Read Kalanga 1 Samuele 18 Bible Online

1 Samuele 18 - Kalanga bible

1 Samuele 18

¹Kwakati Dafite asinopedza lebeleka na Saulo, meya dza Jonatani na Dafite dzikawililana, Jonatani kada Dafite sekwa ezwida.

²Kudwa zhuba ilelo Saulo katola Dafite kagala naye, kasitjan'dumile kubgwilila ku nzi wa tate babe.

³Ndizo Jonatani kathama tjidumano na Dafite, ngobe akabe en'da sekwa ezwida.

⁴Jonatani kaambula tjiambalo tjaakabe akaambala katjipa Dafite, kampilanya ne zwiambalo zwizwe zwe ngwa, nenge bukanu gugwe ne dati le nsebe ne mwandabula uwe.

⁵Tjimwe ne tjimwe tjaakabe etumwa ndi Saulo kutjithama, Dafite wakabe etjitubula, ndizo Saulo kampa mamo apezhugwi mu ngwa. Ikoku kukashathisa bathu bose ne makulukota a Saulo dumbu.

⁶Kwakati bathu babgwilila ku nzi, Dafite asinobulaya Nfilisitiya, bakadzi bakabhuda mu mizi yose ye Iziraela, beshanganidza Mambo Saulo bemba bezana, bemba njimbo dze shatho, belidza thamborini ne laya.

⁷Bakabe bezana bemba beti, “Saulo wakabulaya zwiwulu (1 000) zwizwe, ngono Dafite kabulaya zwizwe zwiwulu zwili gumi (10 000).”

⁸Saulo wakazhala bushongola kwazo, ngobe matama iyawa, akankutha. Kabe eti, “Dafite bampa tjiala tje zwiwulu zwili gumi (10 000), koga imi bendipa tjiala tje tjiwulu (1 000) koga, apa ini tjansalila, akusi kutola mbuso?”

⁹Kudwa ipapo kuyenda mbeli, Saulo katjila nge lubengo kuna Dafite.

¹⁰Kwakati tjimuka meya mibi inodwa ku Ndzimu ikadelukila muna Saulo nge masimba, ikampengesa ali mu ng'umba iye, Dafite elidza harepa sekwa agala ethama mazhuba wose. Saulo wakabe akabhata thumo lile nge luboko.

¹¹Ngono Saulo kaposa thumo kazwidwa eti, “Ndowobhayila Dafite mu guma.” Koga Dafite kandzeta kabili kose.

¹²Saulo wakabe etja Dafite, ngobe Yahwe bakabe bana Dafite, bafupatila Saulo.

¹³Ndizo Saulo katata Dafite panli, kanthama nlauli we balume bali tjiwulu (1 000), ngono Dafite kayenda, kanobuya akatungamila bathu.

¹⁴Dafite wakabe etubula muna zose zwaakabe eshinga, ngobe Yahwe bakabe banaye.

¹⁵Kukati Saulo ebona sekwa Dafite etubula ndiko, kantja.

¹⁶Koga Baiziraela ne Bajuda bose bakabe beda Dafite, ngobe akabe ebatungamila mu ngwa dzabo.

¹⁷Ndizo Saulo kadwa Dafite kati, “Nkololokadzi wangu we mbano Merabhu woyu, ndowokupa iye kabe nkadzi uwo, undishingile nge tjilopa tjakasima kubhayana ngwa dza Yahwe.” Ngobe Saulo wakazwidwa eti, “Anditowommilidzila luboko, Bafilisitiya ndibo banowombulaya.”

¹⁸Dafite kadwa Saulo kati, “Imi ndiani, ne ng'umba ya tate bangu ini, kene nsha wa tate bangu uni mu Iziraela, kwandingadzina abe nkwasha wa mambo kene?”

¹⁹Koga kwakati kwatjibe tjibaka tje kuti nkololokadzi wa Saulo Merebhu apiwe Dafite kunlobola, kapiwa Adiriele we Mehola kuti abe nkadzi uwe.

²⁰Ipapo nkololokadzi wa Saulo unoyi Mikhali kada Dafite, Saulo kati ebudziwa ngekwako, kukanshathisa.

²¹Saulo kazwidwa kati, “Ndowompa iye, ndiye wandinoshingisa kumbhata, kuti Bafilisitiya bambulaye.” Ipapo Saulo kadwa Dafite kati, “Ngwenu wawana zila ye bubili kube nkwasha wangu.”

²²Saulo kadwa balanda babe kati, “Lebelekani na Dafite mu ikohwa mun'dwe muti, ‘Bona mambo bakakushathila, ne balanda babo bose banokuda, ngwenu tjibe nkwasha wa mambo.’ ”

²³Balanda bakabgwilulula matama iyawa kuna Dafite. Ngono Dafite kabadwa kati, “Apa mokumbula kuti kuthu kutukununu kube nkwasha wa mambo kene? Bonani ndi nlume we nshayi usina tjilumbi.”

²⁴Kukati balanda ba Saulo bembudza tjalebgwa ndi Dafite,

²⁵Saulo kashandula eti, “Mudwe Dafite muti, ‘Mambo akuna tjabanoyemula tje malobolo, kuzhe kwe zana ling'ompela (100) le zwikanda zwa mbeli zwe Bafilisitiya, kuli kuzwibgwilizila kwa mambo mu zwita zwabo.’ ” Saulo eluka maano kuti Dafite abulawe nge Bafilisitiya.

²⁶Kwakati balanda ba Saulo bebudza Dafite matama iyawa, kashathila kube nkwasha wa mambo. Tjibaka tje gobe tjitjaduma.

²⁷Dafite kamilika ne bathu babe kanobulaya Bafilisitiya bali mazana mabili (200), kabuya ne zwikanda zwabo zwa mbeli, kazwipa mambo zwili mbalo izhele, kuti ndizo abe nkwasha wa mambo. Saulo kapa Dafite Mikhali nkololokadzi uwe kuti anlobole.

²⁸Kwakati Saulo asinobona kuti Yahwe bana Dafite, ne kuti nkololokadzi uwe Mikhali unon'da,

²⁹Saulo kadwilila etja Dafite kupinda, kabe tjita tja Dafite misi yose ye butjilo gugwe.

³⁰Balauli be babhayani be Bafilisitiya bakadwilila bebhuda beyenda ku ngwa, ngono bakabe beti bebhuda, Dafite kabe ne kutubula kupinda makulukota wose a Saulo, ndizo kabe ne tjilumbi tjikulu kwazo.