Read Kalanga 1 Samuele 7 Bible Online

1 Samuele 7 - Kalanga bible

1 Samuele 7

¹Balume be Kiriatijearimu bakazha bakatola Bhokisi le Tjidumano tja Yahwe, bakaliyisa ku ng'umba ya Abinadabu pezhugwi kwe duthu. Ngono bakabiga nkololo uwe, Eleazari kuti atjengete Bhokisi le Tjidumano tja Yahwe.

²Kudwa mu zhuba lakagadziwa Bhokisi le Tjidumano ku Kiriatijearimu, kwakapinda tjibaka tjilefu lefu, makole ali makumi mabili (20), ngono mu tjibaka tjose itjetji Baiziraela bose bakabe bakabhata belilila Yahwe.

³Ngono Samuele kadwa Baiziraela bose kati, “Ha mushandukila kuna Yahwe nge mimoyo yenyu yose, makafanila kuti mubigile midzimu ye butaya kutjena namwi na bo Ashitaroti mubaduse pakati kwenyu, muzwipile kushingila Yahwe boga nge mimoyo yenyu yose, ndiko kwabanowomusunungula mu maboko e Bafilisitiya.”

⁴Ndizo Baiziraela bakalashila kutjena midzimu ye bataya yabo bo Bhaale na bo Ashitaroti, bakashingila Yahwe koga.

⁵Ipapo Samuele kabadwa kati, “Kubunganyilani Baiziraela bose ku Mizipha, ngono ndowomutembezelela kuna Yahwe.”

⁶Ndizo Baiziraela bakakubunganila ku Mizipha bana Samuele ali ntungamili wabo. Ngono Baiziraela bakatjela vula bakaitebulila mbeli kwa Yahwe. Mu zhuba ilelo bakazwinyima zojiwa bakazwileba beti, “Takatjinyila Yahwe.”

⁷Kwakati Bafilisitiya behwa kuti Baiziraela bakakubunganila ku Mizipha, boshe be Bafilisitiya bakayenda benogwa ne Baiziraela. Ngono kwakati Baiziraela behwa ngekwako, bakatja Bafilisitiya.

⁸Bakadwa Samuele bakati, “Musitongo misa kutitembezelela kuna Yahwe, Ndzimu wedu, kuti batitjidze mu luboko gwe Bafilisitiya.”

⁹Ndizo Samuele katola pkhwizana inomwa kaipisa yose ili tjibhayilo kuna Yahwe. Kalilila Yahwe mu bumo gwe Baiziraela, ngono Yahwe bakan'dabila.

¹⁰Kwakati Samuele atjapisa tjibhayilo, Bafilisitiya bakasedzela bezha kuwobhayana ne Baiziraela. Koga mu zhuba ilelo Yahwe bakadidima nge hwi lisi lishoma lakalonga lutjo mu Bafilisitiya ngono bakakundiwa ne Baiziraela.

¹¹Balume be Iziraela bakabhuda mu Mizipha bakatatana ne Bafilisitiya, bebabulaya kudzina benoswika pejo ne Bhetikara.

¹²Ndizo Samuele katola bgwe kalibiga pakati kwe Mizipha ne Jeshana, kalitumila zina eti, “Ebheneza” edwa kuti, “Kwe tjinga Yahwe kwabakadwila betibhatsha.”

¹³Ndizo Bafilisitiya bakakundiwa, ngono bakasitjangine nge ngwa mu ntuthu we Iziraela kakale. Luboko gwa Yahwe gwakabhayana ne Bafilisitiya butjilo gwa Samuele gose.

¹⁴Mizi yose yakabe yatapiwa ne Bafilisitiya mu Iziraela, yakabgwilizigwa Iziraela kudwa mu Ekironi kunoti ku Gati, Baiziraela bakatola ntuthu wose kupoteleka mizi iyeyo mu maboko e Bafilisitiya. Kukabe ne mbakiso pakati kwe Iziraela ne Baamori.

¹⁵Samuele kabe akatungamila bathu be Iziraela misi yose ye butjilo gugwe.

¹⁶Wakabe eti gole ne gole kapoteleka edwa ku Bhetele eyenda ku Giligala ne ku Mizipha egadzanya bathu be Iziraela mu magalo wose iyawa.

¹⁷Ipapo ekoshandukila ku Rama, ngobe kwakabe kuli iko kuna nzi uwe, na ikokobo wakabe ebusaboko. Ngono kabakila Yahwe tjibeso tjinopisigwa zwibhayilo ikoko.