Read Kalderash Romani Cornilescu Bible 2020 (Romania) Iov 19 Bible Online

Iov 19 - Kalderash Romani Cornilescu Bible 2020 (Romania) bible

Iov 19

¹O Iov lea o divano thai phendea:

²„Ji kana tristona muŕo dii, thai linčearăna ma le divanurença tumară?

³Dikta kă dešvarăs prasaian ma; nai tumengă lajau te phiradeon kadea?

⁴Kana bezexardem čeačimasa, dăsar me sîm došalo kadalatar.

⁵Patean kă dašti len ma opral? Patean kă čeačeardean mangă kă sîm došallo?

⁶Atunčeara te jeanen kă o Dell phirăl pala mande, thai thol pa mande Lesti phal.

⁷Dikta, çîpi xolleatar, thai khonikh či delanglal; mangau čeačimos, thai čeačimos nai!

⁸Šindea mangă orsao ankăstimos, thai našti nakhau; phaŕadea tuneriko pel droma mîŕă.

⁹Nandeardea ma mîŕa slavatar, lea mangăi kununa poa šero,

¹⁰linčeardea ma anda sal riga, thai xasaoau; çîrdea muŕo ajukărimos sar khă kaštes.

¹¹Astardi'lo xoleatar pa mande, Phiradea pe mança sar khă dušmano.

¹²Le oštiri Lehkă telerde andakhdata anglal, šinde pehkă drom ji mande, thai atărdile angla mîŕî çăra.

¹³Dureardea mîŕă phralen mandar, thai le amal mîŕă tristosai le mandar.

¹⁴Le neamuri mîŕă mekline ma, thai kola mai dă pašal mandar bîstărde ma.

¹⁵Le kanditorea thai le slujea mîŕă dikhăn ma sar khă străino, ande lengă iakha sîm khă biprinjeando.

¹⁶Akharau mîŕă robos, thai či delanglal; rudi les mîŕă mosa, thai dă ivea.

¹⁷O phurdimos muŕo arăslo bidikhlino la romneakă măŕakă, thai o khandimos arăslo bidikhlino le šavengă mîŕa deiakărăngo.

¹⁸Ji pune i le šaoŕă čidabadikhăn ma: kana ušteau on prasan ma.

¹⁹Kodola ande save pateauas ma čidabadikhăn ma, kodola kai kamauas le amboldile pa ma.

²⁰Le kokala mîŕă nikărdeon morčeatar thai masăstar; či mai ašilea ma dă sar e morčii pal dandd.

²¹Avel tu me milla, avel tume milla mandar, mîŕă amal! Kă o vast le Devllesti maladea ma.

²²Sostar phirăn pala mande sar o Dell? Thai či mai čeaileon le masăstar mîŕăstar?

²³Of! sahkă kamau ka mîŕă divanuri te aven ramome, te aven ramome ande khă lill;

²⁴sahkă kamau te aven karfome khă priboiesa sasterhko thai mollivesa ando kotorlebaŕăhko ando veako…

²⁵Ta jeanau kă o Potinditorii muŕo sî juvindo, thai kă vazdela pe mai palal pai phuw.

²⁶Orta kana te xasaola mîŕî morčii thai orta kana či mai avela ma mas, dikhaua varesar le Devlles.

²⁷Dikhaua Les thai avela mangă lašimasa; mîŕă iakha dikhăna Les, thai na avrăhkă. Muro dii ajukrăl o doro kadoa andral.

²⁸Atunčeara phenena: „Anda soste phirasas ame pala leste?” Kă o čeačimos muŕo avela prinjeandino.

²⁹Daran la sabiatar: kă le bezexa dine la sabiasa sî daraimahkă! Thai te jeanen kă sî khă kris.”