Read Kalanga 1 Samuele 30 Bible Online

1 Samuele 30 - Kalanga bible

1 Samuele 30

¹Dafite ne balanda babe bakaswika ku Zikilagi mu zhuba le butatu. Baamaleki bakabe banginilila Negebu ne Zikilagi. Bakabe banginilila Zikilagi bepisa,

²bakatapa bakadzi na bose bakabe bali muili, bose batukununu ne bakulukulu, kusina wababulaya, koga bakabatapa bakayenda nabo.

³Kwakati Dafite ne balanda babe beswika ku Zikilagi, bakawana wakapisiwa nge moto ne bakadzi babo ne bakololo ne bakololokadzi babo bakatapiwa.

⁴Ndizo Dafite ne balanda babe bakalilila pezhugwi, kuswikila bepelegwa nge simba le kulila.

⁵Bakadzi ba Dafite nge bubili, Ahinoami we Jezerele na Abigaile tjilikadzi ya Nabhali we Karimeli, bakabe batapiwabo.

⁶Dafite wakabe ali mu mbatsha dzisishoma, ngobe bathu beti banonlikitidza nge mabgwe, mmwe ne mmwe akadzipikana ngekwe bakololo ne bakololokadzi babe. Koga Dafite kawana simba muna Yahwe Ndzimu uwe.

⁷Dafite kadwa mpirisiti Abiathari nkololo wa Ahimeleke kati, “Undipe tjiambalo tje bupirisiti.” Abiathari kampa itjo.

⁸Dafite kabuzwa muna Yahwe kati, “Apa ndingatobela goko ileli kene? Apa ndonolibhata kene?” Yahwe bakashandula beti, “Ulitobele unowonolibhata, ukatubula kubasunungula.”

⁹Ndizo Dafite wakamilika ne balume bali mazana ali tathatu, bakaswika ku Bheza Ravine, pakabe bamwe basala shule.

¹⁰Dafite kadwilila nge gwendo ne balume bali mazana manna (400), ngobe bali mazana mabili (200) bakasala bakong'wa ngotjuluka Bheza banyala kwazo.

¹¹Balume bakabe bana Dafite bakawana nzhuzha we N'egipiti mu shango bakantola bakan'yisa kuna Dafite, bakampa zojiwa kaja ne vula kang'wa.

¹²Bakampa gwamu le phaya dzakakobogwa ne zhambi dzakawanikiwa kaja kazibunuka, ngobe wakabe ana mazhuba matatu ne masiku matatu asingawane zojiwa kene vula.

¹³Dafite kambhuzwa kati, “U nlanda waani, unodwa ngayi?” Kashandula eti, “Ndi N'egipiti, nlanda we N'amaleki. Tetshi wangu wakandilasha ngobe ndakabe ndagwala mazhuba matatu akapinda.

¹⁴Takanginilila Negebu kwe Bakerethiya ne ntuthu we Juda ne Negebu kwe Khalibhi, tikabuya tikapisa Zikilagi.”

¹⁵Dafite kambhuzwa kati, “Apa unganondilakidza goko ileli kwaliyako kene?” Ngono nzhuzha kadabila eti, “Ha mungatuna mbeli kwe Ndzimu, kuti amungandibulaye kene amungandipe tetshi wangu, ndinganomuyisa ku goko ileli.”

¹⁶Wakatungamila Dafite kanonswikisa ku bali, bakabawana bakaandama ne shango yose, beja beng'wa, bezana, ngobe bakabe bakashathila bukulu gwe thundu yabakatapa mu shango ye Bafilisitiya ne mu Juda.

¹⁷Dafite kagwa nabo kababulaya kudwa mangwanana kuyedza kuswikila tjimuka madekwana, ngono akuna wabo wakapudzumuka, kuzhe kwe bazhuzha bali mazana manna (400) bakatatha kamela bakatizha.

¹⁸Dafite kadzutunula kose kwakabe kwatogwa nge Baamaleki, kose ne bakadzi babe nge babili.

¹⁹Akuna tjakasheteka, tjitukununu kene tjikulu kulu, balisana kene baanadi, zwakabe zwatapiwa keneni tjakabe tjatogwa, Dafite wakabuya nazo zose.

²⁰Dafite wakadzutunula zose ngubi ye pkhwizi ne ng'ombe, bathu babe bakatakula zwithuwo mbeli kukwe, beyenda beti, “Eyi, i thundu ya Dafite yakabe yatapiwa.”

²¹Ndizo Dafite kaswika ku balume bali mazana mabili (200) bakabe bakakong'wa nge kuyenda naye bakasala pa Bheza Ravine banyala kwazo. Balume ibabo bakabhuda bakanshanganidza Dafite ne bathu baakabe anabo. Kukati Dafite ne balanda babe beswika koga, kabadumilisa.

²²Koga bathu bose be meyambi ne basi be tjimwe bamwe be batobeli ba Dafite bakabe beti, “Ngobe ibaba abazobe bayenda naswi, atitowokobana nabo zwakatapiwa zwatakadzutunula, kuzhe kwekuti nlume mmwe ne mmwe atole nkadzi uwe ne bana babe ayende.”

²³Dafite kashandula eti, “Akuzojalo bakololo ba tate bangu, amuzofanila thama muijalo ngekwe zwatapiwa ndi Yahwe. Bakatitjengeta bakathama kuti tikunde ikwata tjakabe tjatinginilila.

²⁴Apa ndiani unowoteedza tjamunoleba kene? Gobe le nthu wakasala akalinda thundu lolizana ne nthu wakayenda ku ngwa. Bose banowokobana nge ndizanyo.”

²⁵Kudwa mu zhuba ilelo Dafite kakuthama kukabe nlayo ne yendiso mu Iziraela kuswikila nasi.

²⁶Kwakati Dafite eswika ku Zikilagi, katumilila zwimwe zwe zwakatapiwa ku bazwalani babe, batungamili be Juda kabadwa kati, “Ndamupa tjipo etje, kudwa muna zwakatapiwa mu zwita zwa Yahwe.”

²⁷Etumilila kuna bakabe bali ku Bhetele ne Ramoti ne Negebu ne Jatiri,

²⁸ne kuna bakabe bali ku Aroeru ne Sifumothe ne Eshitemoa,

²⁹ne ku Rakali ne kuna bakabe bali mu mizi ye Bajeramiyeli ne Bakeni,

³⁰ne kuna bakabe bali ku Horima ne Bhori Ashani ne Athaki

³¹ne ku Heburoni ne kuna bakabe bali ku magalo wose kwakabe Dafite ne bathu babe besoyendaboko.