Read Kalderash Romani Cornilescu Bible 2020 (Romania) Exodul 40 Bible Online

Exodul 40 - Kalderash Romani Cornilescu Bible 2020 (Romania) bible

Exodul 40

¹O Rai dea duma le Moisahkă, thai phendea:

²„Ando des anglal le šonehko anglal, te anzarăs o than la çărako le arakhadimasti.

³Te thos ande late o chivoto le phendimahko, thai angloa chivoto te phandes e perdeaua dă andral.

⁴Pala kodea te anes e skafidi, thai te thos pe late kukola so thon pe. Palla kodea, te anes o sfešniko, thai te lašarăs lehkă kandele.

⁵O altari o sumnakuno anda e tămîia te thos les angloa chivoto le phendimahko, thai te phandes e perdeaua kata o uluw la çărako.

⁶Te thos o altari anda le phabarimata dă sa angloa uluw le thanehko la çărako le arakhadimasti.

⁷O lideano te thos les maškar e çăra le arakhadimasti thai o altari, thai te thos pai ande leste.

⁸Te thos e bar peste sa roata, thai te thos e perdeaua ka e poarta la bareati.

⁹Te les o zetino anda o makhlimos, te makhăs lesa e çăra thai sa so sîla la, thai te sfinços lesa sa lehkă buteança lehkă; thai avela sfinçome.

¹⁰Te makhăs o altari anda le phabarimata dă sa thai sa lehkă butea, thai te sfinços o altari; thai o altari avela but sfînto.

¹¹Te makhăs o lideano pehkă pînŕăsa, thai te sfinços les.

¹²Pala kodea te anes le Aaronos thai lehkă šeaven koa uluw la çărako le arakhadimasti, thai te xalaves le paiesa.

¹³Te xureaves le Aaronos le çoalença le sfinçome, thai te makhăs les, kaste kărăl Mangă o kandimos le rašahko.

¹⁴Te akharăs i lehkă šeaven, thai te xureaves le tuničença,

¹⁵thai te makhăs le sar makhlean i lengă daddes, kaste kărăn Mangă o kandimos le rašango. Ande zor kadale makhlimahko, on sî te aven le poa čiro o čeačimos le rašaimahko maškar le avimata lengă.”

¹⁶O Moise kărdea ortakadea sar motodeasas o Rai; kadea kărdea.

¹⁷Ando des anglal le šonehko anglal le băršeshko o duito, e çăra sas anzardi.

¹⁸O Moise anzardea e çăra; thodea lakă pînŕă, thodea le phallea thai le angrustea, thai vazdea le tille.

¹⁹Tinzosardea e velitoarea kai kandelas do opralimos la çărati sar mothodeasas le Moisahkă o Rai.

²⁰Pala kodea lea o phendimos, thai thodea les ando chivoto; thodea le drugurea koa chivoto, thai thodea o kapako la ispăšireako opral o chivoto.

²¹Andea o chivoto ande çăra; phanglea e perdeaua le xulaimastii angla leste, thai garadea kadeadar o chivoto le phendimahko, sar mothodeasas le Moisahkă o Rai.

²²Thodea e skafidi ande çăra le arakhadimasti, ande rig katar perălereat la çărati, înteal la perdeauatar dă andral;

²³thai thodea pe late le manŕă, angloa Rai, sar mothodeasas le Moisahkă o Rai.

²⁴Pala kodea thodea o sfešniko ande çăra le arakhadimasti, angla e skafidi, ande rig katar avelodes la çărati;

²⁵thai thodea lehkă kandele, angloa Rai, sar mothodeasas le Moisahkă o Rai.

²⁶Pala kodea thodea o altari o sumnakuno ande çăra le arakhadimasti angla e perdeaua dăandral;

²⁷phabardea pe leste tămîia khandimasti, sar mothodeasas le Moisahkă o Rai.

²⁸Thodea e perdeaua koa uluw la çărako.

²⁹Thodea o altari anda le phabarimata dă sa koa uluw le thanehko la çărati le arakhadimasti; thai andea pe leste o phabarimos dă sa thai e jertfa le xabenesti, sar mothodeasas le Moisahkă o Rai.

³⁰Thodea o lideano maškar e çăra le arakhadimasti thai o altari, thai thodea ande leste pai andoa xalaimos.

³¹O Moise, o Aarono thai lehkă šeave xalade pehkă vast thai pehkă pînŕă ande leste;

³²kana šonas pe ande çăra le arakhadimasti thai pašonas paša o altari, xalavenas pe, sar mothodeasas le Moisahkă o Rai.

³³Pala kodea vazdea e bar roata pa sai çăra thai le altarehko, thai phanglea e perdeaua kai poarta la bareati. Kadea isprăvisardea o Moise e buti.

³⁴Atunčeara o noro garadea e çăra le arakhadimasti, thai e slava le Raiesti pherdea e çăra.

³⁵O Moise našti te šolas pe ande çăra le arakhadimasti, anda kă o noro bešelas pa late, thai e slava le Raiesti pherdeasas e çăra.

³⁶Sode nikărde le phirimata lengă, le šeave le Israelohkă telearănas dăsar kana vazdelas pe o noro opral e çăra.

³⁷Thai kana či vazdelas pe o noro, či telearănas, ji kana vazdelas pe.

³⁸O noro le Raiehko sas desă opral pai çăra; ta reate, sas khă iag, angloa sa o khăr le Israelohko, ando čiro sa lengă phirimatăngo.