Read Kalderash Romani Cornilescu Bible 2020 (Romania) Genesa 32 Bible Online

Genesa 32 - Kalderash Romani Cornilescu Bible 2020 (Romania) bible

Genesa 32

¹O Iakov dikhlea pehkă dromestar; thai arakhle les le înjerea le Devllehkă.

²Kana dihkea le, o Iakov phendea: „Kadea sî e tabăra le Devllesti!” Anda kodea thodine le thanehkă kodolehkă anau Maxanaim (E tabăra e bandeardi).

³O Iakov tradea angle varesar manši ka pehko phral o Esau, ando čem o Seir, ando çinuto Edom.

⁴O mothodea lengă kadea: „Dikta so te phenen mîŕă rahkă le Easaohkă: „Kadea del duma teo robo o Iakov: „Bešlem koa Labano, thai ašilem leste ji akana;

⁵sî ma guruv, čiuši, bakrea, robea thai roabea thai tradau te den tu dă štire e buti kadea muŕo rai, kaste avel ma nakhlimos angla tute.”

⁶Le solea amboldile koa Iakov, thai phendine: „Găleam ka teo phrall o Esau; thai o avel angla tute, štară šelle manušença.”

⁷O Iakov darai'lo but dă sa, thai astardea les e dar. Xuladea ande dui riga le manušen kai sas lesa, le bakrean, le gurumnen, le kămilen,

⁸thai phendea: „Te avela o Esau thai te marălla khă rig, e rig kai ašela, daštil te skăpil.”

⁹O Iakov phendea: „Devlla mîŕă daddehko le Avraamohko, Devlla mîŕă dadehko le Isakohko! Tu Raia, kai phendean mangă: „Ambolde tu ande teo čem thai ando than kai kărdilean, thai kăraua te jeal tukă mišto!

¹⁰Me sîm but çînoŕo anda sa le kărdimata thai anda sa o pateamos, kai sîkadean les angla o robo Tiro; kă nakhlem o Iordano koadoa numai la rovlleasa mîŕî, thai dikta akana kărau dui riga.

¹¹Arakh ma, rudi Tu, andoa vast mîŕă phrallehko, andoa vast le Esaohko! Kă darau lestar, kaste na avell thai te malavel ma, man, le deian, thai le šeaoŕăn.

¹²Thai Tu phendean: „Me kăraua te jeall tukă mišto, thai kărva tukă e sămînça, sar e tišai la mareati, kai, dă but kai sî, našti te dinel pe.”

¹³O Iakovo bešlo e reat ando than kodoa. Lea anda so mai sas les pesa, thai thodea rigate, sar pativ anda pehko phrall o Esau:

¹⁴dui šella busnea thai biši busne, dui šella bakrea thai biši bakriše,

¹⁵treanda kămile thudesa thai pehkă çînorănça, štarvardeši gurumnea thai deši guruw, biši čiušnea thai deši čiuši.

¹⁶Dea le ka pehkă robea, turma turmasa avervaresar, thai phendea pehkă robengă: „Nakhăn angla mande, thai mekăn drom ande sako turma.”

¹⁷Mothodea kolehkă mai anglal kadea: „Kana arakhăla tu muŕo phrall o Esau, thai pušela tu: „Kahko san? Karing jeas? Kasti sî kadea turma angla tute?”

¹⁸Te phenes: „Te robosti le Iakovosti; oi sî khă pativ, tradii mîŕă raiehkă le Esaohkă; thai o orta avel pala amende.”

¹⁹Dea sa kodoa mothodimos le duitohkă, le tritohkă thai sa kolengă kai sasle ăl turme: „Kadea te den duma mîŕî raiehkă le Esaohkă kana arakhăna les.

²⁰Te phenen lehkă: „Dikta o robo tiro o Iakov avel i o pala amende.” Kă phenelas pehkă o: „Ašavaua les kadala pativasa, kai jeal angla mande; pala kodea dikaua les mui muieste, thai daštil pe te dikhăl ma lašimasa.”

²¹Kadea e pativ nakhli anglal, thai o ašilo ande tabăra ande kodea reat.

²²Sa ande kodea reat, lea le duie romnean pehkă, thai le dešuie šaven pehkă, thai nakhlo o vado le Iabokohko.

²³Lea le, thai nakhadea le o paioŕo, thai nakhadea sa so sas les.

²⁴O Iakov ašilo korkoŕo. Atunčeara khă manuši mardea pe lesa ji kana pharadilo o des.

²⁵Dikhlindoi kă našti te tholpe lesa, o manuši kadoa maladea les kai kuštik le bečesti, kadea kă skrintosaili e kuštik le bečesti, kana marălas pe lesa.

²⁶Kodoa manuši phendea lehkă: „Mekh ma te jeautar, kă kărdilo des,” Ta o Iakov phendea: „Či mukaua Tu te jeastar ji kana či desamadumadămišto.”

²⁷O manuši kodoa phendea lehkă: „Sar sî teo anau?” „Iakovo,” phendea o.

²⁸Palakodea phendea: „O anau tiro či mai avela Iakovo, dă akana bušosa Israelo (kukoa kai marăl pe le Devllesa); kă mardean tu le Devllesa thai le manušença thai sanas izbîndimahko.”

²⁹O Iakovo pušlea les: „Phen mangă, rudi Tu, o anau Tiro.” O phendea lehkă: „Anda soste mangăs Muŕo anau?” Thai dealesdumadămišto oče.

³⁰O Iakov thodea anau kodole thaneskă Peniel (O mui le Devllehko); „kă” phendea o, „dikhlem le Devlles mui muieste, thai sa skăpisailem čivavasa.”

³¹Anklelas o kham kana nakhlo paša o Peniel. Ta o Iakov langalas andoa beči.

³²Dikta sostar, ji ando des dă adesara, le Israeliçea či xan e vîna katar o beči; kă o Dell maladea le Iakovos kai kuštik le bečesti ande vîna.