Read Kalderash Romani Cornilescu Bible 2020 (Romania) 1 Kroničengo 19 Bible Online

1 Kroničengo 19 - Kalderash Romani Cornilescu Bible 2020 (Romania) bible

1 Kroničengo 19

¹Pala kodea, o Naxaš, o thagar le šeavengo le Amonohko, mullo, thai ande lehko than, raisardea lehko šeau.

²O Davido phendea: „Sîkavaua lašimos angloa Xanuno, o šeau le Naxašehko, kă lehko dadd sîkadea lašimos angla mande.” Thai o Davido tradea pehkă solen te zurearăn les andaoa merimos lehkă daddehko. Kana arăsle le solea le Davidohkă ando čem le šeavengo le Amonohkă, koa Xanun, kaste zurearăn les,

³le šerăbară le šeavengă le Amonohkă phendine le Xaunohkă: „Pateas kă o Davido tradel tukă manuši kaste zurearăn tu, kaste den pativ te daddes? — Ta na aviline le kanditorea lehkă tute kaste prinjeanen e četatea thai te xasarăn la, thai te dikhănxčioreal o čem?”

⁴Atunčieara o Xanun lea le kanditoren le Davidohkă, thodea te ŕanden le, thai te šinen lengă çoale katoa maškar ji koa brečinari. Pala kodea dea le drom.

⁵O David, savehkă avile thai dine les dă jeanglimos pa kola so kărdile kadale manušença, tradea varesar manuši angla lende, kă kărdileas pe lengă baro lajeau; thai o thagar tradea te phenel lengă: „Ašen ando Ierixono ji kana bareola tumengă e šervali, thai pala kodea te ambolden tume.”

⁶Le šeave le Amonohkă dikhline kă kărdilesas urîçîme le Davidohkă, thai o Xanun thai le šeave le Amonohkă tradine ăkh mia talança rupune te tokmin ande lengo kandimos urdona thai grastarea katal Sirienea andai Mesopotamia thai katal Sirienea andai Maaka andai Çoba.

⁷Tomnisarde treanda thai dui mii urdona thai le thagares andai Maaka andekhthan lehkă poporosa, kai avile thai thodine pe anglai Medebeia. Le šeave le Amonohkă tide pe anda pehkă četăçi, thai telearde koa mardimos.

⁸Koa ašundimos kadala veasteako, o David tradea pa lende le Ioabos thai sa e oštirea le manušendi le zuralendi.

⁹Le šeave le Amonohkă ankăste, înširosai le ande linia le mardimasti koa šutimos la četateako; le thagar kai avilesas thodine pe butimasa po islazo.

¹⁰O Ioab dikhlea kă sas les mardimahko i anglal thai i palal. Alosardea atunči anda sal voinkuri le čikatehkă le Israelohkă khă kîrdo, kai anzardea les pal Sirienea;

¹¹thai thodea tala o mothodimos pehkă phralehko le Abišaiehko e kolaver rig le poporosti, kaste nikrăl kolin le šeavengă le Amonohkă.

¹²O mai phendea: „Kana le Sirienea avena mai zuralke sar mande, te aves mangă tu ando kandimos; thai kana le šeave le Amonohkă avena mai zurale sar tute, avaua tukă me ando kandimos.

¹³Av zuralo, thai te zurearasame anda amaro poporo thai anda le četăçi amară Devllehkă, thai o Rai te kărăl so va pateala!”

¹⁴O Ioabab, le poporosa lehko, gălo anglal koa mardimos pal Sirienea, thai on našline angla leste.

¹⁵Thai kana dikhline le šeave le Amonohkă kă on linela te našen, našline i on angloa Abišai, o phral le Ioabosohko, thai ambldinisai'le ande četatea. Thai o Ioabab amboldi'lo ando Ierusalimo.

¹⁶Le Sirienea, dikhlindoi kă sas marde le Israelostar, tradine thai andine le Sirianen kai sas pe kolaver rig le Nanilašosti; thai o Šofax, o šerobaro la oštireako le Xadarezarehko, sas angloa čikat lengo.

¹⁷Dine ašundimos le Davidos, kai tidea sa le Israelos, nakhlo o Iordano, gălo pa lende, thai lašardea pe te marăl pe lença. O Davido înširosai'lo ande linia le mardimasti pa le Sirienea. Ta le Sirienea, pala so mardinesa pe lesa,

¹⁸našline angloa Israelo. O Davido mudardea lengă manušen kata efta mii urdonengă thai štarvardeši mii pedestaršea, thai mudardea le Šofaxos, o šerobaro la oštireako.

¹⁹Le kanditorea le Xadarezorehkă, dikhlindoi pe mardine le Israelostar, kărdine împătimos le Davidosa, thai mekline pe lehkă. Thai le Sirienea či mai kambline te kanden le šeaven le Amonohkărăn.