Read Kalderash Romani Cornilescu Bible 2020 (Romania) Exodul 26 Bible Online

Exodul 26 - Kalderash Romani Cornilescu Bible 2020 (Romania) bible

Exodul 26

¹E çăra te kărăs la anda deši viguri inohkă sano amboldino, thai anda poxtana makhline ando vînăto, purpurio thai kărămizio; pe leste te kărăs xeruvimea astarde šukarimasa.

²O lunjimos khă vigosti te avel dă biši thai oxto koçea, thoa buflimos khă vigohko te avel dă štar koçea; sea le viguri te aven le sa kodea măsura.

³Panji anda kadala vigurea te aven astarde andekhthan, ta le kolaver panji viguri te aven i on astarde andekhthan.

⁴Ka e rig le vigosti saveasa avela koa gor le anglănça vigurea, te kărăs varesar vînîçî: sa kadea te kărăs i kai rig le vigosti kai sî o gor le duito astarimahko le vigosti.

⁵Koa angla vigo te kărăs panvardeši xîvea, ta ka e rig le vigosti kai astardeol o duito astarimos le vigurendi te kărăs sa panvardeši xîvea. Kadala xivea te lašearănpe iekh avrasa thai te aven anglal.

⁶Te kărăs panvardeši kopči sumnakune, thai kadale kopčença te astarăs le viguri iekh avrăstar, ta e çăra te avel iekh întrgo.

⁷Te mai kărăs viguri andal ball la busneakă, kaste aven opral pai çăra; te kărăs dešiekh viguri kadalendar.

⁸O lunjimos sako vigohko te avel dă treanda koçi, thai o buflimos sako vigohko te avel dă štar koçi; sa le dešiekh viguri te avele sa kodea măsura.

⁹Panji anda kadala viguri te phandes le avervaresar, thai le kolaver šou sa avervaresar, tao o vigo o šou te bandearăsles angloa mui la çărako.

¹⁰Te thos panvardeši šioturi kai rig le vigosti svesa sî o gor le astarimahko anglal andal viguri, thai panvardeši šioturea savesa avela o gor kata e duito astarimos le vigurendi.

¹¹Te kărăs panvardeši kopči anda e xarkuma, thai te thos le kopči andel šioturea. Te phandes le kadea o vazdimos la çărako te avel khă întrego.

¹²Kă či mai nakhăla vareso anda le viguri le vazdimahkă la çrakă, dopaši anda so nakhăla anda khă vigo, te garavel e rig palal la çărati;

¹³ta so mai nakhăl anda o lunjimos le kolavrăngo viguri le vazdimhkă la çărakă, te perăl po khă koto anda khă rig, thai khă koto pe kolaver rig, pa le dui riga la çărakă, kadea te garave le.

¹⁴Te mai kărăs pala kodea andoa vazdimos la çărako khă velitoarea anda le morčea le bakrišengă makhline ando lollo, thai pa late khă velitoarea andal morčea le guruwengă la mareakă.

¹⁵Apo te kărăs varesar phallea anda e çăra; le phallea kadala te aven andoa kašt le dafinohko, thodine ande pînŕănde.

¹⁶O lunjimos sako phalleako te avel deše koçăndi thoa buflimos sako phalleako te avel khă koto thai dopaši.

¹⁷Sako phall te avela dui kan tidine iekh avreatar, kadea te kărăs ka sal phallea la çărakă.

¹⁸Te kărăs biši phallea anda e çăra, ande rig karing e rig katar avel o des.

¹⁹Tala le biši phallea te thos štarvardeši pînŕă rupune, po dui pînŕă tala sako phall anda le dui kan lakă.

²⁰Anda o duito rig la çărati, e rig katar avel e reat, sa kadea te kărăs biši phallea,

²¹andekhthan tidine le štarvardešença pînŕă rupune lengă: po dui pînŕă tala sako phall.

²²Anda o fundo la çărako, ande rig katar perălo kham, te kărăs šou phallea.

²³Te mai kărăs dui phallea anda le undiuri andoa fundo la çărako;

²⁴te aven po dui andekhthan, avindoi dă telal, thai mišto phangline ando gor khă čerkosa; lidui kadala phallea, kai sî thodine ande le kukola dui undiuri, te aven ăkh moda.

²⁵Avena kadea oxto phallea, le pînŕănça pehkă rupune, kadeadar dešušou pînŕă, po dui pînŕătala sako phall.

²⁶Te kărăs pala kadea panji drugurea kaštehkă andoa dafino, anda le phallea iekhakă anda le riga la çărakă,

²⁷panji drugurea anda le phallea anda o duito rig la çărako, thai panji drji anda le phalea anda e rig le fundosti la çărati karing perălokham.

²⁸O drugo kata o maškar te arăsăl kata khă gor koa kolaver le phalleango.

²⁹Te phurdes le phallea sumnakasa, thai le angrustea ande save šona pe le drugurea te phurdes le sa sumnakasa.

³⁰E çăra te kărăs la pala o tipo kai sîkadi'lo tukă po baŕbaro.

³¹Te kărăs pala kodea khă perdeaua vînîto, purpurio thai kărămizio, anda inoste sano thai amboldino; te avel astardi šukarimasa, thai te avel pe late xeruvimea.

³²Te astarăla štară tilendar dafinohkă, phurdine ando sumnakai; le tille kadala te aven le vastarea sumnakune, thai te bešen pe štar pînŕă andoa rup.

³³Te atîrnos e perdeaua andel kopči, thai ando doso la perdeauako te thos o chivoto le phendimahko: e perdeaua te kărăl o xulaimos ando Than o sfînto thai o Than o but sfînto.

³⁴Te thos o kapako la ispăšireako po chivoto le phendimahko, ando Than o but sfînto.

³⁵E skafidi te thos la perdeauatar, thoa sfešniko te thos les anglai skafidi, ande rig katar avelodes la çărako, th e skafidi te thos la ande rig katar avelereat.

³⁶Koa šutimos la çărako te mai kărăs khă perdeaua vînăto, purpurio thai kărămizio anda inoste sano amboldino; kadea te avel khă buti astardi po gherghefo.

³⁷Anda kadea perdeaua te kărăs panji tille andoa dafino thai te xureaves le ando sumnakai; le tille kadala te aven le panji vastarea sumnakune, thai te šorăs anda lende panji pînŕă xarkumakă.