Read Kalderash Romani Cornilescu Bible 2020 (Romania) Iov 27 Bible Online

Iov 27 - Kalderash Romani Cornilescu Bible 2020 (Romania) bible

Iov 27

¹O Iov lea pale o divano, deaduma andel pilde thai phendea:

²Juwindo sî o Dell, kai či del ma čeačimos! Juwindo sî Kukoa Asazurallo, kai kărtearăl mîŕî čivava,

³kă kaditi čiro sode avela ma duxo, thai o phurdimos le Devllehko avela ande mîŕă ur,

⁴mîŕă ušt či phenena khanči bičeačio, mîŕî šib či phenela khanči bičeačimahko.

⁵Dur mandar o gîndo te dau tume čeačimos! Ji koa mai palal phurdimos čeačearaua muŕo bidošalimos.

⁶Nikrau te ankalavau muŕo čeačimos, thai či mekaua ma; o illo či xalpe mança anda či iekh anda mîŕă des.

⁷O dušmano muŕo te avel sar kukoa o nasul, thai o kai lelpemançsa sar kukoa o bikrisako!

⁸So ajukărimos mai ašel koles le bikrisakărăs; kana šinel o Dell lehko thaw la čivavako, kana lel lehko duxo?

⁹Ašunel o Dell lehkă çîpimata kana avel o strandimos pa leste?

¹⁰Sî Kukoa Asazurallo o čeailimos lehko? Vazdel o soa čiro rudimata le Devllehkă?

¹¹Sîkavaua tume le droma le Devllehkă, či garavaua tumengă le planurea le Kolehkă Asazurallehkă.

¹²Ta tume prinjeanen le, thai san sakodole gîndostar; anda soste denduma kadea dă dilivanes?

¹³Dikta e bax kai garavela o Dell kolehkă le jungalehkă, o mandimos sao phene les Kukoa Asazurallo kolehkă bikrisako.

¹⁴Te avenales but šave, sî les andai sabia, thai le šave lehkă nigrăn lipsomos manŕăhko.

¹⁵Kola kai skăpin anda lehkă, sî praxome čiumatar, thai le phiwlea lengă či roven le.

¹⁶Te tidela rup sar e phuw, te gomerarăl çoale sar e čikh,

¹⁷o tidele, ta kukoa bi došako xureavel pe lença, thai lehkă rupestar le manušes bibezexako sî les rig.

¹⁸O khăr lehko sî sar kodoa kai vazdeles e molia, sar khă koliba kai kărăl pehkă la khă străjeri.

¹⁹Sovel bravalo, thai merăll nango; pîtrăl le iakha, thai sa xasai'lo.

²⁰Astarăles e dar sar varesar paia; thai reate, leles o vîrtejo.

²¹E bravall katar lulludearălokham lel les, thai jealtar; çîrde les zorasa anda lehko than.

²²O Dell šudel bi milako săjeçi pa leste, thai kukoa o nasul kamela te našel te skăpil lendar.

²³Le manuši marăn andal palme koa perimos lehko, thai fluierin les koa telearimos anda lehko than.