambala khiba ye bupirisiti. Ipapo bathu bakabe basingazibe kuti Jonatani wayenda.

⁴Mu nkoto we dombo wakabe Jonatani eshoko bhuda ndiwo, eyenda ku ikwata tje babhayani be Bafilisitiya, kwakabe kuna shongwe dzimile dzakashongoloka dzakabe dzinging'wa pakati kwadzo, zina le imwe shongwe lakabe liyi Bhozezi imwe iye Sene.

⁵Imwe shongwe yakabe yakashongoloka ili ku bunandzwa kulingisana ne Mikimashi, imwe ilimile ku burwa kulingisana ne Gebha.

⁶Jonatani wakadwa nsengi we zwibhayano zwizwe kati, “Ngatiyende ku ikwata tje babhayani ibabaje basakathumbigwa, pamwe Yahwe banowotibhatsha, akuna tjingama Yahwe mbeli kutitjidza nge bunji kene nge bushomanana.”

⁷Nsengi we zwibhayano zwizwe kandwa kati, “Thamani tjimwe ne tjimwe tjamakakumbula, dwililani, ndowoma namwi mu tjimwe ne tjimwe.”

⁸Jonatani kandwa kakale kati, “Kwakalulwama, towotjulukila ku bali, tikabazwilakidza.

⁹Ha bangatidwa beti, ‘Imani ipapo kuswikilila tizha kumuli, towoma ipapo patinowobe tilipo, atitowotathila ku bali.’

¹⁰Koga ha bangatidwa beti, ‘Tathilani ngeno, towotathila ku bali, ngobe tjowobe tjili tjilakidzo mutili kuti Yahwe batipa kukunda.’ ”

¹¹Ndizo bose bakazwilakidza ku babhayani be Bafilisitiya. Bafilisitiya bakati bebabona bakati, “Bonani! Bahebheru banobhuda mu mimwina yabakabe bakabgwata muili.”

¹²Balume be babhayani bakamimilila Jonatani ne nsengi we zwibhayano zwizwe beti, “Izhani ngeno, towomulakidza tjamunoshaka!” Ndizo Jonatani kadwa nsengi we zwibhayano zwizwe kati, “Undisale shule, ngobe Yahwe bapa Iziraela kukunda.”

¹³Jonatani wakatathila pezhugwi nge maboko ne makumbo awe, nsengi we zwibhayano zwizwe akantobela. Jonatani kanginilila Bafilisitiya kabatema kabaligila pasi, ngono nsengi we zwibhayano zwizwe, kazha shule kukwe, kabakowobedza.

¹⁴Mu kuthasela kwabo kwe kutanga Jonatani ne nsengi we zwibhayano zwizwe bakabulaya balume bangaswika makumi mabili mu pathu pakaashama kungabe gwamu le ndima ye ng'ombe.

¹⁵Kukabe ne kupaluka moyo kukulu mu ikwata tje babhayani bose be Bafilisitiya bakabe bali mu mishasha ne bakabe bali ku magwilo ne bakabe bali batoleli, shango ikatengenyeka, bose bakabe ne kutja. Kutja ikoku kwakabe kudwa ku Ndzimu.

¹⁶Balindi ba Saulo mu Gibiya mu ntuthu we Bhenjamini bakalinga, ngono bakabona mbunga we bathu uwundumuka utizhila yeno na yeno.

¹⁷Ndizo Saulo kadwa babhayani baakabe anabo kati, “Danani mazina mubone kuti ndiboani bangabe basipo mutili.” Kwakati basinobe badana mazina, ngono bakawana Jonatani ne nsengi we zwibhayano zwizwe basipo.

¹⁸Saulo kadwa Ahija kati, “Zhisa ngeno Bhokisi le Tjidumano tje Ndzimu.” Ngobe mu tjibaka itjetjo Bhokisi le Tjidumano tje Ndzimu lakabe liyenda ne Baiziraela.

¹⁹Kwakati Saulo atjalebeleka ne mpirisiti, zhoba imu mishasha ye Bafilisitiya ikakulila mbeli. Saulo kadwa mpirisiti kati, “Letjedza.”

