Read Kalanga 1 Samuele 3 Bible Online

1 Samuele 3 - Kalanga bible

1 Samuele 3

¹Mbisana Samuele wakabe eshingila Yahwe ali pasi kwa Eli. Mu misi iyeyo dama la Yahwe lakabe lisingahwiwe hwiwe koga, ne mibono yakabe isakawanda.

²Mu tjibaka itjetjo Eli wakabe asingatjabonesese mesho awe abe ne lidandi, wakabe alilele mu ng'umba iye.

³Luvone gwe Ndzimu gwakabe gusathu gukadzima, ngono Samuele wakabe alilele mu Ng'umba ya Yahwe, kwakabe kuna Bhokisi le Tjidumano tje Ndzimu.

⁴Ipapo Yahwe bakadana Samuele, Samuele kadabila eti, “Ndipano.”

⁵Kalabukila kuna Eli kaswika eti, “Ndipano, mandidana.” Koga Eli kandwa kati, “Andizotongo dana, bgwililazo unoizela.” Ndizo kayenda kanoizela.

⁶Yahwe bakadana kakale bakati, “Samuele!” Ngono Samuele kamuka kayenda kuna Eli kaswika kandwa kati, “Ndabuya mandidana.” Eli kandwa kati, “Andizotongodana nkololo wangu bgwililazo unoizela.”

⁷Mu tjibaka itjetjo Samuele wakabe asathu kaziba Yahwe, ngobe dama la Yahwe wakabe asathu kalizumbunuligwa.

⁸Yahwe bakadana Samuele kakale gwe butatu. Samuele kamuka kayenda kuna Eli, kaswika kandwa kati, “Ndabuya mandidana.” Ndizo Eli kabona kuti Yahwe bakabe bedana mbisana.

⁹Ipapo Eli kandwa kati, “Bgwilila unoizela, ngono ha ungahwa bekudana kakale udabile uti, ‘Lebelekani zwenyu Yahwe, nlanda wenyu wakateedza.’ ” Ndizo Samuele kabgwilila kanoizela ku bulalo gugwe.

¹⁰Yahwe bakazha bakama ipapo, bakadana kakale, sekwa batongodana, “Samuele! Samuele!” Samuele kadabila eti, “Lebelekani zwenyu nlanda wenyu wakateedza.”

¹¹Ipapo Yahwe bakadwa Samuele bakati, “Bona, ndi pejo ngothama tjimwe tjithu mu Iziraela, tjinowothama kuti zebe dze mmwe ne mmwe unotjihwa unowolobgwa nge hana.

¹²Mu zhuba ilelo ndowothamila Eli zose zwandakaleba ngekwe nsha uwe, kudwa mu kutangisa kunoti ku bupelo.

¹³Ngono ndombudza kuti ndi pejo ngoloba nsha uwe nge kusingapele, ngekwe jinyo laanoziba, bakololo babe bakabe betuka Ndzimu, ngono kasitongo batjemela.

¹⁴Ndizo ndotuna nditunila nsha wa Eli nditi jinyo le nsha wa Eli alingalipigwe nge tjibhayilo kene kudusa tjipo nge kusingapele.”

¹⁵Samuele wakaizela kuswikila mangwanana, ndizo kazhula mikoba ye Ng'umba ya Yahwe. Samuele wakabe etja kubudza Eli mbono.

¹⁶Koga Eli kadana Samuele kati, “Samuele nkololo wangu.” Samuele kadabila eti, “Ndipano.”

¹⁷Eli kambhuzwa kati, “Apa Yahwe balala bakudwani kene? Usindisumbikile itjo. Ndzimu ngaukulobe, ha ungandisumbikila tjimwe ne tjimwe tjawalala wakubudza.”

¹⁸Ndizo Samuele kambudza tjimwe ne tjimwe, kukasibe ne tjaanonsumbikila. Iye kabe eti, “Ndibo Yahwe, ngabathame sekwa kungabe kwakabalulwamila.”

¹⁹Samuele kakula, Yahwe banaye, ngono abazotongo thama kuti kube ne matama abo angawila pasi.

²⁰Ndizo Iziraela yose, kudwa ku Dani kunoti ku Bheerisheba ikaziba kuti Samuele nlebesambeli wa Yahwe.

²¹Yahwe bakadwilila bezwilakidza ku Shilo, ngono Yahwe bakazwilakidza kuna Samuele nge dama labo.