Read Kalanga 1 Samuele 20 Bible Online

1 Samuele 20 - Kalanga bible

1 Samuele 20

¹Dafite katizha kudwa mu Naioti ku Rama, kayenda kuna Jonatani kambhuzwa kati, “Ndakathamani? Nlandu wangu ini? Apa ndakatjinyilani tate babo kwabanogwisa kundibulaya kene?”

²Jonatani kadabila eti, “Ndodwa! Aungafe. Akuna tate tjabangathama basandibudza, kene tjingabe tjikulu kene tjitukununu kungapani, ngono ikoku bangandisumbikila iko tjini kene? Akuna tjakajalo!”

³Koga Dafite na iyebo katuna kati, “Tate babo banoziba zubuyanana kuti unondida, ngono banokumbula beti, ‘Ikoku akusizibgwe ndi Jonatani, pamwe kunganhwisa zogwadza.’ Koga ndolebesa, ndotuna na Yahwe banotjila, nanganawe tjose, kwabe pejo nami kuti ndife.”

⁴Jonatani kadwa Dafite kati, “Tjaungandikumbila, ndowokuthamila itjo.”

⁵Dafite kadwa Jonatani kati, “Bona, mangwana, Nzano we Mwedzi ugala ndakafanila kuti ndibe ndili pa ndilo na mambo, koga ima ndiyende, ndinobgwata ku shango kuswikila nngwani madekwana.

⁶Ha kuli kuti tate babo bangandishaka, ubadwe uti, ‘Dafite wakazwikumbila mundili eteta, eti ndinsunungule, alabukile ku Bhetelehema nzi nkulu wa kanyi kwabo, ngobe kuna nshingo we tjibhayilo tje gole ikweno, tje nsha wabo wose.’

⁷Ha bangati, ‘Kwakalulwama!’ Nlanda uwo unowobe atjila, koga abangagwadza moyo, uzibe kuti bakazwimisila kundibulaya.

⁸Ndizo ngwenu, uhwile nlanda uwo ngoni, ngobe wakathama tjidumano naye mbeli kwa Yahwe. Koga ha ndili nlandu, undizwibulaigwe iwe! Ini ungandiseyenya kuna tate babo?”

⁹Jonatani kashandula eti, “Ndodwa! Apa ha ndabe ndina luzibonyana gwe kuti tate bakazwimisila kukubulaya, ndobe ndisakakubudza kene?”

¹⁰Dafite kabhuzwa Jonatani kati, “Ndowobudziwa ndiani, ha tate babo bakushandula nge bushongola?”

¹¹Jonatani kashandula Dafite eti, “Izha ngeno, ngatibhudile ku shango.” Ndizo bakayenda bose.

¹²Jonatani kadwa Dafite kati, “Ndotuna na Yahwe Ndzimu we Iziraela! Ndowodaziba muna tate mangwana nge tjibaka itjetji, kuti ndiwe mazwihwo a tate nge kuko. Ha kuli kuti batjina ludo mu kuli, apa andingatumile dama ku kuli kukuzibisa kene?

¹³Koga ha kuli kuti tate banoshaka kukubulaya, ngono ndibe ndisingakubudze, kuti uzwiyendigwezo utjila, ndoti Yahwe bandilobe bepaphulula. Yahwe babe nawe, se kwabagala ba na tate.

¹⁴Koga ha nditjatjila, undilakidze ludo gwe malebeswa gwa Yahwe, ngono nakutobe ndingafa,

¹⁵usitongobe ukapedza ludo gugo gwe malebeswa mu nsha wangu, nakutobe Yahwe bakabe batshwayila zwita zose zwa Dafite mu shango.”

¹⁶Ipapo Jonatani kathama tjidumano ne be nsha wa Dafite, kaleba eti, “Yahwe banowobuzuludzila zwita zwa Dafite.”

¹⁷Jonatani katunisa Dafite kakale nge ludo gwanon'da ndigo, ngobe en'da sekwa anozwida.

¹⁸Jonatani kandwa kati, “Mangwana Nzano we Mwedzi ugala, unowobe ushakika, ngobe bugalo gugo gowobe gusina nthu.

¹⁹Mu zhuba la nngwani, unowoshakiwa kwazo, uyende kwawakabe wakabgwatako zhulo, ngono ugale pa wunde ne shongwe ikweno.

²⁰Ndowoposela misebe mitatu pawunde nayo, seungati ndoposela ku tjilipo.

²¹Ndowobe ndituma mbisana, nditi, ‘Yenda unoshaka misebe.’ Ha ndingadwa mbisana nditi, ‘Bona misebe yakabapa nawe, uizhise ngeno,’ ipapo ube uzha, ngobe, kowobe kwakakululwama, kusina mbatsha, ndotuna na Yahwe.

