Read Kalanga 1 Samuele 27 Bible Online

1 Samuele 27 - Kalanga bible

1 Samuele 27

¹Dafite kazwidwa kati, “Limwe le mazhuba iyawa ndowofila mu maboko a Saulo. Tjingandibhatsha hwuti nditizhile ku shango ye Bafilisitiya. Ndiko Saulo kwaangatoboka kundishaka pamwe ne pamwe mu Iziraela, ndibuya ndimpudzumuka mu maboko.”

²Ndizo Dafite kamilika kayenda, kuna Mambo Akhishi nkololo wa Maokhi we Gati, ana balume bali mazana ali matathatu (600).

³Dafite ne balanda babe bakagala na Akhishi ku Gati. Nlume mmwe ne mmwe wakabe ana nsha uwe na Dafite ana bakadzi babe babili: Ahinaomu we Jezerele na Abigaile we Karimeli tjilikadzi ya Nabhali.

⁴Kwakati Saulo asinobe abudziwa kuti Dafite wakatizhila ku Gati, kaletjedza kunvima.

⁵Ndizo Dafite kadwa Akhishi kati, “Ha ndiamutjilika mu mesho enyu, ndokumbila kuti mu ndiwanile pandingagala mu imwe ye mizi ye shango yenyu, kuti ndizwigaligwepo. Apa nlanda wenyu ungagalatjini namwi mu nzi we bushe?”

⁶Mu zhuba ilelo Akhishi kampa Zikilagi, ndizo Zikilagi ukabe nzi wa bomambo be Juda kuswikila nasi.

⁷Dafite wakagala mu shango ye Bafilisitiya gole lina mimwedzi ili minna.

⁸Ndizo Dafite ne bathu babe bakayenda bakanonginilila Bageshu, Bagirazi ne Baamaleki. Kudwa ntolo zwitjaba izwezwi zwakabe zwigala mu shango ye Shuwu ne kunoti ku Egipiti.

⁹Kwakabe kuti Dafite enginilila pathu, esiya kusina nlume kene nkadzi unotjila, ebe etapa pkhwizi ne ng'ombe ne madonki ne kamela nenge zwiambalo. Ebe ebgwilila ku Akhishi.

¹⁰Kwakabe kuti Akhishi embhuzwa eti, “Nasi manonginilila ngayi kene?” Dafite wakabe edabila eti, “Ku Negebu kwe Juda kene ku Negebu kwe Bajeramiyeli kene Negebu kwe Bakeni.”

¹¹Dafite akuna waakasiya kuli nlume kene nkadzi etjila kuti azhe naye ku Gati, ngobe wakabe ekumbula kuti bangadwa benotibudzilila beti, “Dafite wakathama etji na etji!” Ikoku ndiko sekwa akabe ethama mu misi yose yaakabe egala mu shango ye Bafilisitiya.

¹²Akhishi wakabe egalabgwe Dafite, ebuya ezwidwa eti, “Wakazwibenganya ne bakanyi kwabo, Baiziraela, sa ikoku, unowogalila tjose ali nlanda wangu nge kusingapele.”