Read Kalderash Romani Cornilescu Bible 2020 (Romania) Ezra 5 Bible Online

Ezra 5 - Kalderash Romani Cornilescu Bible 2020 (Romania) bible

Ezra 5

¹Le prooročea: o Xagai, o prooroko, thai o Zaxaria, o šeau le Idohko, prooročisarde le Iudeiengă kai sas ando Iuda thai ando Ierusalimo, ando Anau le Devllehko le Israelohko.

²Atunčeara o Zorobabel, o šeau le Šelatielohko, o Iosua, o šeau le Ioçadohko, ankăste thai line te vazden o Khăr le Devllehko ando Ierusalimo. Thai andekhthan lença sas i le prooročea le Devllehkă kai kandenas le.

³Ande kodoa čiro, o Tatnai, o dregătorii dă ordal o Nanilaši, o Šetar-Boznai, thai lengă jene le kandimahkă avile lende thai dine lengă duma kadea: „Kon dea tume avimos te vazden o khăr kadoa thai te vazden le zîduri kadala?”

⁴On mai phende lengă: „Save sî le anava le manušengă kai vazden o khăr kadoa?”

⁵Ta e iakh le Devllesti dikhălas pal phură le Iudeiengă. Thai mukline te jean angle le butea ji koa tradimos karing o Dariu, thai ji koa avimos khă lillehko lestar ande kadoa dikhlimos.

⁶Dikta o nikărimos le lillehko tradino le Dariusohkă kata o Tatnai, o dregătorii dă ordal le Nanilašostar, le Šetar-Boznaiestar, thai lengă jene andoa Afarsak, kai bešenas ordal o Nanilaši.

⁷Tradine lehkă ăkh lill kakale nikărimasa: „Karing o thagar o Dariuso, sastimos!

⁸Te jeanel o thagar kă găleam andel phuwea le Iudahkă, koa Khăr le Devllehko kolehko le barăhko. O vazdel pe andal baŕ le dăltuime, thai andel zîduri thol pe kast; e buti jeal iekhatar thai izbutil ande lengă vast.

⁹Pušlem le phurăn, thai dem lengăduma kadea: „Kon meklea tume te vazden o khăr kadoa thai te vazden le zîduri kadala?”

¹⁰Mangleam lengă o anau lengo kaste kăras tukă les prinjeando, thai thodeam ando ramomos o anau le manušengo kai sî ande lengo čikat.

¹¹Dikta o dimosanglal kai dine amengă les: „Ame sam le kanditorea le Devllehkă le čerurengă thai la phuweako, thai vazdas pale o khăr kai sas vazdino akana but bărši. Khă baro thagar le Israelohko vazdeasas les thai isprăvisardeasas les.

¹²Ta, pala so amară dadda xolleardine le Devlles le čerurengo, O dea le ando vast le Nebukadeçarohko, o thagar le Babilonohko, o Xaldeano, kai phaŕadea o khăr kadoa thai lea le poporos robo ando Babilono.

¹³Varesar, ando anglal bărši le Čirohko, o thagar le Babilonohko, o thagr o Čir dea mothodimos te vazdel pe pale kadoa Khărle Devllehko.

¹⁴Thai orta o thagar o Čir ankaladea andoa templo andoa Babilono le butea le sumnakune thai le rupune le Khărăhkă le Devllehkă, kai leasas le o Nebukandençar andoa Templo andoa Ierusalimo thai nigărdeasas le ando templo ando Babilono, dea le ando vast kadea phendimasko Šešbaçaro, kai thodea les dregătorii,

¹⁵thai phendea lehkă: „Le butea kadala, thai jea thai tho le ando Templo andoa Ierusalimo, thai te vazdel pe pale o Khăr le Devllehko pe lehko than kai sas.”

¹⁶Kadoa Šešbaçar avilo kadea, thai thodea le temelii le khărăhkă le Devllehkă Ando Ierusalimo. Dă atunčeara ji akana vazdel pe o, thai či isprăvisai'lo.”

¹⁷Akana, kana o thagar arakhăl dromesa, te kărăl rodimata ando khăr le visteriengo le thagarehko le Babilonohko, kaste dikhăl kana dea pe andai rig le thagaresti le Čirosti o mothodimos andoa vazdimos le Khărăhko kadalehko le Devllehko ando Ierusalimo. Pala kodea, te tradel amengă o thagar lehkă kamimos pa kadea buti.”