²⁰Ipapo Saulo ne bathu bose bakabe banaye bakakubungana bakayenda ku ngwa, bakawana Bafilisitiya bebulayana ne makanu abo, ndizo kukabe ne kudziyana kukulu kwazo.

²¹Bahebheru bakabe bagala bana Bafilisitiya, bakayenda nabo ku ngwa, bakabashandukila, ngono bakabgwilila ku Baiziraela bakabe bana Saulo na Jonatani.

²²Kwakati Baiziraela bose bakabe babgwata mu shango ye matuthu ye Ifureimi, behwa kuti Bafilisitiya banotizha, na ibo bakatatana nabo mu ngwa.

²³Mu zhuba ilelo Yahwe bakagwila Baiziraela, ngono ngwa ikanopinda Bhetiaveni.

²⁴Mu zhuba ilelo bathu be Iziraela bakadziyidzika kwazo, ngobe Saulo wakatunisa bathu kati, “Kube ne bhiso munli nthu unowoja zojiwa kutangila zhuba lingina, ndisathu azwibgwilizila mu zwita zwangu.” Ndizo akuna nlume wakalabila zojiwa.

²⁵Bathu ibaba bose bakangina mu ishaka, bawana butji gwe nyutji pasi.

²⁶Kwakati babhayani beswika mu ishaka, butji gwe nyutji gudotha, ngono akuna ne wakatola kayisa ku nlomo, ngobe bakatja tjisungo.

²⁷Koga Jonatani wakabe asahwa kuti tate babe batunisa bathu, ndizo katola lukombo gwaakabe akabhata kabhayila theswi yago mu mape e nyutji, kayisa luboko ku nlomo uwe, mesho awe kabe epenya.

²⁸Ngono mmwe we babhayani kandwa kati, “Tate babo bakatunisa bathu beti, ‘Una bhiso iye unowoja zojiwa mu zhuba la nasi. Ndizo bathu bakafa nge zhala.’ ”

²⁹Jonatani kabe eti, “Tate badziyidza shango, bona sekwa mesho angu wopenya ndiko, ngobe ndalabila butji gushomanana.

³⁰Apa kobe kusayita, ha babhayani babe baja zwabo bakasungunuka zojiwa zwabatapa nasi mu zwita zwabo, ngwenu kobe kusabulawa Bafilisitiya nge bunji kene?”

³¹Mu zhuba ilelo, Baiziraela basinobulaya Bafilisitiya kudwa mu Mikimashi kunoti ku Aijaloni, bakabe batjinengetela nge zhala.

³²Ndizo bakawila zojiwa zwabatapa pezhugwi, bakatola pkhwizi ne ng'ombe ne phulu, bakazwibhayila pasi koga, bakaja nyama ibhizha malopa.

³³Ndizo mmwe kanobikila Saulo eti, “Lingani, bathu banothamila Yahwe tjibi ngoja nyama ibhizha malopa.” Saulo kashandula eti, “Mathama nlandu, kunguludzilani bgwe gulu kundili.”

³⁴Saulo kabadwa kati, “Yendani ku bathu, ngono mubadwe muti, ‘Mmwe ne mmwe azhise ng'ombe kene pkhwizi, bazhe bazwibhayile ipapa, bazwije, basithamile Yahwe tjibi ngoja nyama ibhizha malopa.’ ” Ndizo mmwe ne mmwe kazhisa ng'ombe iye busiku igogu kaibhayila ipapo.

³⁵Saulo kabakila Yahwe Tjibeso tje zwibhayilo, tjakabe tjili tje kutanga etjibaka.

³⁶Saulo kabe eti, “Atitobeleni Bafilisitiya busiku, tibakikithidze kuswikila mangwanana kuyedza, kushete ne ng'ompela wabo watinowosiya etjila.” Babhayani bakashandula beti, “Thama tjaunobona tjakakululwamila tokubhatsha.” Ngono mpirisiti kabe eti, “Ngatizwisedzedzeni ku Ndzimu ipapa.”

