Read Kalderash Romani Cornilescu Bible 2020 (Romania) 1 Thagarengo 12 Bible Online

1 Thagarengo 12 - Kalderash Romani Cornilescu Bible 2020 (Romania) bible

1 Thagarengo 12

¹O Roboam gălo ando Sixemo, kă soa Israelo avilosas ando Sixemo te kărăles thagar.

²Kana ašundea e buti kadea o Ieroboam, o šeau le Nebatohko, sas sa ando Ejipto, kai našlosas anda o thagar o Solomono, thai ando Ejipto bešelas.

³Tradine te akharăn les. Atunčea o Ieroboam, thai soa tidimos le Israelohko avile koa Roboamo thai dine lehkă duma kadea:

⁴„Teo dadd phareardea amaro xamo; akana tu vazdea kadea phari robia thai o xamo kai thodeales teo dadd pa amende.Thai kandasa tu.

⁵O phendea lengă: „Jeantar, thai ambolden tume mande pa trin des.” Thai o poporo teleardea.

⁶O thagar o Roboam dea pe duma le phurănça kai sas paša lehko dadd o Solomono, ando čiro lehka čivavako, thai phendea: „So phenen mangă te dau anglal le poporohkă kadalehkă?”

⁷Thai dikta so phendine on: „Kana desa unjile ades kadale poporos, kana kărăsa lengă so kamen, thai kana desale anglal orbença lašimatahkă, kandena tu vešniko.”

⁸Ta o Roboam meklea o phendimos kai denas kă les le phură, thai dea pe duma i le tărnença kai barilesa lesa thai kai sas paša leste.

⁹O phendea: „So phenen mangă te dau anglal le poporohkă kadalehkă, kai del mangă duma kadea: „Bipharear o xamo kai thodea les pa amende teo dadd?”

¹⁰Thai dikta so phendine lehkă le tărne kai barilesas lesa: „Te phenes kadea le poporohkă kadalehkă kai dea tukă duma kadea: „Teo dadd phareardea mengă o jxamo, tu bipharear les amengă!” Te des lengă duma kadea: „O nai muŕo o mai çîkno avela mai thulo sar le tičiuri mîŕă daddehkă.

¹¹Akana, muŕo dadd thodea pa tumende khă xamo pharo, ta me kăraua les i mai pharo; muŕo dadd mardea tume bičiurença, ta me maraua tume skorpioanença.”

¹²O Ieroboamo thai soa poporo avile koa Roboam o trito des, pala sar phendeasas o thagar: „Abolden tume mande pa trin des!”

¹³O thagar dea anglal zuralimas le poporohkă. Meklea o phendimos kai dinesas les le phură,

¹⁴thai dea lengă duma kadea, pala o phendimos le tărnengo: „Muŕo dadd thodea pa tumende khă xamo pharo, ta me kăraua les i mai pharo; muŕo dadd mardea tume bičiurença, ta me maraua tume skorpioanença.”

¹⁵Kadeadar o thagar či ašundea le poporostar; kă e buti kadea sas tradini kata o Rai, ando pherdimos le divanohko, kai phendeasas les o Rai anda o Axaia andoa Silo le Ierobamohkă, o šeau le Nebatohko.

¹⁶Kana dikhlea soa Israelo kă o thagar či ašune les, o poporo dea anglal le thagares: „So rig same amen le Davidosa? Amen nai ame mandimos le šeavesa le Isaiehko! Ka te çăre, Israele! Akana dikh te khărăstar, Davide!” Thai o Israelo gălo ande pehkă çăre.

¹⁷Le šeave le Israelohkă kai bešenas ande le četăçi le Iudahkă, sas korkoŕo pa save raisardea o Roboamo.

¹⁸Atunčeara o thagr o Roboam tradea lende le Adoramos, kai sas mai baro pa le tidimata. Ta o Adoram sas mudardo baŕănça dă soa Israelo, thai mullo. Thai o thagar o Roboam ušti'lo iekhatar te anklel ando urdon, kaste našel ando Ierusalimo.

¹⁹Kadea pharadi'lo o Israelo le khărăstar le Davidoskărăstar ji ando des dă adesara.

²⁰Soa Israelo, ašundindoi kă o Ieroboam amboldi'lo, tradine te akharăn les ando tidimos, thai kărde les thagar pa soa Israelo. E semençia le Iudasti sas e korkoŕo kai găli pala o khăr le Davidohko.

²¹O Roboam arăslindoi ando Ierusalimo, tidea soa khăr le Iudahko thai e semençia le Beneaminosti, ăkh šell thai oxtovardeši mii manuši alosarde, laše andoa mardimos te marăn pe le khărăsa le Israelohkărăsa thai te aneles parpale tala o stăpînimos le Robomohko, o šeau le Solomonohko.

²²Ta o divano le Devllehko dea duma kadea le Šemaiahkă, o manuši le Devllehko:

²³„De duma le Roboamohkă, o šeau le Solomonohko, o thagar le Iudahko, thai sa le khărăhkă le Iudahkă thai le Beneaminohkă, thai le kolavră poporohkă, thai phen lengă:

²⁴„Kadea del duma o Rai: „Na anklen, thai na kărăn mardimos tumară phralença, le šeave le Israelohkă! Sakogodi anda tumende te ambolden tume khără, kă Mandar kărdili e buti kadea.” On ašundine o divano le Raiehko, thai amboldile khără, pala o Divano le Raiehko.

²⁵O Ierobam vazdea o Sixemo po baŕobaro le Efraimohko, thai bešlo oče; pala kodea ankăsto oçal, thai vazdea o Penuelo.

²⁶O Ieroboam phendea ande pehko illo: „O thagarimos akana daštila te amboldel pe koa khăr le Davidohko.

²⁷Kana o poporo kadoa anklela ando Ierusalimo te anel jertfe ando Khăr le Raiehko, o illo le poporohko kadalehko amboldela pe ka pehko rai, koa Roboamo, o thagar le Iudahko, thai mudarăna ma thai amboldeona pe koa Roboam, o thagar le Iudahko.”

²⁸Pala so dea pe duma, o thagar kărdea dui guruwiça sumnakune, thai phendea le poporohkă: „Dăstul ankăstean ando Ierusalimo; Israele! Dikta o Dell tiro kai ankaladea tu andoa čem le Ejiptohko.”

²⁹Thodea iek anda kadala guruwiça ando Betelo, thai o kolaver thodea les ando Dano.

³⁰Thai kadea buti sas kărdimos bezexalimahko. O poporo jealas te rudil pe angla iekh andal guruwiça ji ando Dano.

³¹O Ieroboam kărdea ăkh khăr učimahko thai thodea raša line anda soa poporo, kai či kărănas rig anda le šeave le Levehkă.

³²Thodea te avel khă desbaro ando šon o oxto, ando des dešupanji le šonehko, sar o desbaro kai prăznuinas les ande Iuda, thai andea jertfe po altarii. Dikta so kărdea ando Betelo, kaste anel pe jertfe le guruwiçăngă kai kărdeasas le o. Thodea ando kandimos ando Betelo le rašan le učimangă vazdine lestar.

³³Thai jertfisardea ando altarii kai kărdeasas les ando Betelo, ando des o dešupanji le šonehko oxtongo, šon kai alosardeasas les pala lehko čeailimos. Mothodeas te avel sar desbaro anda le šeave le Israelohkă, thai ankăsto po altarii te phabarăl tămîia.