Read Kalanga 1 Samuele 24 Bible Online

1 Samuele 24 - Kalanga bible

1 Samuele 24

¹Kwakati Saulo edwa kugwa ne Bafilisitiya, kabudziwa kuyi, “Dafite umu tjilambanyika tje Enegidi.”

²Ndizo Saulo katola balume bali zwiwulu zwili zwitatu (3 000) bakashalugwa kudwa mu Iziraela yose, kunoshaka Dafite ne bathu babe pejo ne Thombo dze Mbudzi dze Shango.

³Saulo kaswika pa matanga e pkhwizi akabe ali pa hwunde ne zila, pakabe kuna guwu, ngono Saulo kangina mukati kazwituma. Ipapo Dafite ne bathu babe bakabe baligele mukatikati kwe guwu.

⁴Bathu ba Dafite bakandwa bakati, “Ele ndilo zhuba lakalebgwa ndi Yahwe bekudwa beti, ‘Ndowokupa tjita tjitjo mu maboko awo, ngono unowoshinga tjaunoda mutjili.’ ” Dafite kanyanga Saulo, katjeka kadusa lipeto gwe tjiambalo tja Saulo asinganhwe.

⁵Shule kwa ipapo, Dafite kadziyidzika mu moyo, ngobe atjeka kadusa lipeto gwe tjiambalo tja Saulo.

⁶Kadwa bathu babe kati, “Yahwe ngabandidzibe kuti ndisi thame kuthu ikoku muna tetshi wangu, nzhodziwa wa Yahwe, ndisitongo mmilidzila luboko, ngobe nzhodziwa wa Yahwe.”

⁷Ndizo nge mahwi iyawa, Dafite katjemela bathu babe kuti basitongobe bakabulaya Saulo. Ndizo Saulo kamilika kabhuda mu guwu, kazwiyendigwazwe.

⁸Shule kwa ipapo Dafite na iyebo kamilika kabhudila kuzhe kwe guwu, kadana Saulo kati, “Tetshi wangu, mambo!” Kwakati Saulo etjebuka shule, Dafite kathigama, kakotamisa nsholo.

⁹Dafite kabhuzwa Saulo kati, “Apa hwutini muteedza makwayi anoti Dafite unoshaka kumubulaya kene?”

¹⁰Nasi mesho enyu abona sekwa Yahwe babe bamundipa mu maboko muli mu guwu, ene bamwe babe bendidwa beti ndimubulaye, koga amuletjedza. Abe nditi, “Andingamilidzile tetshi wangu luboko, ngobe nzhodziwa wa Yahwe.

¹¹Bonani, tate, bonani ndakabhata mpeto we tjiambalo tjenyu nge luboko, malebeswa ndianoti ndatjeka mpeto we tjiambalo tjenyu, koga asimubulaye, mungabona kuti lebeswa lose ndelinoti andina bubi kene bupanduki mu maboko angu. Andizomutjinyila, koga moshwa mundivima mushaka kundibulaya.

¹²Yahwe ngabathubukanye pakati kwangu namwi! Yahwe ngabamubgwilize zwamakandithama, koga andingafe ndamulonga gwangu luboko.

¹³Sekwa bakulukugwe bakati, ‘Bubiibi godwa mu mishingo mibibi,’ koga andingamubhate nge gwangu luboko.

¹⁴Apa mambo we Iziraela wabhudila ani itethela kene? Apa makatobelela ani kene? Apa makatobelela mbgwa yakafa kene? Kene makatobelela butata?

¹⁵Ndizo Yahwe ngababe ibo nsumikilisi, batiangulanye imi namwi. Banowolinga bakatola thambo nge kwangu, bandigwile nge kundisunungula mu muli.”

¹⁶Kwakati Dafite epedza kulebeleka na Saulo, Saulo kabhuzwa kati, “Apa hwi ileli ndelilo kene, nkololo wangu Dafite?” Saulo kadila guwo.

¹⁷Saulo kadwa Dafite kati, “Wakayengemala kundipinda, wandishingila ndulamo, ipapa imi ndakuthamila mbipo.

¹⁸Utjadwa pandibudza ndulamo yawandithamila, Yahwe babe bandilonga mu maboko awo, koga auzondibulaya.

¹⁹Apa ndiani ungati awana tjita, katjiletjedza tjiyenda asingatjibulaye kene? Ndizo Yahwe bakupe mbhayilo mbuya, muna sekwa wathama mu ndili nasi.

²⁰Ndoziba kuti tjoselele unowobe mambo, ne kuti mbuso we Iziraela unowolumbidziwa uli mu maboko awo.

²¹Ndizo tuna ndi Yahwe mbeli kwangu, kuti autobulaya tjizekugwana tjangu kene kubukusha zina langu kulidusa mu ng'umba ya tate bangu kene.”

²²Ndizo Dafite katuna mbeli kwa Saulo. Saulo kabgwilila kanyi, koga Dafite ne bathu babe bakatathila pezhugwi ku matizhilo.