Read Kalderash Romani Cornilescu Bible 2020 (Romania) 1 Kroničengo 16 Bible Online

1 Kroničengo 16 - Kalderash Romani Cornilescu Bible 2020 (Romania) bible

1 Kroničengo 16

¹Pala so andine o chivoto le Devllehko, thodine les ando maškar la çărako kai anzardeasas la o Davido anda leste, thai andine angloa Dell phabarimata dă sa thai jertfe naismahkă.

²Kana isprăvisardea o Davido andimahko le phabarimata dă sa thai le jertfe le naismahkă, deadumadămišto o poporo ando Anav le Raiehko.

³Pala kodea xuladea saoŕăngă kolengă andoa Israelo murši thai juwlea, sakoiekhăhkă po khă kotor manŕăhko, thai khă kotor masăhko thai po khă bokoli stafidendi.

⁴Dea le Leviçăn e buti te kanden angloa chivoto le Raiehko, te akharăn, te lăudin thai te slăvin le Raies, o Dell le Israelohko.

⁵Kadala sas: o Asaf, o šerobaro, o Zaxaria, o duito pala leste, o Ieiel, o Šemiramot, o Iexiel, o Matitia, o Eliab, o Benaia, o Obed-Edom thai o Ieiel. Len sas le instrumente muzikakă, lăute thai xarpe, thai o Asaf bašavelas andal timvale.

⁶Le raša o Benaia thai o Iaxazielo bašavenas orkana andel šing angloa chivoto le phanglimahko le Raiehko.

⁷Ando des kodoa o Davido thodeales anda anglal data le Asafos thai lehkă phralen te vestisarăn le laude le Raiehkă.

⁸Lăudin le Raies, akharăn o Anav Lehko: kărăn prinjeando maškar le popoare le kărdimata Lehkă le bară!

⁹Dilaban, dilaban ande Lesti pativ! Den duma pa sa Lehkă minuni!

¹⁰Den tume bară le Anavesa Lehko kukoa o sfînto! Te bukuril pe o illo kolengo kai roden le Devlles!

¹¹Roden le Raies o nikărimos Lehko, roden biatărdimahko Lehko Mui!

¹²Anen tumengă godi anda le barimata kai kărdeale, andal minuni thai andal krisa phendine Lehkă mostar,

¹³tume, e sămînça le Israelosti, o robo Lehko, le šeave le Iakovohkă, le alosarde Lehkă!

¹⁴O Rai sî o Dell amaro; Lehkă krisa pherdeon pe sai phuw.

¹⁵Anen tumengă orkana godi Lehkă phanglimastar; Lehkă šinaimatăndar, kărdine anda khă mia neamurendi manušendi,

¹⁶andoa phanglimos kai kărdea les le Avraamosa, Thai la solaxasa kai kărdea les le Isakosa;

¹⁷O kărdea khă kris andoa Iakovo. Khă phanglimos vešniko andoa Israelo,

¹⁸phendindoi: „Daua tu o čem le Kanaanohko, sar mandimos kai pelea tumengă koa xulaimos.”

¹⁹On sas xançî koa dindimos atunčiea, but xançî koa dindimos, thai strănea ando čem kodoa.

²⁰Thai phirănas kata khă neamo ka aver, thai kata khă thagarimos ka aver poporo;

²¹ta O či meklea khanikas te tholpe pa lende, thai došaldea thagar anda lendi buti,

²²phendindoi: „Na azban tume andal makhle Mîŕă, thai na kărăn či khă nasulle prooročengă mîŕă!

²³Dilaban le Raiehkă, sal manuši la phuweakă! Vestin des ando des o skăpimos Lehko;

²⁴phenen maškar le neamuri e slava Lesti! Maškar sa le popoarele minuni Lehkă!

²⁵Kă o Rai sî baro thai but vreniko lăudimahko, O sî daraimahko mai opră dă sal devla;

²⁶kă sal devla le popoarengă sî idolea, Ta o Rai kărdea le čerurea.

²⁷O barimos thai o străfeaimos sî angla Tiro Mui, E zor thai o bukurimos sî ando than Lehko.

²⁸Familii le popoarengă, den le Raies, Den le Raies slava thai pativ!

²⁹Den le Raies slava anda Lehko Anav! Anen pativa thai aven angla Leste, Rudin tume angloa Rai buteança sfinçomena.

³⁰Isdran angla Leste, sal manuši la phuweakă! Kă e lumea sî zureadi, či mištil pe.

³¹Te bukurin pe le čerurea, thai te vesălil pe e phuw! Te phenel pe maškar le neamurea kă o Rai thagaril!

³²Te xunxuil e marea ku sa so sî ande late! O islazo te vesălil pe andekhthan ku sa so sî ande leste!

³³Te çîuin le kašt ando văši angloa Rai! Kă O avel te krisînil e phuw.

³⁴Lăudin le Raies, kă sî lašo, Kă e mila Lesti nikrăl ando veako!

³⁵Phenen: „Skăpisar ame Devlla le skăpimahko, tidea me thai ankalava me andoa maškar le neamurengo, kaste lăudisaras o Anav kukoa Tiro o sfînto, Thai te thoas amengă e slava kaste lăudisaras Tu!

³⁶Dinodumadămišto te avel o Rai, o Dell le Israelohko, andai vešničia ande vešničia! Thai soa poporo phendea: Amin!” thai lăudilas le Raies.

³⁷O Davido meklea oče, angloa chivoto le phanglimahko le Raiehko, le Asafos thai lehkă phralen, kaste kandel biatărdimahko angloa chivoto, kărdindoi pehko unjilimos des dă des.

³⁸Meklea le Obed-Edomos thai le Xosas pehkă phralença, ando dindimos dă šovardeši thai oxto, le Obed-Edomos, o šeau le Ieditunohko, thai le Xosas, sar udaitorea.

³⁹Thodea le rašas le Çadokos thai le rašan, lehkă phral, angloa than le Raiehko, po vazdimos andoa Gabaono,

⁴⁰kaste anen le Raiehkă phabarimata dă sa, dă droboitu ji reate, thai te pherăn sa so sî ramome ande kris le Raiesti, mothodini le Israelohkă le Raiestar.

⁴¹Lença sas o Xemano thai o Iedutuno, thai le kolaver kai sas alosardine thai thodine po anav kaste lăudin le Raies, kă e mila Lesti nikrăl ando veako.

⁴²Lença sas o Xeman thai o Iedutun, kai sas le šing thai timbale anda kola kai bašavenas anda lende, thai instrumenturea andal dilabaimata ande pativ le Devllesti. Le šeave le Iedutunohkă sas udaitorea.

⁴³Soa poporo gălo sakogodi ka pehko khăr, thai o David amboldi'lo te deldumadămuišto pehko khăr.