Read Kalderash Romani Cornilescu Bible 2020 (Romania) Iov 32 Bible Online

Iov 32 - Kalderash Romani Cornilescu Bible 2020 (Romania) bible

Iov 32

¹Kadala trin manuši či zumade te mai denanglal le Iovos, anda kă o patealas pe bi došako.

²Atunčeara astardi'lo xolleatar o Elixu, o šeau le Barašeelehko andoa Buz, andoa čeledo le Ramohko. O astardi'lo xolleatar poa Iov, anda kă phenelas kă sî bi došako angloa Dell.

³Thai astardi'lo xolleatar pa kola trin prinjeande lehkă, anda kă či arakhănas khanči dimosanglal thai sa došarănas le Iovos.

⁴Anda kă len sas le mai but bărši sar leste, o Elixu ajukărdea ji ande leaka kadea, kaste delduma le Iovohkă.

⁵Ta, dikhlindoi kă manas či khă dimosanglal andoa mui kadale trine manušengă, o Elixu astardi'lo xolleatar.

⁶Thai o Elixu, o šeau le Barašeelohko andoa Buz, lea o divano, thai phendea: „Me sîm tărno, thai tume san phură: anda kodea darailem, thai arakhade ma te sîkavau tumengă muŕo gîndo.

⁷Me phenauas: „Te delduma o phurimos, o baro dindimos le băršengo te sîkavel avrăn o xaraimos.”

⁸Ta, dăsar, ando manuši, o duxo, o phurdimos Kolehko Asazurallehko, del o prinjeandimos.

⁹Na le bărši anen o xaraimos, na o phurimos anel tu ande starea te krisînis.

¹⁰Dikta sostar phenau: „Ašunen ma! Phenaua i me muŕo falimos.

¹¹Ajukărdem o gor le divanurengo tumarăngo, phirdem pala tumară čeačimata, o rodimos kai kărdean les le divanurengă le Iovohkă.

¹²Dem tume soa limos godeako; thai diktakă, či iekh anda tumende či čeačeardea les, či iekh či deamuial lehkă divanuri.

¹³Ta te na phenen: „Ande leste ame arakhleam o xaraimos; dăsar o Dell dašti phandaveles, na khă manuši!”

¹⁴Mangă či deamangăduma orta: anda kodea me daualesanglal avervaresar sar tumende sa.

¹⁵On daran, či denanglal! Šindea pe lengo divano!

¹⁶Ajukărdem ji koa gor lengă divanurengă, ji kana atărdile thai či mai jeangline so te denanglal.

¹⁷Kamau te dauanglal i me koa širo muŕo, kamau te phenau i me so gîndi.

¹⁸Kă sîm pherdo divanuri, del ma zor o duxo muŕo andral;

¹⁹o andraimos muŕo sî sar khă moll kai nai la katar te anklel, sar varesar burdufurea neve, gata te phaŕadeon.

²⁰Kadeadar dauaduma, kaste phurdau ando kamimos, pîtraua mîŕă ušt thai dauanglal.

²¹Či rodaua koa sîkadimos, či čearmakhaua khanikas;

²²kă či jeanau te čeaŕmakhau: kadeadar, ande khă leaka lela ma o Vazditorii muŕo.