Read Kalanga 1 Samuele 22 Bible Online

1 Samuele 22 - Kalanga bible

1 Samuele 22

¹Dafite kamilika mu Gati katizhila ku guwu le Adulamu. Kwakati bakulu babe ne ng'umba yose ya tate babe behwa nge kwako, bakadelukila kunli.

²Bose bakabe bakamanikana ne bakabe bana zwikoloto ne bakabe basingagutshike, bakakubunganila kunli ngono kabe ntungamili wabo. Balume bakabe banaye bakabe bangabe mazana manna (400).

³Kudwa ipapo Dafite kayenda ku Mizipha mu Moabu, ngono kadwa mambo we Moabu kati, “Ndokumbila kuti mundibhatile tate na mme, kuswikila ndiziba kuti Ndzimu unowondithamilani.”

⁴Kasiya bazwadzi babe muna mambo we Moabu, bakagala naye tjibaka tjose tjakabe Dafite ali mu dizhilo.

⁵Koga nlebesambeli Gadi kadwa Dafite kati, “Usigale mu dizhilo, milika ungine mu shango ye Juda.” Ndizo Dafite kamilika, kangina mu ishaka tje Hereti.

⁶Ipapo Saulo kahwa kuti Dafite ne balanda babe bakabong'wa. Saulo wakabe ali gele ku Gibiya, kusi kwe ntamarisiki pezhugwi kwe duthu, akabhata thumo lile nge luboko, balanda babe bakabe bali mile bakampoteleka.

⁷Saulo kadwa balanda babe bakampoteleka kati, “Teedzani ngeno, imwi Babhenjamini, apa nkololo wa Jesi unowopa mmwe ne mmwe wenyu shango ne minda ye mizhambi kene? Apa mose unowomuthama balauli be babhayani bali zwiwulu (1 000) ne balauli bali mazana (100) kene?

⁸Ini makazwibumba mose kugwa nami? Akuna ne nng'ompela wakandiluma zebe, ha nkololo wangu ethama tjidumano ne nkololo wa Jesi, ndodwa ne nng'ompela wenyu wakabe ne hanya nami, kundibudza kuti nkololo wangu unokulumbidza Dafite nlanda wangu, kuti andilalile sekwa anothama nasi.”

⁹Koga Doegi we N'edoma, wakabe ali mile ne balanda ba Saulo, kadabila eti, “Ndakabona nkololo wa Jesi paakayenda ku Nobhu kuna Ahimeleke nkololo wa Ahitubhu,

¹⁰Ahimeleki kantembezelela kuna Yahwe, kampa zojiwa, kabuya kampa bukano gwa Goliati we Nfilisitiya.”

¹¹Ndizo mambo katuma bathu kunodana mpirisiti Ahimeleki ne be nsha wa tate babe bose, bapirisiti bakabe bali ku Nobhu, bose bakazha kuna mambo.

¹²Saulo kandwa kati, “Teedza, nkololo wa Ahitubhu.” Kadabila kati, “Ndipano tetshi wangu.”

¹³Saulo kambhuzwa kati, “Hwutini makazwibumba kugwa nami, iwe ne nkololo wa Jesi, wakampa zojiwa ne bukano, ukantembezelela ku Ndzimu, kuti andipandukile, andilalile sekwa athama nasi?”

¹⁴Ndizo Ahimeleki kabhuzwa mambo kati, “Apa ndiani unogalikabgwe sa Dafite mu balanda benyu bose kene? Nkwasha wenyu mambo, nlauli we ntjengeti wenyu, kakale unokudziwa mu ng'umba yenyu?

¹⁵Apa i zhuba le kutanga nasi ndintembezelela mu Ndzimu kene? Ndodwa! Ngakusijalo! Mambo basitilike nlandu mu nlanda wabo, kene mu mmwe webe ng'umba ya tate bangu, ngobe akuna tjandinoziba ngekwe zwithu zose izwezwi, nakuto kuli kungapani.”

¹⁶Mambo kandwa kati, “Ndolebesa unowofa, Ahimeleki, iwe ne be ng'umba ya tate babo bose.”

¹⁷Ndizo mambo kadwa balisi bakabe bali mile bakampoteleka kati, “Shandukani mu bulaye bapirisiti ba Yahwe, ngobe banoma na Dafite, bakaziba kuti wakatizha, ngono bakasitongo ndibudza.” Koga balanda ba mambo bakasimilidze luboko kubabulaya bapirisiti ba Yahwe.

¹⁸Ndizo mambo kadwa Doegi kati, “Iwe Doegi shanduka ubalaye bapirisiti.” Doegi we N'edomu kashanduka kabulaya bapirisiti, mu zhuba ilelo kabulaya bali makumi ali zhanakadzi ana bali bashanu (85) bakabe bakaambala efodi.

¹⁹Kalidza bukano mu Nobhu, nzi nkulu we bapirisiti, katemelela balume ne bakadzi, bana ne ngawana ne ng'ombe dzawo ne madonki ne pkhwizi, kabulaya kose.

²⁰Koga mmwe we bakololo ba Ahimeleki nkololo wa Ahitubhu, unoyi Abiathari, kapudzumuka katizhila kuna Dafite.

²¹Abiathari wakabudza Dafite kuti Saulo wakabulaya bapirisiti ba Yahwe.

²²Dafite kadwa Abiathari kati, “Ndakaziba mu zhuba ilelije, pakabe Doegi we N'edomu ali ikweno, kuti tjoselele unowobudza Saulo. Ndimi ndakazhisila be nsha wa tate babo lufu.

²³Gala nami, usitongotja, ngobe unoshaka kundibulaya, unoshaka bulaya nawe, ngono unowotjidziwa nami.”