Read Kalderash Romani Cornilescu Bible 2020 (Romania) Genesa 11 Bible Online

Genesa 11 - Kalderash Romani Cornilescu Bible 2020 (Romania) bible

Genesa 11

¹Sai phuw sas la khă šib thai sa kodola divanuri.

²Gălindoi on karing anklel o kham, dine pa khă islazo ando čem o Šinar; thai anzarde oče.

³Thai phende iekh karing aver: „Aven! te kăras kărămizi, thai te phabaras le mišto ande iag.” Thai e kărămida nikărdea lengă than baŕăhko, ta o peko nikărdea lengă than varohko.

⁴Thai mai phende: „Aven! te vazdas amengă khă četatea thai khă turno savehko gor te malavel o čeri, thai te kăras amengă khă anau, kaste na mai avas phaŕadine pe soa mui la phuweako.”

⁵O Rai ulisto te dikhăl e četatea thai o turno, kai vazdenas les le šeave le manušengă.

⁶Thai O Rai phendeas: „Dikhta, on sî khă poporo korkoro, thai saorăn sîle sa kodea šib; thai dikhta soste linepe te kărăn; akana khanči na tholengă lopînz kaste kărăn sa so thodine pehkă ande godi.

⁷Aven! te uleas Ame thai te amblavas oče lendi šib, kaste na mai atearăn pehko divano iekh avrăngă.”

⁸Thai O Dell pharadea le oçal pe soa mui la phuweako; kadea kă atărdile te mai vazden e četatea.

⁹Anda kodea e četatea sas dini anav Babel, kă oče ambladea o Rai e šib sa la phweati, thai oçal phaŕadeale o Rai pe soa mui la phuweako.

¹⁰Dikta e viça le neamosti le Semosti. Kakh šell bărš, o Sem kărdea le Arpacšados, pala dui bărši pala o barobrîšind.

¹¹Pala o kărdimos le Arpacšadohko, o Sem mai traisardea panjišella bărši, thai kărdeas šeave thai šeia.

¹²Kana sas les treanda thai panji bărši, o Arpacšado kărdea le Šelaxos.

¹³Pala so kărdea le Šelaxos, o Arpacšdo mai traisardea štaršella thai trin bărši; thai kărdea šave thai šeia.

¹⁴Kana sas les treanda bărši, o Šelax kărdea le Eberos.

¹⁵Pala so kărdea le Eberos, o Šelax mai traisardea štaršella thai trin bărši; thai kărdea šeave thai šeia.

¹⁶Ka treanda thai štar bărši, o Eber kărdea le Pelegos.

¹⁷Pala so kărdea le Pelagos, o Eber mai traisardea štaršella thai treanda bărši, thai kărdea šeave thai šeia.

¹⁸Ka treanda bărši, o Pelag kărdeas le Reuos.

¹⁹Pala so kărdea le Reuos, o Pelag mai traisardea duišella thai înia bărši; thai kărdea šave thai šeia.

²⁰Ka treanda thai dui bărši, o Reuo kărdea le Serugos.

²¹Pala so kărdea le Serugos, o Reu mai traisardea duišella thai efta bărši; thai kărdea šeave thai šeia.

²²Ka treanda bărš o Serug kărdea le Naxoros.

²³Pala so kărdea le Naxoros, o Serug mai traisardea duišella bărši; thai kărdea šeave thai šeia.

²⁴Ka biš thai înia bărš, o Naxor kărdea le Teraxos.

²⁵Pala so kărdea le Teraxos, o Naxor mai traisardea ăkhšell thai dešunia bărši; thai kărdea šave thai šeia.

²⁶Ka eftavardeš bărši, o Terax kărdea le Avramos, le Naxoros thai le Xaranos.

²⁷Dikhta e viça le neamosti le Teraxnosti. O Terax kărdea le Avramos, le Naxoros thai le Xaranos — o Xaran kărdea le Lotos.

²⁸Thai o Xaran mullo angloa pehko dadd o Terax, ando čem kai kărdilosas, ando Ur ande Xaldea. —

²⁹O Avram thai o Naxor line pehkă romnea. O anav la romneako le Avramosti sas Serai, thai o anav la romneako le Naxarosti sas Milka, e šei le Xaranosti, o dadd la Milkako thai la Iskăiako.

³⁰E Serai sas sterpo: nasla šeave dăfeal.

³¹O Terax le pehkă šeaves le Avramos thai le Lotos, o šeav le Xaranohko, o šeav lehkă šeavehko, thai la Seraia, lesti bori, e romni lehkă šeavesti le Avramosti. Găletar andekhthan anda o Ur anda e Xaldea, kaste jean ando čem ando Kanaan. Avile ji koa Xaran thai thodinepe oče.

³²Le des le Teraxoskă sas duišella thai panvardeš bărši; thai o Terax mullo ando Xaran.