²²Koga andingadwa mbisana nditi, ‘Bona misebe itjandieno kuko,’ ipapo uyende, ngobe Yahwe banowobe bekupa zila.

²³Mu ndebeleko yatalebeleka imi nawe, ziba kuti, Yahwe ntendeki pakati kwangu nawe nge kusingapele.”

²⁴Ndizo Dafite kanobgwata mu shango ngono kukati Nzano we Mwedzi ugala waswika mambo kagala pasi kuti aje.

²⁵Wakagala pa tjigalo tjitje tje misi yose pa hwunde ne guma, kulingisana na Jonatani, Abineri kagala pejo na Saulo, koga bugalo gwa Dafite gwakabe gusina nthu.

²⁶Mu zhuba ilelo Saulo aana tjaakaleba, ngobe wakakumbula eti, “Kuna tjimwe tjawila Dafite, tjantemapadza, tjoselele wakatemapala.”

²⁷Koga tjimuka, zhuba le bubili le Nzano we Mwedzi ugala, bugalo gwa Dafite gukabe gusina nthu kakale. Ndizo Saulo kabhuzwa nkololo uwe Jonatani kati, “Hwutini nkololo wa Jesi asazha ku zojiwa, kwetjinga kwe madekwe na nasi?”

²⁸Jonatani wakadabila Saulo eti, “Dafite wakazwikumbila mundili nge buthu eti ndinsunungule ayende ku Bhetelehema.

²⁹Wakandidwa kati, ‘Undidumile ndiyende, ngobe be nsha wedu bana tjibhayilo mu nzi, ngono nkulu wangu wakandidwa kati ndibepo bo. Ha ubona kuli kubuyanana mu mesho awo, ndokumbila, undidumile ndiyende ndinobona bakulu bangu.’ Ndizo wale asazha kuwoja na mambo.”

³⁰Saulo kagwadziligwamoyo Jonatani, kandwa kati, “Iwe nkololo we nkadzi wakakombama, usingagalikebgwe! Unozwidwa uti anditoziba kuti umile ne nkololo wa Jesi, kuzwibhatisa shoni na mme yabo bakakuzwala kene?

³¹Ha nkololo wa Jesi atjatjila mu shango iyeyi, nakuto kuli iwe kene bushe gugo akungabe ne tjilumbi. Sangwenu wale, untumile bathu azhe kundili, ngobe wakafanilo fa.”

³²Jonatani kabhuzwa Saulo tate babe kati, “Hwutini angabulawa? Wathamani?”

³³Ipapo Saulo kamposa nge thumo kuti ambhaye, ndizo Jonatani kaziba kuti kumu nkumbulo wa tate babe kubulaya Dafite.

³⁴Jonatani wakamilika pa tafuli nge bushongola gunotjisa, kasitongoja zojiwa mu zhuba le bubili le Nzano we Mwedzi ugala, ngobe wakabe elilila Dafite, nenge kuti tate babe bakabe banlengudza.

³⁵Kwakati mu mangwanana Jonatani kabhudila kuzhe mu shango kunoshangana na Dafite, ngono wakabe ana mbisana ntjetjana.

³⁶Kadwa mbisana kati, “Labuka unonunga misebe yandinoposa.” Kwakati mbisana atjakalabuka, kaposa nsebe ukampindila.

³⁷Kukati mbisana eswika pawila nsebe wa Jonatani, Jonatani kakambidza mbisana kati, “Apa, nsebe auteli mbeli kuko kene?”

³⁸Jonatani kakambidza mbisana kati, “Tjimbidza, libilidza, usimoneleke.” Ndizo mbisana wa Jonatani kanunga misebe kashandukila kuna tetshi uwe.

³⁹Mbisana wakabe asingazibe tjinoshingikala, Jonatani na Dafite bali ibo banoziba.

⁴⁰Jonatani wakapa mbisana zwibhayano zwizwe, kandwa kati, “Yenda, uzwiyise ku nzi.”

⁴¹Kwakati mbisana asinoyenda, Dafite kamilika kudwa ku burwa gwe bgwe kakotamisa nsholo mbeli kwa Jonatani katatu akalinga pasi. Ndizo bakaputana, bakalilidzana, koga Dafite kalila kupinda.

⁴²Ndizo Jonatani kadwa Dafite kati, “Yenda ne mbakiso, tatuna tose bubili gwedu nge zina la Yahwe, ati, Yahwe ba ntendeki pakati kwangu nawe, nenge pakati kwe zwizekugwana zwangu ne zwizekugwana zwizo nge kusingapele.” Ndizo Dafite kamilika kayenda, ngono Jonatani kabgwilila ku nzi.