Read Kalderash Romani Cornilescu Bible 2020 (Romania) Neemia 4 Bible Online

Neemia 4 - Kalderash Romani Cornilescu Bible 2020 (Romania) bible

Neemia 4

¹Kana ašundea o Sanbalat kă vazdas pale o zîdo, astardi'lo thai xolleailo but zurales. Mardea pehkă khălimos le Iudeiendar,

²thai phendea angla pehkă phral thai angla le kătane la Samariakă: „Ka soste kărăn buti kala Iudei bidaštimahkă? Ta avena on mekline te kărăn buti? Ta jertfina? Ta isprăvina? Ta dea on čivava le baŕăngă praxome tala le gomile la pošakă thai phabarde iagatar?”

³O Tobia, o Amonito, sas paša leste, thai phendea: „Te vazden dară! Te anklela khă xulpea, peravela lengo zîdo le baŕăhko.”

⁴„Ašun, Devlla amaro, sar sam prasaine! Kăr te perăn le prasaimata pa lengo šero, thai de le dimos pe khă phuw kai te aven robea.

⁵Na iertisar lendi bikris, thai bezex lendi te na avel khosli angla Tute; kă năkăjisarde kolen kai vazden.”

⁶Vazdeam o zîdo, kai sas isprăvime peste sa ji koa dopaši andoa učimos lehko. Thai o poporo kărălas buti le illesa.

⁷Ta o Sanbalat, o Tobia, le Arabea, le Amoniçea thai le Asdodiçea, xolleai'le but zurales kana ašundine kă o lašardimos le zîdurengo jealas angle thai kă le phaŕadimata lenas te phandadeon.

⁸Tide pe saoŕă andekhthan te aven poa Ierusalimo, thai te kărăn lehkă rimomata.

⁹Rudisaileam amară Devllehkă, thai thodeam khă straja desă thai reate kaste nikrăl ame pal mardimata lengă.

¹⁰Ta o Iuda phendea: „Le zora kolengă so nigrăn le pharimata šuteon, thai le peraimata sî but; naštisarasa te vazdas o zîdo.”

¹¹Thai le dušmaia amară phenenas: „Či jeanena thai či dikhăna khanči ji kana arăsas ando maškar lengo; mudarasa le thai kadeadar atărdeola e buti.”

¹²Thai le Iudeia kai bešenas paša lende, aviline dešvarăs thai phendine amengă pa sal thana kai kamenas te aven amende.

¹³Anda kodea thodeam, andel thana kola dă mai telal, papal o zîdo, thai andel thana le zurale, o poporo pel familii, thodeam le saoŕăn le săbiença, le suliçnça thai lengă arkurença.

¹⁴Dikhlem, thai ušteaindoi, phendem le mai bară dregătorengă thai le kolavrăhkă poporohkă: „Na daran lendar! Anen tumengă godi le Raiestar le barăstar thai le daranestar, thai marăn tume andal phral tumară, andal šeave thai le šeia tumară, andal romnea tumară, thai andal khăra tumară!”

¹⁵Kana dikhline le dušmaia amară kă phendeasas pe amengă, o Dell xasardea lengo plano, thai amboldileam saoŕă koa zîdo, sakogodi ka pesti buti.

¹⁶Andoa des kodoa, dopaši andal manuši mîŕă kărănas buti, ta e kolaver dopaši sas înarmome suliçănça, skuturença, arkurença thai platošença. Le šerălebară sas pala soa khăr le Iudahko.

¹⁷Kola kai vazdenas o zîdo, thai koa kai nigrănas thai kola kai pherănas le pharimata, khă vastesa kărănas buti, thai khă vastesa nikrănas e arma.

¹⁸Sakogodi anda lende, kana kărănas buti, sas le e sabia phangli po maškar. Kukoa kai bašavelas andai šing sas paša mande.

¹⁹Phendem le mai barăngă, le dregătorengă, thai le kolavrăhkă poporohkă: „E buti sî bari thai tinzome, thai ame sam phaŕadine po zîdo, dur iekh avrăndar.

²⁰Koa ašundimos la šingako, te tiden tume amende, karing o than katar ašunena la. O Dell amaro marăla pe anda amende.”

²¹Kadea kărasas e buti: dopaši anda amende bešlindoi la suliçasa ando vast dă kana phaŕadeolas o des ji kana anklenas le čeraia.

²²Ande kodoa čiro, mai phendem le poporohkă: „Sakogodi te bešel reate ando Ierusalimo pehkă kanditoresa; reate te kăras strajako, ta desă te kăras buti.”

²³Thai či nandileam le çoalendar, či me, či mîŕă phral, či le kanditorea mîŕă, či le manuši la starjakă, kai sas tala muŕo mothodimos. Sakogodi jealas le armença koa pai.