Read Kalanga 1 Samuele 25 Bible Online

1 Samuele 25 - Kalanga bible

1 Samuele 25

¹Ipapo Samuele kafa, Baiziraela bose bakakubungana bakanlilila. Bakambiganyila mu nzi uwe mu Rama. Ipapo Dafite kamilika kadelukila ku tjilambanyika tje Parani.

²Kwakabe kuna nlume ku Maoni, ana thundu iye ku Karimeli, akabe akafuma kwazo, akathuwa pkhwizi dzili zwiwulu zwili zwitatu (3 000) mbudzi dzili tjiwulu tjing'ompela (1 000). Wakabe eteselela pkhwizi dzidze mu Karimeli.

³Zina lile lakabe liyi Nabhali, zina le nkadzi uwe kuyi Abigaile. Ali nkadzi mbuya wakatjenjela, koga nlume wakabe ana moyo wakabipa asina buthu, wakabe ali Nkhalibhi.

⁴Kukati Dafite ali mu tjilambanyika kahwa kuyi Nabhali unotesela pkhwizi dzidze.

⁵Ndizo Dafite katuma bazhuzha bali gumi, kabadwa kati, “Tathilani ku Karimeli kuna Nabhali, muswike mundidumilisile iye.

⁶Ha mundumilisa muti, ‘Mbakiso ngaibe namwi, ibe nenge nsha wenyu, nenge zose zwamunazo.’

⁷Ndiko ndihwa kuyi nsi we kutesegwa kwe pkhwizi, ngono takabe tina balisi be pkhwizi dzenyu, atizotongo badziyidza, akuna tjakabamilila tjibaka tjose tjabakabe bali mu Karimeli.

⁸Mubabhuzwe, banowomubudza. Tazha nge zhuba le nzano, ngono Dafite wamukumbila kuti mutibhate nge maboko mabili. Wakumbila kuti mupe balanda benyu ne nkololo wenyu Dafite tjamungabe munatjo.”

⁹Kwakati balanda ba Dafite baswika, bakaleba sekwa batumwa ndi Dafite. Ndizo bakalinda.

¹⁰Koga Nabhali kashandula balanda ba Dafite eti, “Apa Dafite ndiani kene? Nkololo wa Jesi iwoyu ndiani? Balanda banjinji mazhuba iyawa banonyeluka botetshi babo.

¹¹Apa ndingatola tjiwunga tjangu ne vula yangu, ne nyama yandabhayila bateseli be pkhwizi dzangu, ndipa bathu bandisingazibe kuti banodwa ngayi beyenda ngayi kene?”

¹²Ndizo balanda ba Dafite bakashanduka bakabgwilila, bakaswika bakabikila Dafite matama wose iyawa.

¹³Dafite kadwa balanda babe kati, “Nlume mmwe ne mmwe ngadedele bukano gugwe!” Mmwe ne mmwe wabo kadedela bukano gugwe, Dafite na iyebo kadedelabo gugwe, ndizo balume bangabe mazana manna (400), bakamilika na Dafite, bali mazana mabili (200) bakasala bakalinda thundu.

¹⁴Ngono mmwe we balanda kabudza Abigaile nkadzi wa Nabhali eti, “Dafite wakatuma balanda kudwa mu tjilambanyika kuwodumilisa tetshi wedu, ngono babashanganidza nge masapa.

¹⁵Ipapa balume ibaba bakabe bakatilulamila kwazo, abazotongo tidziyidza, nenge nako dzose tili mu shango pejo nabo akuna tjakatongo timilila.

¹⁶Takabe takalisa pkhwizi dzedu tili pejo nabo, bakatibakilila siku ne sikati.

¹⁷Ndizo ngwenu kumbulani mu bone kuti mungathamani, ngobe kungadwa kukabe mbatsha muna tetshi wedu na bose be nsha uwe, ngoti iye nthu una moyo wakabipa kwazo, akuna nthu ungalebeleka naye.”

¹⁸Ndizo Abigaile kalibilidza katola zwiwunga zwili mazana mabili (200), makukhwa mabili e nkumbi we zhambi, pkhwizi dzili shanu dzakashashikwa, makabha mashanu ye mathunde akakangiwa, thabi dzili zana (100) dze zhambi dzakawanikiwa ne makhekhe e phaya ali mazana mabili (200). Kazwibelesa mu madonki.

¹⁹Kadwa bazhuzha babe kati, “Munditungamile, ndomusala shule.” Koga kasitongobudza nlume uwe Nabhali.

²⁰Kwakati ekunguluka ali pezhugwi kwe donki, atjisitigwa nge dombo, kashangana na Dafite ne bathu babe bedelukila kunli, ngono kabashangamidza.

²¹Ipapo Dafite kalebeleka eti, “Tjoselele kwakabe masimba malashe, kose kwandakatjengeta mu tjilambanyika, kwe nthu iwoyu, ngobe akuna tjakamila tja zose zwaakabe anazo, koga mu bubuya gwandakanthamila igo, wandilipa nge mbipo.

²²Ndzimu undilobe upaphulula, ha lingati mangwana libhuda, abe ndasiya nng'ompela we tjilume etjila, we balanda babe bose.”

²³Kwakati Abigaile ebona Dafite, kalibilidza kadeluka donki, kawila pasi nge zwidwi mbeli kwa Dafite akakotamisa nsholo.

