Read Kalderash Romani Cornilescu Bible 2020 (Romania) Neemia 8 Bible Online

Neemia 8 - Kalderash Romani Cornilescu Bible 2020 (Romania) bible

Neemia 8

¹Kana avilo o šon o eftato, le šeave le Israelohă sas ande pehkă četăçi. Atunčeara sa o poporo tidea pe sar khă manuši po than o pîtărdo angla le udara le paiengă. Phendine le sîkadehkă le Ezrahkă te jeal te lel o lill la Krisako le Moisahko, dino le raiestar le Israelohkă.

²Thai o rašai o Ezra andea e Kris angloa tidimos, kărdino andal murši thai andal juwlea thai anda sa kola kai sas ando dimos te atearăn la. Sas o des anglal le šonehko eftato.

³O Ezra drabardea ando lill dădroboitu ji koa dopaši le desăhko, po than o pîtărdo dă anglal le udara le paiengă, anglal murši thai le juwlea angla sa kola kai sas dimahkă te atearăn les. Soa poporo sas limasa godi koa drabarimos le Lillehko la Krisako.

⁴O jenglitorii o Ezra bešelas pe khă skamin kaštehko, vazdino anda kadea buti. Paša leste, ande čeači rig, bešenas o Matitia, o Šema, o Anaia, o Urie, o Xilchia, thai o Maaseia, thai ande bičeači: o Pedaia, o Mišael, o Malchia, o Xašum, o Xašbadana, o Zaxaria thai o Mešulam.

⁵O Ezra pîtărdea o lill angla soa poporo, kă bešelas mai opră dă soa popăoro. Thai kana pîtărdea les, soa poporo ušti'lo.

⁶O Ezra, deadumadămišto le Raies, le Devlles le barăs, thai soa poporo dea anglal vazdindoi le vast: „Amin! Amin!” Thai bandi'le thai rudisai'le angloa Dell le mosa pe phuw.

⁷O Iosua, o Bani, o Šerebia, o Iamin, o Akub, Šabetai, o Xodia, o Maaseia, o Chelita, o Azaria, o Iozabad, o Xanan, o Pelaia, thai le Leviçea, sîkavenas le poporohkă e Kris, thai sakogodi bešelas ka pehko than.

⁸On drabarănas mištimasa ando lill la Krisako le Devllesti, thai sîkavenas lako atearimos, kaste kărăn le te atearăn so drabardesas.

⁹O dregătorii o Neemia, o rašai thai o janglitorii o Ezra, thai le Leviçea kai sîkavenas le poporos, phendine sa le poporohkă: „O des kadoa sî dino le Raiehkă, tumară Devllehkă; te na jelin tume thai te na roven!” Kă soa poporo rovelas kana ašundeas le divanurii la Krisakă.

¹⁰On phende lengă: „Jean ta xan masa thule thai pen pimata gugle, thai traden po khă rig i kolengă kai naile khanči lašardo, kă o des kadoa sî dino amară Raiehkă; na xolleaon, kă o bukurimos le Raiehko sî o zuralimos tumaro.”

¹¹Le Leviçea atărdearănas soa poporo, phendindoi: „Ašenmuto, ando des kadoa kă sî sfînto; na xoleaon!”

¹²Thai sa o poporo gălo te xal thai te pel. Thai tradine po khă rig i avrăngă, thai vesălisaile but. Kă ateardesas le divanuri kai phendinesas pe lengă.

¹³O duito des, le šeră la familiakă anda soa poporo, le raša, thai le Leviçea, tide pe koa jeanglitorii o Ezra, kaste ašunen o tălmăčimos le divanurengă la Krisakă.

¹⁴Thai arakhline ramome ande Kris kă o Rai mothodeasas andoa Moise, kă le šeave le Israelohkă trăbun te bešen andel çăre ando desobaro le šonehko eftato.

¹⁵Atunčeara tradine te ašundel pe o vestimos kadoa ande sa lengă četăçi thai ando Ierusalimo: „Jeantar koa baŕobaro thai anen ŕaia zetinohkă, ŕaia zetinohkă văšuno, ŕaia mirtohkă, ŕaia finikohkă, thai ŕaia anda le kašt le pherdine, kaste kărăn çăre sar sî ramome.”

¹⁶Atunčeara o poporo gălo thai andea ŕaia, thai kărdine çăre opral pal khăra, ande pehkă barea, andel barea le Khărăhkă le Devllehkă, po than o pîtărdo anglal udara le paiengă thai po than o pîtărdo kata o udar le Efraimohko.

¹⁷Soa tidimos kolengo kai amboldinisailesas andai robia kărdine çăre thai bešline ande kadala çăre. Andoa čiro le Iosuahko, o šeau le Nunohko, ji ando des kadoa, či mai kărdinesas le šeave le Israelohkă kadea vareso. Thai sas khă baro vesălimos.

¹⁸Drabarde ando lill la Krisako le Devllesti ande sako des, anda o des dă anglal ji ando des o mai palal. Prăznuisarde o desobaro efta des, thai sas khă tidimos desăhkobarăhko ando oxtoto des, sar sas mothodino.