Read Kalanga 1 Samuele 28 Bible Online

1 Samuele 28 - Kalanga bible

1 Samuele 28

¹Mu mazhuba iyawo, Bafilisitiya bakakubunganya babhayani babo kunobhayana ne Iziraela. Akhishi kadwa Dafite Kati, “Wakafanila ziba kuti iwe ne bathu babo moshanganyila nami mu ikwata.”

²Dafite kashandula eti, “Imwi ndimwi monowobona kuti nlanda wenyu ungathamani.” Akhishi kan'dabila eti, “Kwakalulwama, iwe ndokuthama ntjengeti wangu butjilo gugo gose.”

³ Ipapo Samuele wakabe afa, ngono Baiziraela bose bakan'galila tjililo, bakambiganya mu Rama nzi kanyi kwabo. Saulo wakabe atata banodana badzimu ne ng'anga dzinokandila mu shango.

⁴Bafilisitiya bakakubungana bakathibelela ku Shunemu, Saulo kakubunganya Baiziraela bose, bakathibelela ku Gilibhowa.

⁵Kwakati Saulo ebona babhayani be Bafilisitiya, katja, moyo uwe ukazhala lutjo.

⁶Kabhuzwa kuna Yahwe, Yahwe bakasitongo n'dabila, nakuto kuli nge hwope kene Urimu kene nge balebesambeli.

⁷Ndizo Saulo kadwa bashingili babe kati, “Mundishakile nkadzi unolebeleka ne badzimu, kuti ndizo ndiyende kunli ndinombuzwa.” Bankandwa bakati, “Kuna mmwe ku Enidori.”

⁸Ndizo Saulo kazwishandula mbumbiko, kaambala zwiambalo zwipoga, busiku katola balume babili kayenda nabo ku nkadzi iwoyo. Kandwa kati, “Undidanile badzimu, undimusile wandinowodana nge zina.”

⁹Koga nkadzi kan'dabila eti, “Nge malebeswa moziba tjakathamwa ndi Mambo Saulo. Bakatata bose banodana badzimu ne ng'anga dzinokandila mu shango. Hwutini munditshila gwanga munditeela kuti ndibulawe kene?”

¹⁰Saulo katuna ndi Yahwe, kandwa kati, “Ndolebesa ndotuna ndi Yahwe banotjila, aungalobgwe shamu ngekwe kuthu ikoku.”

¹¹Ndizo nkadzi kabhuzwa kati, “Ngono ndowomumusila ani kene?” Kan'dabila eti, “Undimusile Samuele.”

¹²Kukati nkadzi ebona Samuele, kalila ekuila pezhugwi, ngono kadwa Saulo kati, “Apa hwutini manditjebela kene? Imwi Mambo Saulo!”

¹³Mambo kandwa kati, “Usitje. Unobonani?” Nkadzi kadabila eti, “Ndobona ndzimu uzhuzhulukila pezhugwi udwa pasi.”

¹⁴Kambhuzwa kati, “Mbumbiko yayo yakatini kene?” Nkadzi kandwa kati, “Nthuntana wakambala hazu.” Ndizo Saulo kaziba kuti ndi Samuele, kakotamisa nsholo kalinga pasi.

¹⁵Samuele kadwa Saulo kati, “Apa hwutini wandidziyidza nge kundimusa kene?” Saulo kadabila eti, “Ndimu manikano hwulu kwazo, Bafilisitiya banogwa nami, ngono Ndzimu wakandifupatila kakale autjandidabila, kene kuli nge balebesambeli kene nge hwope. Ndizo ndamudana kuti mundibudze tjandingathama.”

¹⁶Samuele kandwa kati, “Ini wandidana ngwenu Yahwe batjikufupatila bakakushandukila babe tjita tjitjo kene?

¹⁷Yahwe bathama sekwa bakaleba beti ndikubudze, kuti bapaladza mbuso mu maboko awo, ngono baupa mmwe we zwikamu zwizo, baupa Dafite.

¹⁸Ngobe auzohwilila hwi la Yahwe, kene kushingikadza bushongola gwabo mu Bamaleki, ngono nasi, Yahwe bathama kuthu ikoku mukuli.

¹⁹Yahwe banokulongelanya ne Iziraela mu maboko e Bafilisitiya, ngono mangwana iwe ne bakololo babo mowobe munami. Yahwe banowolongelanya ne ikwata tje Iziraela mu maboko e Bafilisitiya.”

²⁰Tjinyolotjo Saulo kawa katandabala pasi, katja kwazo, etjisiwa nge matama a Samuele. Wakapelegwa nge simba ngobe wakabe ashwa kakale kalala kusina tjaaja.

²¹Kukati nkadzi ezha kuna Saulo, kati ebona kuti unotetema kwazo, kati kunli, “Bonani, nlandakadzi wenyu wakamuteedza, ndalonga butjilo gwangu mu mbatsha, ngothama tjamati ndithame.

²²Ngono ngwenu, tjiteedzani nlandakadzi wenyu, imani ndimupe zojiwa muje, kuti muwane simba muzwiyendigwe zwenyu.”

²³Kalamba kandwa kati, “Andingaje.” Koga balanda babe bakabhatsha nkadzi iwoyu bakantshindilila, ngono kabateedza, kamuka pasi kagala tjigalo tje mapobepobe.

²⁴Nkadzi wakabe ana ikondolo tjakakodziwa mu nzi uwe, katjibhaya tjinyolotjo, katola bgwisa gwe tjiwunga, kaguvanga kabhika tjiwunga tjisina mbidzo.

²⁵Kazwibiga mbeli kwa Saulo ne balanda babe, bakaja. Ndizo bakamilika bakayenda busiku igogu.