²⁴Kawila pa makumbo a Dafite kandwa kati, “Tetshi wangu, nlandu ube mu mathudzi angu, nlanda wenyu unokumbila lebeleka namwi, ngono muteedze tjinowobe tjilebgwa nge nlanda wenyu.

²⁵Tetshi wangu, musitongo tobelela nthu iwoje we meya mbi Nabhali, mbimbi seleba kwe zina lile Nabhali, kudwiwa kuti tjilengwe, bulengwe gumunli, koga imi, nlanda wenyu, andizobe ndabona balanda ba tetshi wangu, bamakatuma.

²⁶Ngono ngweno tetshi wangu, ndotuna ndi Yahwe banotjila, nanga namwi, sekwa Yahwe bamudziba mu kutebula malopa ne kuzwibgwilizila nge maboko enyu, tjiletjedzani zwita zwenyu na bose banoshaka kumuthamila mbipo bafanane na Nabhali.

²⁷Ngono ngwenu amutjilani tjipo etji, tjazhisiwa nge nlandakadzi wenyu, tetshi wangu, kuti tjipiwe balanda bakasala shule tetshi wangu.

²⁸Ndomukumbila muzwiibhatigwe nlandu we nlandakadzi wenyu, ngobe Yahwe nge malebeswa banowopa tetshi wangu bushe gusingapele, ngobe mobhayana ngwa dza Yahwe. Akusiwanike mbipo mu muli mu butjilo gwenyu gose.

²⁹Nakuto kuna mmwe angamutobelela eshaka kumubulaya, tetshi wangu, butjilo gwa tetshi wangu gowowang'wa pakati kwe batjili, mu maboko a Yahwe Ndzimu wenyu. Koga Yahwe banowopaladza butjilo gwe zwita zwenyu se mabgwe anoposiwa edwa mu tjivirimabgwe.

³⁰Ha Yahwe basinothamila tetshi wangu kuyendidzana ne ndulamo yose yabakaleba nge kwenyu, bamubiga mbusi we Iziraela,

³¹tetshi wangu abatowobe ne kuhwa zogwadza kene tjibhayo mu moyo, tje nlandu we kutebula malopa mwaza kene kuzwitjidza nge kwabo. Ngono ha Yahwe bathama kuti mutubule tetshi wangu, mukumbule nlandakadzi wenyu.”

³²Dafite kadwa Abigaile kati, “Ngakukudziwe Yahwe, Ndzimu we Iziraela, bakutuma kuwoshangana nami nasi.

³³Ngakukudziwe nkumbulo uwo, ukombolegwe iwe, wandidziba mu kutebula malopa ne mu kuzwibgwilizila nge luboko gwangu.

³⁴Ndolebesa ndotuna ndi Yahwe Ndzimu we Iziraela banotjila, ibo bandidziba mu kukukubadza, ha wabe usatjimbidza ukandishanganidza, ndolebesa kwabe kowoti mangwanana kukabe kusina ne ng'ompela we tjilume wasalila Nabhali etjila.”

³⁵Ndizo Dafite kaamutjila mu luboko gugwe tjaakabe anzhila, ngono kandwa kati, “Yenda ku nzi uwo nge mbakiso, bona, ndahwa tjawaleba, ngono ndaamutjila kukumbila kuko.”

³⁶Kwakati Abigaile eswika kuna Nabhali, kawana akabhata nzano mu ng'umba iye, unonga wa mambo, wakabe ebilima, akalaladza kupinda tjilizanyo. Koga kasindwe tjimwe kuswikila tjimuka kwayedza.

³⁷Ndizo kukati tjimuka budakwa gwapela muna Nabhali, nkadzi uwe kambudza zwithu izwezwi, moyo uwe ukama, kawoma se danda.

³⁸Shule kwe mazhuba angabe gumi, Yahwe bakaloba Nabhali, kafa.

³⁹Kwakati Dafite ehwa kuti Nabhali wakafa, kabe eti, “Ngakukudziwe Yahwe bakasumikilisa ndebo ye sapa la Nabhali laakandituka, ngono bakadziba nlanda wabo mu mbipo, Yahwe bakabgwilizila zwiyito zwakabipa zwa Nabhali mu nli.” Ndizo Dafite katuma nthu kun'shakila Abigaile, kuti abe nkadzi uwe.

⁴⁰Balanda ba Dafite bakayenda kuna Abigaile ku Karimeli bakaswika bendwa beti, “Tatumwa ndi Dafite kumuli kuti tomutola kunobe nkadzi uwe.”

⁴¹Abigaile kamilika kakotamisa nsholo, kabe eti, “Nlandakadzi wenyu upano, wazwimisila kumushingila ne kungudza makumbo e balanda ba tetshi wangu.”

⁴²Abigaile kamilika tjinyolotjo kayenda akatatha donki, kanokotosiwa nge balandakadzi babe bali bashanu, kayenda ali shule kwe batumwa ba Dafite, kanobe nkadzi uwe.

⁴³Dafite wakabe akalobola Ahinoamu we Jezerele, ngono bose nge bubili bakabe bakadzi babe.

⁴⁴Koga Saulo wakabe akoba nkololokadzi uwe Mikhali wakabe ali nkadzi wa Dafite, anlobodza Palitiele nkololo wa Laishe wakabe edwa ku Galimu.