Read Kalanga 1 Samuele 5 Bible Online

1 Samuele 5 - Kalanga bible

1 Samuele 5

¹Kwakati Bafilisitiya batapa Bhokisi le Tjidumano tje Ndzimu, bakalitola mu Ebheneza bakanoliyisa ku Ashidodi.

²Ndizo Bafilisitiya bakatola Bhokisi le Tjidumano tje Ndzimu bakanolilonga mu ng'umba ya Dagoni bakalibiga pa hwunde na Dagoni[2]

³Kwakati tjimuka mangwanana bathu be Ashidodi bemuka, bakawana Dagoni iwoyo, akawa nge buso mbeli kwe Bhokisi le Tjidumano tja Yahwe. Ngono bakatola Dagoni bakambgwiliza pa bugalo gugwe.

⁴Koga bakati bemuka tjimuka bakawana Dagoni iwoyo, akawa nge buso mbeli kwe Bhokisi le Tjidumano tja Yahwe, ngono nsholo wa Dagoni ne maboko awe wose zwakathubugwa zwili pa tjirepuli tje nkoba we ng'umba, kwasala mbili uwe koga.

⁵Ndizo wali bapirisiti ba Dagoni na bose banongina mu ng'umba ya Dagoni basingatshambe tjirepuli tja Dagoni ku Ashidodi na nasi.

⁶Shamu ya Yahwe yakalemela bathu be Ashidodi ne kupoteleka, kakale bakabatjisa ne kubalonga bugwele gwe malonda.

⁷Kwakati bathu be Ashidodi bebona tjinoshingikala, bakati, “Bhokisi le Tjidumano tje Ndzimu we Iziraela alizofanila gala naswi, ngobe watiloba shamu inogwadza ne ndzimu wedu Dagoni.”

⁸Ndizo bakadana boshe bose be Bafilisitiya, bakababhuzwa beti, “Apa tingathamani nge Bhokisi le Tjidumano tje Ndzimu we Iziraela kene?” Ngono bakashandula beti, “Bhokisi le Tjidumano tje Ndzimu we Iziraela ngalifulusigwe ku Gati.” Ndizo bakafulusila Bhokisi le Tjidumano tje Ndzimu we Iziraela ku Gati.

⁹Koga bakati baliyisa ku Gati, Yahwe bakaloba nzi iwoyo nge shamu, bakazhisa kutja kukulu kwazo, bakaloba bathu be nzi iwoyo, bose bakulu ne batjetjana bakabhudiwa nge malonda.

¹⁰Ndizo bakatumila Bhokisi le Tjidumano tje Ndzimu ku Ekironi. Kwakati Bhokisi le Tjidumano tje Ndzimu liswika mu Ekironi, bathu be Ekironi bakalila beti, “Bazhisa Bhokisi le Tjidumano tje Ndzimu ku tili kutibulaya ne bakanyi kwedu.”

¹¹Ndizo bakadana batungamili bose be Bafilisitiya bakabadwa bakati, “Bgwilizani Bhokisi le Tjidumano tje Ndzimu we Iziraela, ngalibgwilile kanyi kwalo, lisitongo dwa litibulaya ne bakanyi kwedu.” Bakajalo ngobe nzi wose wakabe utetema nge lufu. Shamu ye Ndzimu yakabalemela kwazo ipapo.

¹²Bakasala pafa bakabhudiwa nge malonda, ngono bakalilila midzimu yabo.