Read Kalderash Romani Cornilescu Bible 2020 (Romania) Iov 22 Bible Online

Iov 22 - Kalderash Romani Cornilescu Bible 2020 (Romania) bible

Iov 22

¹O Eliafaz andoa Teman lea o divano thai phendea:

²„Daštil khă manuši te anel vokh valoso le Devllehkă? Či; ta o xarano či valosîl dăsar pehkă.

³Kana san bi bezexako, sî Kukoles le Asazuralles vo khă valoso? Thai kana trais bi došako, so lela O?

⁴Anda teo pateaimos došarăl tu O kadea, thai šol pe kai kris tusa?

⁵Nai baro teo jungalimos? Thai le bezexa tiră bi dindimahkă?

⁶Lesas bi khančehko sumadea kata te phral, mekăsas bi çoalengă kolen le nangăn.

⁷Či desas pai le manušes le trušales, či kamesas te des manŕo le manušes le bokhales.

⁸O čem sas tiro, anda kă sanas o mai zurallo, thosas tu ande leste, kă sanas o mai dikhlino.

⁹Desas avri le phiwlean le vastença nangă, thai le vast le bidaddengo phagăsas le.

¹⁰Anda kodea san dinoroata astardimatăndar, thai lea tu e dar andakhdata.

¹¹Či dikhăs ta kadoa tuneriko, kadala paia but kai pherăn tu?

¹²Nai o Dell opră andel čerurii? Dikh o gor le čeraiengo, so sî dă učio!

¹³Thai tu phenes? „So jeanel o Dell? Dašti te krisînil O andoa tuneriko le norengo?

¹⁴Văluin Les le norea, či dikhăl khanči, e bolta le čerestii daba mai phiră la!”

¹⁵So! Kames te astarăs po drom o purano, pe save phirde les le bikrisako,

¹⁶kai sas line angloa čiro, thai nikărde sode nikrăl khă paioŕo kai thawdel?

¹⁷On phenenas le Devllehkă: „Telear amendar” So dašti kărăl amengă Kuko Asa zurallo?”

¹⁸Thai sakadea o Dell pherdeasas lengă khăra lašimatăndar. — Dur mandar o divano kolengo le jungalendar! —

¹⁹Kola bi bezexako avena le dikhlitorea lengă peraimahko thai bukurina pe, kukoa o bidošalo asala lendar

²⁰thai phenela: „Dikta le dušmaien amarăn xasardine! Dikta lengă bravalimata phabarde iagatar!”

²¹Kărdeo amal le Devllesa thai avela tu pačea; bukurisa tu kadeadar pale baxtalimastar.

²²Le o sîkaimos anda Lehko mui, thai tho tukă ando illo Lehkă divanuri.

²³Avesa thodino pale ande teo than, kana amboldesa tu ka Kukoa o Asa zurallo, kana durearăs e bikris anda r çăra tiri.

²⁴Šudea kadea o sumnakai ande poši, šude o sumnakai andoa Ofiro ando fundo le paiorăngo!

²⁵Thai atunčeara Kukoa Asa zurallo avela o sumnakai tiro, o rup tiro, o bravalimos tiro.

²⁶Thai atunčeara Kukoa Asa zurallo avela teo čeailimos, vazdesa teo mui karing o Dell.

²⁷Rudisa les, thai ašunela tu, thai daštisa te pherăs te solaxaimata.

²⁸Pe soste thosa o vast kărăsa, pe le droma tiră străfeala e lumina.

²⁹Avel o meklimostelal, tu rudisa tu anda teo vazdimos: O Dell kandel koles le iakhănça telal.

³⁰O skăpila orta i koles le došales, kai unjearăla pehko skăpimos le ujimahko te vastengo.”