³⁷Ndizo Saulo kabhuzwa Ndzimu eti, “Apa nditobele Bafilisitiya, mothama kuti bakundiwe nge Baiziraela kene?” Koga Ndzimu ukasin'dabile Zhuba ilelo.

³⁸Saulo kabe eti, “Izhani ngeno mose imwi batungamili be ikwata tje babhayani, ngatishakeni kuti kwathamwa tjibi tjipi nasi.

³⁹Ndolebesa ndotuna na Yahwe banotjila ibo bakagwila Iziraela, ha kuli kuti kumu nkololo wangu Jonatani, ndolebesa unowofa!” Koga mu bathu bose ibabo ukuna wakanshandula.

⁴⁰Saulo kadwa Baiziraela bose kati, “Imwi mume ikoko, imi ne nkololo wangu Jonatani towoma ndingeno.” Ngono bathu bakadabila beti, “Thama tjaunobona tjakakululwamila naswi tiyapobo.”

⁴¹Ndizo Saulo katembezela Yahwe Ndzimu we Iziraela kati, “Imwi Yahwe Ndzimu we Iziraela, ini musadabila nlanda wenyu nasi kene? Koga ha nlandu uwoyu uli mundili kene mu nkololo wangu Jonatani, imwi Yahwe Ndzimu we Iziraela mupe Urimu, koga ha nlandu uli mu bathu benyu Baiziraela mupe Thumimu.” Kukakandigwa kukabhakhwa Jonatani na Saulo, bathu bakasungunuka.

⁴²Ndizo Saulo kabe eti, “Kandilani pakati kwangu ne nkololo wangu Jonatani.” Ngono kukabhakhwa Jonatani.

⁴³Saulo kadwa Jonatani kati, “Undibudze, wathamani kene?” Jonatani kambudza kati, “Ndakalabila butji gwe nyutji bushomanana nge theswi ye lukombo gwandakabe ndakabhata, yezo ndipano, ndingafa?”

⁴⁴Saulo kati, “Ndzimu undilobe upaphulula, ha usingake ukafa, Jonatani.”

⁴⁵Bathu bakabhuzwa Saulo bakati, “Apa Jonatani unofa kene? Iye wakathama kukunda kukulu zwingapa mu Iziraela! Ndodwa! Totuna na Yahwe banotjila tjoselele, akuna vudzi mu nsholo uwe linowowila pasi, ngobe wathama ikoku nasi nge bhatsho ye Ndzimu.” Ndizo bathu bakasunungula Jonatani, ngono akasife.

⁴⁶Ndizo Saulo kaletjedza kutatana ne Bafilisitiya, ngono Bafilisitiya bakayenda kanyi kwabo.

⁴⁷Kwakati Saulo asinotola bushe gwe Iziraela, kabhayana ne zwita zwizwe zose pamwe ne pamwe, Moabu ne Baamoni ne Edomu na bomambo be Zobha, nenge Bafilisitiya, kumwe ne kumwe kwaakabe elingako wakabe ekunda.

⁴⁸Wakagwa akasima tjilopa, kakunda Baamaleki, kasunungula Baiziraela mu maboko e bakabe bakabatapa.

⁴⁹Ipapo bakololo ba Saulo bakabe ili Jonatani na Ishivi na Malikishuwa. Zina le nkololokadzi uwe hwola lakabe liyi Merabhu ntjetjana kuyi Mikhali.

⁵⁰Zina le nkadzi wa Saulo lakabe liyi Ahinoami nkololokadzi wa Ahimaazi. Zina le ntungamili we babhayani babe lakabe liyi Abineri nkololo wa Neri batatenini ba Saulo.

⁵¹Kishi wakabe ali tate ba Saulo, ngono Neri ali tate ba Abineri, bakabe bali bakololo ba Abiele.

⁵²Kwakabe kuli ngwa yakasima ne Bafilisitiya mu misi yose ya Saulo, kwakabe kuti Saulo ebona nlume wakasima kene ali ngwi wakasima tjilopa kazwitolegwa iye kunshingisa.