Read Kalderash Romani Cornilescu Bible 2020 (Romania) Iov 13 Bible Online

Iov 13 - Kalderash Romani Cornilescu Bible 2020 (Romania) bible

Iov 13

¹Dikta, mîŕî iakh dikhlea sa kadala, o kan muŕo ašundea thai lea sama.

²So jeanen tume, jeanau i me, či sîm mai tele dă sar tumende.

³Ta kamau te dauduma akana Kolehkă Aseazurallehkă, kamau te nikrau mîŕî doši angloa Dell.

⁴Kă tume san varesar kărdimatorea xoxaimatăngă, san saoŕănça varesar doftorea khančehkă.

⁵O, te ašilinomuto, so xaraimos sahkă sîkadino!

⁶Akana, ašunen, rudi tume, muŕo čeačimos, thai len godi koa dimosanglal mîŕă uštengo!

⁷Kamen te denduma butea bičeačea andoa kamblimos andoa Dell? Thai te phenen xoxaimata, kaste čeačearăn Les?

⁸Kamen te nikrăn Lesa thai te kărăn pe le čeačitorea le Devlleghkă?

⁹Te rodela tume O, ta arakhăla tume mišto? Or kamen te athaven Les sar athaven khă manušes?

¹⁰Či, či; ta O došavela tume, kana po garaimos či butearăndă sar nikărindoi Lesa.

¹¹Či daravel tume o barimos Lehko? Thai či perăl e dar Lesti pa tumende?

¹²Le phendimata tumară sî phendimata ušarăhkă, le zuralimata tumară sî zuralimata phuweakăgalbăno.

¹³Ašenmuto, mekăn ma, kamau te dauduma! Kărdeola pe mangă or so kărdeola pe mangă.

¹⁴Laua muŕo mas andel dandd, thai thoaua mîŕî čivava ando khălimos.

¹⁵E, mudarălla ma: nai ma khanči ajukărimahko; ta čeačearaoa muŕp phirimos angla Leste.

¹⁶Orta i e buti kadea dašti kandel ka muŕo skăpimos, kă iekh bikrisako či zumavel te avel angla Leste.

¹⁷Ašunen, ašunen le divanuri mîŕă, len godi ka so phenaua.

¹⁸Dikta ma sîm gata te nikrau muŕo čeačimos, kă jeanau kă sî ma čeačimos.

¹⁹Sî varekas vareso phendimahko pa mande? Atunčeara ašaumuto, thai kamau te merau.

²⁰Dăsar dui butea kăr mangă, thai či garadiuaua angla Teo Mui:

²¹Çîrde Teo vast pa mande, thai na mai biujear ma Tea darasa.

²²Pala kodea akhar ma thai dava Tu anglal; or mekh ma te dauduma me, thai demanglal Tu!

²³Sode bikrisa thai bezexa kărdem? Sîkau mangă le ušteaimata la krisakă thai mîŕă bezexa.

²⁴Anda soste garaves Teo Mui, thai les ma orta dušmano?

²⁵Kames te malaves khă patrin phurdini bravalleatar? Kames te phirăs pala khă sulum šuko?

²⁶Anda soste malaves ma dukhaimatănça kărtea, thai te došaves ma andal athaimata kărdine ando tărnimos?

²⁷Anda soste te thos mîŕă pînŕă andel buturuji, te pîndis sa mîŕă mištimata, te thos gor mîŕă pašengă,

²⁸kana muŕo stato perăl ando ternimos sar khă raxami xali păpărujendar?