Read Kalanga 1 Samuele 19 Bible Online

1 Samuele 19 - Kalanga bible

1 Samuele 19

¹Saulo wakabudza nkololo uwe Jonatani ne balanda babe bose ngekwe kubulaya Dafite. Koga Jonatani wakabe ne ludo gukulu kwazo muna Dafite.

²Jonatani kadwa Dafite kati, “Tate bangu Saulo banogwisa zila ye kukubulaya, tjimuka mangwanana uzwitjengete, utizhe unobgwata.

³Ndowobhudila kuzhe, anoma na tate pa shango pa unowobe ulipo, alebeleka na tate nge kuko, ngono ndowokubudza tjandinowobe ndabona.”

⁴Jonatani wakaleba bubuya ngekwa Dafite na tate babe Saulo, ebadwa eti, “Mambo ngabasithame tjibi ngekwe nlanda wabo Dafite, ngobe iye akuna tjaakamutjinya nditjo, nenge zwaakathama, zwaakabe ne mbuzilo wulu kwazo mu muli.

⁵Wakalonga butjilo gugwe mu mbatsha paakabulaya Nfilisitiya, ngono Yahwe bakazhisila Iziraela yose kukunda kukulu kwazo. Makakubona, mukashatha, ngono ini mungathama tjibi nge kutebula malopa asina nlandu nge kubulaya Dafite asina nlandu kene?”

⁶Saulo katola dama la Jonatani, katuna kati, “Ndolebesa, na Yahwe banotjila, Dafite aatowobulawa.”

⁷Ndizo Jonatani kadana Dafite kanlondela zose zwalebgwa. Kantola kan'yisa kuna Saulo, ngono Dafite kabgwiliziwa mu nshingo uwe wa kale.

⁸Ngwa ikamuka kakale, ngono Dafite kabhuda kanogwa ne Bafilisitiya. Kagwa nabo nge masimba kababulaya kwazo, bakadwa panli bakatizha.

⁹Ngono meya mibi inodwa kuna Yahwe ikadelukila muna Saulo, aligele mu ng'umba iye akabhata thumo nge luboko, kukati Dafite elidza harepa,

¹⁰Saulo kagwiso kothomelela Dafite mu guma nge thumo, koga kalidzeta, kuti thumo linobhaya mu guma. Dafite katizha, kanyeluka mu busiku igogu.

¹¹Saulo wakatumila balume ku ng'umba ya Dafite kuilinda, kuti bambulaye mangwanana. Koga nkadzi wa Dafite Mikhali kanluma zebe kati, “Ha usingake ukatizha busiku igogu kuzwitjidza, mangwana unowobulawa.”

¹²Mikhali kathukisa Dafite nge fesitere, katizha kapudzumuka lufu.

¹³Mikhali katola ifano tje ndzimu wakabezhiwa katjikushika pa bulawo, katjisazamidza nsazamilo we bukuse gwe mbudzi, katjifukidza nge ngubo.

¹⁴Kwakati Saulo atuma bathu kunobhata Dafite, Mikhali kabadwa kati, “Unogwala.”

¹⁵Ndizo Saulo kabgwiliza bathu kuti banobona Dafite, kabadwa kati, “Munsenge nge bulawo gugwe muzhise ku ndili, ndimbulaye.”

¹⁶Kwakati balume bengina mukati, bakawana tjifano tje ndzimu wakabezhiwa tjili lele pa bulawo, ne nsazamilo we bukuse gwe mbudzi pa misholo yatjo.

¹⁷Saulo kadwa Mikali kati, “Hwutini wanditjebela kwakajali, waletjedza tjita tjangu tjiyenda, kuti ndizo apudzumuke kene?” Mikali kashandula Saulo eti, Wakandidwa kati, “Undiletje ndiyende, ndisidwe ndikubulaya.”

¹⁸Kwakati Dafite atizha apudzumuka, kayenda kuna Samuele ku Rama, kaswika kambudza zose zwaakathamwa ndi Saulo. Ndizo iye na Samuele bakayenda ku Naioti bakanogalako.

¹⁹Saulo kalumwa zebe kuyi, “Dafite uku Naioti ku Rama.”

²⁰Ndizo Saulo katuma bathu kunotola Dafite. Kwakati bebona goko le balebesambeli lili mu kulebesambeli na Samuele alimile ali iye nsholo wabo, meya ye Ndzimu ikabhata batumwa ba Saulo, naibo bo bakabe mu meya bakalebesambeli.

²¹Kwakati Saulo ebudziwa ngekwe kuthu ikoku, katuma bathu bamwe, naibo bakalebesambelibo. Saulo katuma bathu kakale gwe butatu, na ibo bakalebesambeli bo.

²²Ndizo Saulo kazwiyendigwa ku Rama. Kaswika pa tshime gulu limu Seku, kabhuzwa kati, “Bangayi Samuele na Dafite kene?” Ngono mmwe kan'dabila kati, “Baku Naioti ku Rama.”

²³Kayenda ko, wakati akalinga Naioti mu Rama, meya ye Ndzimu ikadelukila munli. Kwakati akabhata eyenda, kalebesambeli, kudzina enoswika ku Naioti mu Rama.

²⁴Kazwiambula zwiambalo, na iyebo kalebesambeli mbeli kwa Samuele. Kakandalala ali mbujo sikati ilelo lose ne busiku igugo gose. Ndipo pakatangisa ndebeleko inoti, “Apa Saulo na iyebo upakati kwe balebesambeli?”