Read Kalderash Romani Cornilescu Bible 2020 (Romania) Iov 34 Bible Online

Iov 34 - Kalderash Romani Cornilescu Bible 2020 (Romania) bible

Iov 34

¹O Elixu lea pale o divano, thai phendea:

²„Ašunen, xarneaona, le divanuri mîŕă! Len godi mande, prinjeandeona!

³Kă o kan alosarăl le divanuri, sar zumavel o taloi le xabenata.”

⁴Te alosaras so sî čeačio, te dikhas maškar amende so sî lašo.

⁵O Iov phendea: „Sîm bidošallo Thai o Dell či kamel te del ma čeačimos;

⁶sîma čeačimos thai nakhau orta xoxamno; E dukh mîŕî sî roimasti, thai sîm bi bezexako.”

⁷Sî vo khă manuši sar o Iov, kai te pel o prasaimos sar o pai,

⁸kai te phirăl ando jeanimos kolengo kai kărăn nasul, kai te jeal vast vasteste le bikrisînença?

⁹Kă o phendea: „Či valosîl khanči le manušehkă te thol pehko čeailimos ando Dell.”

¹⁰Ta ašunen ma, manuši prinjeandimahkă! Dur le Devllestar o bičeačimos, dur le Kukolestar Asazurallestar o bikrisînimos!

¹¹O del le manušes pala lehkă kărdimata, thai potinel sakoiekhăkă pala lehkă droma.

¹²Či, biathaimahko, o Dell či kărăl o bikrisînimos; Kukoa Asazurallo či ušteavel o čeačimos.

¹³Kon thodea Les te tradel e phuw? Kon dea Les la lumea ande lesti sama?

¹⁴Te na lino godi numai Leste, te lela parpale Pehko duxo thai o phurdimos,

¹⁵sa so sî mas xasaolas Andakhdata, thai o manuši sahkă amboldel pe ande phuw.

¹⁶Te avela tu prinjeandimos, ašun e buti kadea, le godi koa mui mîŕă divanurengo!

¹⁷Ta na daštila te rail khă dušmano le čeačimahko? Thai došarăsa tu Koles čeačio, le Koles zuralles,

¹⁸kai çîpil karing le thagar: „Bivrednikurina!” thai karing le raimata: „Bikrisînimenona!”

¹⁹Kai či rodel koa mui kolengo le bară, thai či kărăl alosardimos maškar o bravalo thai o čioŕo, anda kă saoŕă sî e buti Lehkă vastendi.

²⁰Andekh leaka, on xasarăn pesti čivava. Koa maškar la reateako, khă poporo mištil pe thai xasaol. Kukoa o zurallo xasaol, bi le xamimahko le vastehko vokh manušehko.

²¹Kă o Dell dikhăl o phirimos saoŕăngo, dikhăl le pašea sakoiekhăhkă.

²²Nai či tuneriko, či ušall le mullimasti, kai te dašti garadeon kola kai kărăn o bikrisînimos.

²³O Dell nai les kamimos te dikhăl but čiro, kaste çîrdel khă manušes kai kris angla Leste.

²⁴O linčearăl kolen le barăn bi rodimahko, thai thol aver ande lengo than.

²⁵Kă O prinjeanel lengă kărdimarta: reate delemuial, sî linčearde.

²⁶Malavele sar le varesar bezexalen, angloa mui saoŕăngo.

²⁷Dindoi pe rigate Lestar, thai meklindoi sal droma Lehkă,

²⁸on kărdine te vazdel pe koa Dell o çîpimos le čioŕăhko. Ortosardine Lehkă o limos godeako koa çîpimos le bibahtalehko.

²⁹Kana del O pačea, kon daštil te biujearăla? Kana garavel o Pehko Mui, kon dašti te dikhăl Les? Sa kadea phiradeol avela khă poporosa, avela khă manušesa,

³⁰anda ta o bikrisako te na mai stăpînil thai te na mai avel khă astardimos anda o poporo.

³¹Kă phendea o vokhdata le Devllehkă: „Sîmas došaldo, či mai bezexaraua;

³²sîkau mangă so dikhau; kana kărdem bičeačimata, či mai kăraua?”

³³Ta pala tiro falimos kărăla o Dell čeačimos? Tu šudes, tu alosarăs, thai na me; Ta phen so jeanes!

³⁴Le manuši prinjeandimasa avena pala muŕo falimos, o xarano kai ašunel ma dela godi sar mande:

³⁵O Iov del duma bi prinjeandimahko, thai le divanuri lehkă naile kris.

³⁶Te avel zumado mai angle, anda kă delanglal sar kola le jungale!

³⁷Kă thol kal athadimata lehkă bezexa neve; marăl andal palme ando maškar amaro, butearăl pehkă divanuri kontra le Devllesti.”