Read Kalderash Romani Cornilescu Bible 2020 (Romania) Estera 9 Bible Online

Estera 9 - Kalderash Romani Cornilescu Bible 2020 (Romania) bible

Estera 9

¹Ando šon o dešduito, kadeadar ando šon o Adar, ando dešutrinto des le šonehko, o des ande sao trăbunas te anen koa pherimos o mothodimos thai o phendimos le thagarehko, thai kana le dušmaia le Iudeiengă ajukrănas te stăpînin pa lende, kărdilea orta amboldimasa, kă le Iudeia stăpînisarde pa le dušmaia lengă.

²Le Iudeia tide pe ande pehkă četăçi, ande sal phuwea le thagarehkă le Axašverošohkă, kaste thon o vast pe kola kai rodenas te xasarăn le. Khonikh naštisarde te bešel lengă anglal, kă e dar lendar astardeasas sa le popoarăn!

³Thai sa le bară le phuweangă, le šerălebară la oštireakă, le dregătorea, le kanditorea le thagarehkă, nikărde le Iudeiença, zan la darati kai phurdelas la o Mardoxeo.

⁴Kă o Mardoxeo sas zuralo ando khăr le thagarehko, thai e barimos lehko jealas ande sal phuwea, anda kă arăsălas anda soste ande soste mai zuralo.

⁵Le Iudeia mudarde maladimatănça sabiakărănça sa lengă dušmaien, mudarde le thai xasardine le. Kărdine so kamble pehkă dušmaiença.

⁶Ande kapitala e Susa, le Iudeia mudarde thai xasarde panji šella manuši,

⁷thai dinešuri le Paršandatos, le Dalfonos, le Aspatas,

⁸le Poratas, le Adalias, le Arditas,

⁹le Parmaštas, le Arizaies, le Aridaies, thai le Vaiezatas,

¹⁰kola deši šeave le Xamanohkă, o šeau le Xamedatahko, o dušmano le Iudeiengo. Ta či thodine o vast pe lengă mandinata.

¹¹Ando des kodoa, o dindimos kolengo kai sas mudarde ande kapitala e Susa arăslo koa prinjeandimos le thagarehko.

¹²Thai o thagar phendea la thagarnekă la Esterakă: „Le Iudeia mudarde thai xasardine ande kapitala e Susa panji šella manuši thai kolen deše šaven le Xamanohkă. So kărdino ande le kolaver phuwea le thagarehkă? … Sao sî teo manglimos? O avela tukă pherdino. So mai kames? Avela tu te les.”

¹³E Estera dealesanglal: „Kana o thagar arakhăl dromesa, te avel meklimos le Iudeiengă kai sî ande Susa te kărăn i texara pala o mothodimos dă ades, thai te amblaven po kašt kole deše šaven le Xamanohkărăn.”

¹⁴Thai o thagar mothodea te kărăl pe kadea. O mothodimos sas andino koa prinjeandimos le poporohko andai Susa. Ambladine kole deše šaven le Xamanohkă.

¹⁵Le Iudeia kai arakhadeonas ande Susa tidepe pale ando dešuštarto des le šonehko Adar, thai mudardine ande Susa trin šella manuši. Ta či thodine o vast pe lengă mandina.

¹⁶Le kolaver Iudeia anda le kolaver phuwea le thagarehkă tide pe thai nikărde pesti čivava. Line kadeadar xodinimos, skăpindoi lengă dušmaiendar, thai mudarde eftavardeši thai panji mii anda kola kai sas lengă dušmaia.Ta či thodine o vast pe lengă mandina.

¹⁷Kadala butea kărdi'le ando deštrinto des le šonehko Adar. Ando dešuštarto des, le Iudeia xodinisai'le, thai kărdine anda leste khă des govimahko thai bukurimahko.

¹⁸Kola kai arakhadeonas ande Susa, tide pe ando deštrinto des thai ando dešuštarto des, ta ando des o dešpanjto xodinisai'le, thai kărdine anda leste khă des govimahko thai bukurimahko.

¹⁹Anda kodea le Iudeia andoa gau, kai bešen andel četăçi bi zidurengo, kărdine andoa dešuštarto des le šonehko Adar khă des bukurimahko, thai govimahko thai desăhkobaro, ande sao traden pativa iekh avrăngă.

²⁰O Mardoxeo ramosardea kadala butea, thai tradea lilla sa le Iudeiengă pa sal phuwea le thagarehkă le Axašverošohkă, dă pašal thai dă dural.

²¹Motholas lengă te prăznuin ande sako bărši ando dešuštarto thai ando dešupanjto des le šonehko Adar,

²²sar des ande save on linesas xodinimos, skăpindoi pehkă dušmaiendar. Mothodea lengă te prăznuin ando šon ande sao o tristomos lengo parugleas pe ando bukurimos thai o roimos lengo andodesbaro, thai te kărăn anda kadala des varesar des govimahkă thai bukurimahkă, kana te traden pehkă pativa xabenehkă iekh avrăngă thai te xulaven pativa kolen kai nai le.

²³Le Iudeia unjearde pe te kărăn so linesas thai te kărăn i so mangleasas lengă o Mardoxeo.

²⁴Kă o Xamano, o šeau le Xamedatahko, o Agaghito, o dušmano sa le Iudeiengo, kădeasas o plano te xasară'le, thai šudeasas o Pur, adikă e bax, kaste mudară'le thai te xasară'le.

²⁵Ta e Estera, avindoi angla o thagar, o thagar mothodea ando ramomos te amboldel poa šero le Xamanohko soa plano o nasul kai kărdeasas les pal Iudeia, thai te amblave les po kašt, les thai lehkă šaven.

²⁶Anda kadea kadala des bušle Purim, kata o anau Pur. Lašardo sa le nikărimasa kadale lillehko, lašardo kolença kai dikhlesas orta on thai lašardo kolença so kărdilesas,

²⁷le Iudeia line anda lende, andai sămînça lendi, thai anda sa kola kai astardeona lendar, o mothodimos thai o unjilimos biparuglino kaste nikrăn prazniko ande sako bărši kadala dui des, ande moda lašardi, thai koa čiro mothodino.

²⁸Le des kadala trăbunas te aven pomenime thai prăznuime anda viça ande viçate, ande sako familia, ande sako phuw thai ande sako četatea. Thai le des kadala Purim či trăbun dinerigate ciăkhdata andoa maškar le Iudeiengo, čina te khosleol o andimos godeako anda lende maškar le avimata lengă.

²⁹E thagrni e Estera, e šei le Abixailosti, thai o Iudeo o Mardoxeo ramosarde bešlimasa e duito data anda kaste zurearăn o lill dikhlimasa koa Purim.

³⁰Tradine lilla sa le Iudeiengă, ande kola ăkh šell thai biši thai efta phuwea le thagarehkă le Axšverošehkă. On nikrănas divanuri pačeakă thai pateaimahkă,

³¹zuralindoi o nikărimos kadale duie desăngo o Purim, koa čiro mothodino, sar lašardeasas le o Iudeo o Mardoxeo thai e thagarni e Estera anda lende, thai sar lašardinesas pehkă le i on orta anda lendi sămînça, le nikărimasa le postohkărăsa lengo thai le çîpimatănça lengă.

³²O mothodimos la Esterako zureardea o thodimos kadale desăhkobarăhko Purim, thai e buti kadea sas ramome ando zakono.