Read Kalderash Romani Cornilescu Bible 2020 (Romania) Iov 36 Bible Online

Iov 36 - Kalderash Romani Cornilescu Bible 2020 (Romania) bible

Iov 36

¹O Elixu avilo thai phendeas:

²„Ajukăr xançî, thai avaua, kă mai sîma akana te dauduma andoa Dell.

³Laua mîŕă čeačimata dă dural, thai sîkavaua o čeačimos le Vazditorehko mîŕăhko.

⁴Av pateamno, le divanuri mîŕă nai xoxaimata, ta sî tu kărimahko khă manušesa atearimatănça uje.

⁵O Dell sî zurallo, ta či šudel khanikas; thai sî zurallo andoa zurallimos Lehkă prinjeandimahko.

⁶O či mekăl koles le jungales te trail, thai kărăl čeačimos kolehkă le bibaxtalehkă.

⁷Či amboldel Pehkă iakha pa kukola bi bezexale, thai thole po skamin le raimahko le thagarença, thole anda orkana kaste rain.

⁸Kărdeol pe te perăl andel lançurea, te aven astarde andel phanglimata le bibaxtalimahkă?

⁹Thol anglal lengă kărimata, Le bezexalimata lengă, o barimos lengo.

¹⁰Delengăduma kaste orton pe, phenelengă te ambolden pe kata o bezexalimos.

¹¹Kana ašunen thai mekăn pe, găton pehkă des ando baxtalimos, thai le bărši ando bukurimos.

¹²Te na ašunena, perăn mudarde la sabiatar, merăn ande lengo koŕîmos.

¹³Le bezexale xolleaon, či çîpin karing o Dell kana tidele;

¹⁴xasarăn pesti čivava ando tărnimos, merăn sar le bezexale.

¹⁵Ta o Dell skăpil koles le bibaxtales anda lehko bibaxtalimos, thai anda o dukhaimos delehkăduma.

¹⁶Thai i tut ankalavela tu andoa strandimos, kaste thol tu koa than o bufllo, ando skăpimos baro, thai e skafidi tiri avela pherdini xabenença lašimatăngă.

¹⁷Ta kana garaves teo došalimos sar khă bezexalo, o došimos tiro sî bipîtărdimahko andai doši tiri.

¹⁸O xollearimos te na spidel tu koa prasaimos, thai o barimos koa potin le potindimahko te na nigrăl tu ando xasarimos!

¹⁹Ta arăsăna le çîpimata tiră te ankalaven tu andoa năkazo, thai sa le zora kai dašti avena tu?

²⁰Na rov palai reat, kai lel popoare anda lengo than.

²¹Arakh tu te kărăs nasul, kă o dukhaimos nigrăl tu koa nasulimos.

²²O Dell sî baro ande Lesti zor; kon daštila te sîkavel avrăn sar Leste?

²³Kon mangăl Lehkă dindimos Lehkă dromendar, thai kon daštil te phenel Lehkă: „Kărăs nasul?”

²⁴Na bîstăr te lăudis Lehkă kărimata, save sal manuši trăbun te barearăn le!

²⁵Orsao manuši dikhăle, Sako mullimahkomanuši dikhăle dă dural.

²⁶Dikta so baro sî o Dell! Ta ame naštisaras te atearas Les, o dindimos Lehkă băršengo khonikh či ateardea le.

²⁷Kă O çîrdel Leste le piteaimata le paiehkă, paruvele ande khă aburo thai del o brîšind,

²⁸saves le norea pitean les, thai khă piteaimos poa butimos le manušengo.

²⁹Thai kon dašti atearăl o phaglimos le norohko, thai o bašimos Lehka çărako?

³⁰Dikta, O tinzol pesti lumina ande Pesti rig, thai garavel le andraimata la mareakă.

³¹Anda kadala butea, O krisînil le poparăn, thai del butimos xamahko.

³²Lel o trăsneto ando vast, thai šudel Les pal dušmaia Lehkă.

³³Del ašundimos kă sî oče andakh bšlimos, thai ji kana le kîrdurea atearăn Lehko pašimos.