Read Kalderash Romani Cornilescu Bible 2020 (Romania) Iov 16 Bible Online

Iov 16 - Kalderash Romani Cornilescu Bible 2020 (Romania) bible

Iov 16

¹O Iov lea o divano thai phendea:

²„Kadalendar butea ašunde me butivar; tume sa san vareasr răzgăitorea xollearimahkă.

³Kana arăsăna koa gor kadala orbe ande bravall? Thai anda soste kaditi xollearimos ande le dimatanglal tiră?

⁴Sar tumende sahkă dauduma i me, te avino ande muŕo than? Sahkă pherau tume orbença, daua andoa šero tumengă,

⁵sahkă răzgăi tume le mosa, thai sahkă mišti andal ušt, kaste lesni tumari dukh?

⁶Kana dauduma, e dukh či nakhăl, ta kana ašaumuto, sosa çîkneol?

⁷Ta akana, au! O strandisardea ma zorăndar… Mekhlean pusto sa muŕo khăr!

⁸Azbadean ma, sar khă došales; O čečimos muŕo šutimos, kai vazdel pe thai došarăl ma ando mui.

⁹Šinel ma thai phirăl pala mande ande Pesti xolli, tidel andal dandd pa mande, malavel ma thai pusavel ma Lehkă dikhlimasa.

¹⁰On pîtrăn o mui kaste xan ma, prasan ma thai marăn ma pal buči, xolleaon saoŕă pa mande.

¹¹O Dell mekăl ma koa lašo lengo čeailimos thai kolerngo bikrisako, thai šudel ma andel vast kolengă le jungalengă.

¹²Sîmas ujeardo, thai činosardea ma, astardea ma čeafatar thai linčeardea ma, çîrdea pa mande sar ande khă çînta.

¹³Le săjeçi Lehkă denmaroata anda sal riga; pusavel mîŕă rîničea bi millako, šorăl măŕî fierea pe phuw,

¹⁴phagăl ma kotora, kotora, šudel pe pa mande sar khă marditorii.

¹⁵Astarde mangă khă gono morčeako, thai peradem muŕo šero ande poši.

¹⁶O roimos lolleardea muŕo mui; thai ušal le mullimasti sî pe le iakha mîŕă.

¹⁷Varesar či kărdem či khă bikris, thai o rudimos muŕo sas orkana ujo.

¹⁸Phuwă, na garav muŕo rat, thai le vatimata mîŕă te na avele rig!

¹⁹Orta akana, o dikhlitorii muŕo sî ando čerii, o čeačimatorii muŕo sî ande le thana opral.

²⁰Le prinjeande mîŕă asan mandar, ta me rudi ma le Devllehkă iasfănça,

²¹te kărăl čeačimos le manušehkă angloa Dell, thai le šavehkă le manušehkă pa lehkă amal.

²²Kă o dindimos mîŕă băršengo pašol koa gor, thai jeaua pe khă drom katar či mai amboldaua ma.