Read Kalanga 1 Samuele 6 Bible Online

1 Samuele 6 - Kalanga bible

1 Samuele 6

¹Bhokisi le Tjidumano tja Yahwe lakagala mu shango ye Bafilisitiya mwedzi ili kutendeka.

²Ndizo Bafilisitiya bakadana bapirisiti ne ng'anga bakababhuzwa bakati, “Apa tithameni nge Bhokisi le Tjidumano tja Yahwe kene? Mutibudze kuti tingalibgwiliza neni kanyi kwalo.”

³Bakadabila beti, “Ha mubgwiliza Bhokisi le Tjidumano tje Ndzimu we Iziraela musitongo libgwiliza lisina tjalinatjo, koga sekwa mungatubula mulibgwilize kuuli ne tjibhayilo tje nlandu. Ndizo mowopodziwa, ngono mowoziba kuti ini Yahwe babe basingashanduse shamu yabo mu muli.”

⁴Bafilisitiya bakabhuzwa bakati, “Apa ini tjatingayisa ku bali tjili tjibhayilo tje nlandu kene?” Bakashandula beti, “Malonda mashanu e golide ne mbeba dzili shanu dze golide, kuyendidzana ne mbalo ye batungamili be Bafilisitiya, ngobe tjiga tjakamushingikalila mose ne batungamili benyu.

⁵Ndizo bumbani zwifano zwe malonda yenyu ne zwifano zwe mbeba dzenyu zwinotjinya shango, ngono muyise gudzo ku Ndzimu we Iziraela, pamwe swiyo banowoshandusa shamu yabo mu muli ne mu midzimu yenyu ne mu shango yenyu.

⁶Apa ini mungakukutadza moyo yenyu se Baegipiti na Faro bakakukutadza moyo yabo kene? Apa akuzoti shule kwe Ndzimu usinothama makaabadzo, bakaletja Baiziraela bakayenda, apa abazoyenda kene?

⁷Ngono ngwenu lulwamisani kara tshwa ne ng'ombe mbili dzinokamiwa dzili dzisakatongo tilikwa jokwi, mudzisunge mu kara koga mudzithubukanye ne phulu dzadzo mudziyise kanyi.

⁸Tolani Bhokisi le Tjidumano tja Yahwe mulilonge mu kara, ngono zwifano zwe golide zwamunoyisa ku Iziraela zwili tjibhayilo tje nlandu, muzwilonge mu bhokisi mulibige pahwunde yalo. Ndizo mulitumile kuti liyende loga.

⁹Ngono mulilinge, ha lingatobela zila inoyenda ku shango yalo lakalinga ku Bhetishemeshi, ndizo kulobgwa shamu kunogwadza zwingapa towobe takakuthamigwa ndi Yahwe. Koga ha kusakajalo, towoziba kuti ate shamu yabo yakatiloba, ngono tjiga tjakatiwilabo koga.”

¹⁰Bathu bakathama beijalo, bakatola ng'ombe mbili dzinokamiwa bakadzisunga mu kara, ngono bakazhalilila phulu dzadzo mu danga.

¹¹Bakalonga Bhokisi le Tjidumano tja Yahwe, ne bhokisi lina mbeba dze golide ne zwifano zwe malonda abo mu kara.

¹²Ndizo ng'ombe dzikayenda dzakatambunuka nge zila inoyenda ku Bhetishemeshi, kusina padzinobhuda mu zila, dziyenda dzilila. Boshe be Bafilisitiya bakadzitobelela kudzina dzinoswika ku n'gathu we Bhetishemeshi.

¹³Ipapo bathu be Bhetishemeshi bakabe bevuna korong yabo mu nkuku. Bakati bemilidza mesho bebona Bhokisi le Tjidumano, bakashathila kulibona.

¹⁴Kara yakaswikila mu nnda wa Joshuwa we Bhetishemeshi, ngono ikama pa hwunde ne shongwe hwulu. Bathu bakaphapha hwuni dze kara, bakabhaya ng'ombe kupisila Yahwe tjibhayilo.

¹⁵Balevi bakadelusila Bhokisi le Tjidumano tja Yahwe pasi, kose ne bhokisi lakabe lina zwithu zwakathamwa nge golide, ngono bakaabiga pezhugwi kwe shongwe hwulu. Mu zhuba ilelo bathu be Bhetishemeshi bakadusila Yahwe zwipo bakabapisila zwibhayilo.

¹⁶Kwakati boshe bashanu be Bafilisitiya bebona ikoku, bakashandukila ku Ekironi mu zhuba ilelo.

¹⁷Iyawa ndiwo malonda e golide, akayisiwa nge Bafilisitiya ali tjibhayilo tje nlandu kuna Yahwe: Limwe lili le Ashidodi, limwe lili le Gaza, limwe lili le Ashikeloni, limwe lili le Gati ne limwe lili le Ekironi.

¹⁸Mbeba dze golide na idzobo, kuyendidzana ne mbalo ye mizi mikulu yose ye Bafilisitiya ya boshe bali bashanu, mizi yakabe yakabakiligwa nenge mizi yakabe isakabakiligwa. Shongwe hwulu, yabakadelusila Bhokisi le Tjidumano tja Yahwe, tjitendeki mu nnda wa Joshuwa we Bhetishemeshi na nasi.

¹⁹Ngono Ndzimu wakabulaya bamwe be balume be Bhetishemeshi, wakabulaya bali makumi ali kutendeka (70), ngobe bakabe bashozhela mukati kwe Bhokisi le Tjidumano tja Yahwe. Bathu bakalila, ngobe Yahwe bakathama kubulaya kukulu mu bathu.

²⁰Bathu be Bhetishemeshi bakati, “Apa ndiani ungatubula kuma mbeli kwa Yahwe kene, Ndzimu iwoyu wakayengemala? Apa Bhokisi le Tjidumano lowoyenda kuna ani kudwa mutili kene?”

²¹Bakatuma batumwa ku bathu be Kiriatijearimu kunobadwa beti, “Bafilisitiya bakabuza Bhokisi le Tjidumano tja Yahwe, ngono izhani mulitolele kumuli.”