Read Kalderash Romani Cornilescu Bible 2020 (Romania) Genesa 6 Bible Online

Genesa 6 - Kalderash Romani Cornilescu Bible 2020 (Romania) bible

Genesa 6

¹Kana line le manuši te buteon po mui la phuwaeko, thai kărdilea lengă šeia,

²le šave Le Devllehkă dikhline kă le šeia le manušengă sas šukar; thai anda sa line pehkă romnea kodolen kai alosarde pehkă le.

³Thai O Dell phendea: „O Duho Muŕo nai te ašel sa ando manuši kă o manuši nai dăsar mas bezexalo: kadeasar lehkă des sî te avena ăkhšell thai biši bărši.”

⁴Le barămanuši sas pe phuw ande kodoa čiro, thai i pala so le šave Le Devllehkă pašile le šeiança le manušengărença, thai kărdine lengă on šave: kadala sas kai sas andel purane čirurea, manuši anavença.

⁵O Dell dikhlea kă o jungalimos le manušehko sas baro pe phuw, thai kă sa lesti godi anda lehko illo sas ande sako des dăsar te kăral nasul.

⁶Falea Les nasul Le Devlles kă kărdea le manušes pe phuw, thai xoleai'lo ande pehko illo.

⁷Thai O Dell phendeas: „Sî te khosau poa mui la phuweako le manušes kai kărdem les, katao manuši ji kal gurumnea, ji ka kola kai çirdenpepaiphuw thai ji kal čiriklea le čerehkă; ka fal Ma nasul kă kărdem le.”

⁸Ta o Noe leas mila angloa Dell.

⁹Dikh savi si e viça le Noiasti. O Noe sas kha manuši bibezehalo thai bi došako maškar kodola anda lehko čiro: o Noe phirălas Le Devllesa.

¹⁰O Noe kărdea trin šave: O Sem, O Xam thai o Iafet.

¹¹E phuw čioŕailisas angla O Dell, e phuw sas pherdi bezexa.

¹²O Dell dikhlea karing e phuw, thai dikhta kă e phuw čioŕailisas; kă orsogodi manuši čioŕardeasas pehko drom pe phuw.

¹³Atunčeara O Dell phendea le Noiahkă: „O mudarimos sakogodi manušehko sî lino angla Mande, kă pherdine e phuw bezexandi: dikhta sî te mudarau le la phuweasa ku sa.

¹⁴Kăr tukă kha bero andoa kašt goferohko (tiparoso); o bero kadoa te xulaves les ande odaiçi, thai te makhăs les pekosa andral thai i avreal.

¹⁵Dikhta sar te kăras les: o bero te aveles trin sella koçea ando bariumos, panvardeši koçea ando buflimos thai treanda koçea ando učimos.

¹⁶Te kărs le beroghkă kha jeamo, opră, buflo khă kotohko; o udar te thos les ando prašav le berohko, thai te kăras khă rîndo odaiengo telal, aver koa maškar thai aver opral.

¹⁷Thai, dikta kă Me sî te kărau te avel khă brîšind baro paiengo pe phuw kaste mudarăl orsogodi tala o čeri, kai sî ande leste čivava; or so sî pe phuw sî te na mai avel.

¹⁸Ta tusa sî te kărau khă phanglimos; te šos tu ando bero, tu thai te šave, ti romni thai le romnea te šavenga anekhthan tusa.

¹⁹Anda sa so trail, anda sako juvindimos, te les ando bero po dui anda sako moda, kaste nikrăs le juvinde tusa: te avel khă rig muršani thai khă rig juwlikani.

²⁰Anda le čiriklea pala lendi moda, anda le gurumnea pala lendi moda, thai anda sa le çîrditoare la phuweakă pala lendi moda, te aven tute andră dui po dui anda orsogodi, kaste nikăras le čivavasa.

²¹Thai tu, le tukă anda sa le butea kai xanpe, thai kăr tuka te aven tu, kaste kanden tuka xamahko tukă thai lengă.”

²²Kadea kărdea o Noe: kărdea sa so mothodeasas lehkă o Dell.