Read Kalderash Romani Cornilescu Bible 2020 (Romania) Genesa 9 Bible Online

Genesa 9 - Kalderash Romani Cornilescu Bible 2020 (Romania) bible

Genesa 9

¹O Dell deadumadămišto le Noias thai lehkă šaaven, thai phendea lengă: „Bareon, buteon thai pherăn e phuw.

²Te astarăl o daraimos thai e dar tumendar orsave juvindimas pai phuw, orsavea čiriklea poa čeri, sea so phirăl pai phuw thai sa le mašen le paiehkărăn: dem tumengăle ande tumară vast!

³Sa so mištil thai sî les čivava, te avel tumengă sar xabmos: sa kadala dav tumengăle, sar i e čear e zăleno.

⁴Ta mas pehka čivavasa, kadeadar o rat lako, te na xan.

⁵Kă sî te mangau parpale o rat le čivavengo tumarăngo; mangau les parpale kata or sao juvindimos; thai mangaua parpale e čivava le manušesti, andoa vast sko manušesko, kai sî lehko phral.

⁶Te šorăla varekon o rat le maušesko, i lehko rat te avel šordo le manušestar; kă o Dell kărdea le manušes pala Pehko tipo.

⁷Ta tume, bareon thai buteon; pharadeon pe phuw thai pherăn la!”

⁸O Dell mai dea duma le Noiasa thai lehkă šeavença kai sas lesa, thai phendea:

⁹„Dikhta, kărau tumença khă phanglimos, thai tumara sămînçasa, kai sî te avel palla tumende;

¹⁰sa le juvindimatănça, kai sî tumença, kaditi le čiriklea sode i le gurumnea, thai vi le jivine la phuweakă kai sî tumença, sa kodolença kai ankăste andoa bero thai vi avrănça juvindimata pai phuw.

¹¹Kărau khă phanglimos tumença kă či khă făptura nai te va mai avel mudardi le paiendar le barăbrîšindestar, thai nai te mai avela barobrîšind kaste mekălpusto e phuw.”

¹²Thai O Dell phendea: „Dikhta, o semno le phanglimahko kai kăravles mašar Mande thai tumende, thai maškar sa le juvindimata kai sî tumença, anda sa le viçe le manušengă ando veako:

¹³Mirî bričiri, kai thodem la maškar o noro, oi sî te sîkavel o sămno le phanglimahko anda Mande thai e phuw.

¹⁴Kana sî te tidau le norea opral e phuw, e bričiri sîkadeola ando noro;

¹⁵thai Me anaua mangă godi anda o phanglimos maškar Mande thai tume thai anda sa le juvindimata anda orsavo stato; thai le paia či mai kărdeon barobrîšind, kaste mudarăn orsogodi făptura.

¹⁶E Bričiri avela ando noro; thai Me Sî te dikhau pe late, kaste me anau magă godi anda o phanglimos o vešniko maškar o Dell thai sa le juvindimatăndar thai orsogodestar stato pai phuw.”

¹⁷Thai O Dell phendea le Noiahkă: „Koadoa sî o sămno le phanglimahko kai kărdem les maškar Mande thai orsogodi făptura pai phuw.” Le šave le Noiahkă.

¹⁸Le šave le Noiahkă, kai ankăste andoa bero, sas: o Sem, o Xam thai o Iafet: o Xam sî o dadd le Kanaanohko.

¹⁹Kadala sas le trin šave le Noiahkă, thai anda lende, pharadile le manuši pe seai phuw.

²⁰O Noe thodeape te kărăl buti pe phuw, thai thodea khă răz.

²¹Pilea moll, matil'lo thai nandi'lo ando maškar pehka cărako.

²²O Xam, o dadd le Kanaaanohko, dikhlea o nandimos pehă daddehko, thai phendea pehkă duie phralengă avri.

²³Atunčeara o Sem thai o Iafet line e raxami, thodinela pel dume, găline parpale rigasa thai garadine o nandimos lengă daddehko; ta anda kă lengă muia sas amboldine parpale, či dikhline o nandimos pehkă daddehko.

²⁴O Noe ušti'lo anda o zalimos la molleako, thai ašundea so kărdeasas lehkă lehko šeau o mai tărno.

²⁵Thai phendea: „Dinoarman te avel o Kanaan! Te avel o robo pehkă phralengo!”

²⁶O mai phendea: „Dinodumadămišto te avel o Rai, O Dell le Semohko, thai o Kanaan te avel lehko robo!

²⁷O Dell te buflearăl le thana kai sî le Iafetohkă, O Iafet te trail ande le çăre le Semohkă, Thai o Kanaan te avel lengo kanditori!”

²⁸O Noe traisardea pala o barobrîšind, trin šella thai panvardeši bărši.

²⁹Sa le des le Noiahkă sas dă înia šella panvardeši bărši; palakodea mullo.