Read Kalanga 1 Samuele 16 Bible Online

1 Samuele 16 - Kalanga bible

1 Samuele 16

¹Yahwe Bakabhuzwa Samuele bakati, “Apa kowodza kukabe lini ulilila Saulo, ha ndakanlamba kuti abe mambo we Iziraela? Zhadza lunyanga gugo mafuta umilike uyende, ndokutuma kuna Jesi we N'bhetilehema, ngobe ndakashalula mmwe we bakololo babe kube mambo.”

²Samuele kashandula eti, “Ndowoyenda tjini kene? Saulo ha angahwa nge kwako, unowondibulaya.” Ngono Yahwe bakan'dwa bakati, “Tola ng'ombe pholombe uswike uti, ‘Ndazha kuwopisila Yahwe tjibhayilo.’

³Ukoke Jesi azhe ku tjibhayilo, ndowokulakidza tjaunowothama, unowondizhodzela iye wandinowokutendekela.”

⁴Samuele kathama tjaakadwiwa ndi Yahwe, wakati eswika ku Bhetelehema batungamili be nzi nkulu bakanshanganidza betetema, bakambhuzwa bakati, “Apa mazha nge mbakiso kene?”

⁵Samuele kabe eti, “Tjose nge mbakiso, ndazha kuwopisila Yahwe tjibhayilo, Muzwitjenepadze mungine nami mu tjibhayilo.” Katjenapadza Jesi ne bakololo babe, kabakoka kuzha ku tjibhayilo.

⁶Bakati basinozha, katilika Eliabu mesho kakumbula eti, “Tjoselele nzhodziwa wa Yahwe umbeli kwabo.”

⁷Koga Yahwe bakadwa Samuele bakati, “Usilinge mbumbiko eyi, kene tjimo tjekukula kukwe, ngobe ndanlamba, Yahwe abatobona sekwa kunobona bathu tjinyama, bathu banolinga mbumbiko ye nthu, koga Yahwe banolinga moyo.”

⁸Ndizo Jesi kadana Abinadabu, kampitsha mbeli kwa Samuele. Samuele kabe eti, “Ndodwa, Yahwe abazonshalula iwoyu.”

⁹Jesi akati Samma apindebo po. Samuele kabe eti, “Ndodwa Yahwe abazonshalula iwoyu.”

¹⁰Jesi kapitsha bakololo babe bali kutendeka mbeli kwa Samuele, ngono Samuele kadwa Jesi kati, “Yahwe abana wabashalula muna ibaba.”

¹¹Samuele kabhuzwa Jesi kati, “Apa bakololo babo ndibo bose ibaba kene?” Ngono kadabila eti, “Kwasala we kologwe, ngono wakalisa pkhwizi.” Ipapo Samuele kwadwa Jesi kati, “Tuma mmwe anontola, atitowogala pasi kuswikila eswika ipapa.”

¹²Ndizo Jesi katuma nthu kanozha naye. Wakabe ekwidzima, ana mesho mabuya, kakale ali mbuya. Yahwe bakabe beti, “Milika unzhodze, ngobe ndiye iwoyu.”

¹³Ndizo Samuele katola lunyanga gwe mafuta, kanzhodzela mbeli kwe bakulu babe, ngono kudwa mu zhuba ilelo kuyendila mbeli, meya ye Yahwe ikadelukila muna Dafite nge masimba. Samuele kamilika kayenda ku Rama.

¹⁴Ipapo meya ya Yahwe yakabe isitjipo muna Saulo, meya mibi yakatumwa ndi Yahwe ikammukila.

¹⁵Ngono balanda ba Saulo bakandwa bakati, “Bona meya mibi inodwa ku Ndzimu yamumukila.

¹⁶Tetshi, idwani balanda benyu banoshaka nthu we nyambi mu kulidza herepa, kowoti meya yakabipa inodwa ku Ndzimu yadelukila mu muli, unowomulidzila herepa, ngono mowotebama.”

¹⁷Ndizo Saulo kadwa balanda babe kati, “Mundiwanile nthu ungalidza zwinozipa, munzhise kundili.”

¹⁸Mmwe we bazhuzha kadabila eti, “Ndakabona nkololo wa Jesi we N'bhetelehema we nyambi mu kulidza, nlume wakasima tjilopa, wakasima mu ngwa, i nyambi ye ndebo, kakale mbuya kulingwa, ngono Yahwe banaye.”

¹⁹Ndizo Saulo katuma batumwa kuna Jesi kunon'dwa beti, “Unditumile nkololo uwo Dafite unolisa pkhwizi.”

²⁰Jesi wakatola donki katjibelesa tjiwunga ne gukhwa le nkumbi we zhambi ne tjibudzana, katuma nkololo uwe Dafite kunozwipa Saulo.

²¹Dafite kaswika kuna Saulo, kangina mu nshingo uwe. Saulo wakan'da kwazo, kanthama nsengi we zwibhayano zwizwe.

²²Ndizo Saulo wakatumila dama kuna Jesi eti, “Ndokumbila kuti musunungule Dafite agalile tjose mu nshingo wangu, ngobe ndan'da.”

²³Kwakabe kuti meya mbi inodwa ku Ndzimu idelukila muna Saulo, Dafite kabe etola herepa iye elidza, Saulo ebe ewiligwa etebama, meya mbi ibe ibhuda munli.