Read Kalderash Romani Cornilescu Bible 2020 (Romania) Estera 6 Bible Online

Estera 6 - Kalderash Romani Cornilescu Bible 2020 (Romania) bible

Estera 6

¹Ande reat kodea, o thagar naštisardea te sovel, thai mothodea te anen paša leste o lill le andimahkă la godeakă, le Kroničii. Drabarde le angloa thagar,

²thai arakhlea pe ramome so arakhleasas o Mardoxeo dikhlimasa koa Bigtan thai o Tereš, kola dui famenea le thagarehkă, le arakhaitorea le pragohkă, kai kamblesas te tinzon o vast poa thagar o Axašveroš.

³O thagar phendea: „So pativ thai barimos kărdeasas pe le Mardoxeohkă anda kadea?” „Či kărdea pe lehkă khanči,” dineanglal kola kai kandenas le thagares.

⁴Atunčeara o thagar phendea: „Kon sî ande bar?” — O Xaman avilo sas ande bar dă avreal le khărăhko le thagarehko te mangăl le thagarehkă te amblavel le Mardoxeos po kašt kai lašardea les anda leste.

⁵Le kanditorea le thagarehkă dinelesanglal: „O Xaman sî ande bar.” Thai o thagar phendea: „Te šol pe.”

⁶O Xaman šutea pe, thai o thagar phendea lehkă: „So trăbul kărdo anda khă manuši kai kamel te pativarăles o thagar?” O Xaman phendea pehkă ande peste: „Kas avrăs dă sar mande kamela o thagar te pativarăles?”

⁷Thai o Xaman deanglal le thagares: „O manuši kai kamel o thagar te pativarăles,

⁸trăbul te anel pe lehkă e raxami e thagarni, kutea kai xureavel pe o thagar, thai o grast pe sao grastarăl o thagari, thai te thon lehkă e kununa e thagarni po šero.

⁹Te del pe e raxami thai o grast iekhăhkă andal šerălebară mai sămnome le thagarehkă, pala kodea te xureavel la raxameasa le manušes kodoles kai kamel o thagar te pativarăles, te phiraveles ankăsto po grast ando than o pîtărdo la četateako, thai te çîpil angla leste: „Kadea kărdeol pe le manušehkă kai kamel o thagar te pativarăles.”

¹⁰O thagar phendea le Xamanohkă: „Le iekhatar e raxami thai o grast, sar phendean, thai kăr kadea le Iudeohkă le Mardoxeohkă, kai bešel koa udar le thagarehko. Na mekh bi kărdo khanči anda so phendean.”

¹¹Thai o Xaman lea e raxami thai o grast, xureadea le Mardoxeos, phiradea les ankăsto po grast andoa than o pîtărdo la četateako, thai çîpisardea angla leste: „Kadea kărdeol pe le manušehkă kai kamel o thagar te pativarăles!”

¹²O Mardoxeo amboldi'lo koa udar le thagarehko, thai o Xamano gălo iekhatar khără, xolleariko thai le šerăsa garado.

¹³O Xaman phendea pehka romneakă la Zerešakă thai sa pehkă prinjeandengă so kărdileas pe lehkă. Thai le xarane lehkă, thai lesti romni e Zereša, phendine lehkă: „Kana o Mardoxeo, angla sao lean te perăs, sî andai viça le Iudeiendi, či daštisa te kărăs khanči angla leste, ta perăsa angla leste.”

¹⁴Ta kana denas lehăduma on, avile le famenea le thagarehkă thai line iekhatar le Xamanos koa govimos kai lašardeasas les e Estera.