Read Kalderash Romani Cornilescu Bible 2020 (Romania) Iov 41 Bible Online

Iov 41 - Kalderash Romani Cornilescu Bible 2020 (Romania) bible

Iov 41

¹Dašti tu te astarăs o Leviatano la undiçasa? Or te phandes lesti šib khă šellesa?

²Dašti nakhavesa lehkă e papura andal uri? Or te pusaves khă kîrligosa lesti falka?

³Kărăla tukă o but rudimata? Dela tukă duma khă muiesa guglo?

⁴Kărăla o khă phanglimos tusa, kaste avel tukă robo ando veako?

⁵Khălesa tukă tu lesa sar kha čirikleasa? Phsandesa les tu kaste vesălis te šeian?

⁶Kărăn le mašarea bitindimos lesa? Xulaven les on le bitinditorea?

⁷Thosa pa lesti morčii çăpuše, thai o šero sastrença?

⁸Vazde ta numai o vast pa leste, thai či mai avela tukă zumaimos te malaves les.

⁹Dikta kă san atxado ande teo ajukărimos te astarăs les: dăsar te dikhăs les, thai perăs kai phuw!

¹⁰Khonikh nai kaiti dă zurallimahko kaste xollearăles. Kon dašti te lel pe angla mande?

¹¹Kahkă sîm unjile, kaste potinau lehkă? Tala o čerii sa sî Muŕo.

¹²Kamau te mai dauduma pale le kotorăndar lehkă, thai lehkă zurallimahko, thai le mîndrimastar lehkă kărdimahko.

¹³Kon dašti vazdela lehko xuresaimos? Kon dašti šol pe tala lehkă fălči?

¹⁴Kon dašti pîtărăla le udara lehkă mohkă? Le širuri lehkă danddengă s ode sî dă daraimahkă!

¹⁵Le skuturi lehkă le barimahkă thai zurallimahkă, sî astarde andekhthan sar andekh bokolli;

¹⁶nikrăn pe iekh avrăstar, thai či o aero naštila te nakhăl anda lende.

¹⁷Sî sar varesar phral kai lenpe ande angali, astardeon, thai ašen bidinerigate.

¹⁸Le dimatačikakă lehkă kărăn te străfeal e lumina; lehkă iakha sî sar o ballaiakhako le zorengo.

¹⁹Anda lehko mui xuten pareiagăngă, anklen skîntei iagakă anda la.

²⁰Anda lehkă uri anklel tuw, sar anda khă piri kai tireol, sar a nda khă kakaii phabardi.

²¹O phurdimos lehko astarăl le angar, thai o mui lehko šudel iaga.

²²O zurallimos lehko sî snde koŕ, thai angla leste xutel o daraimos.

²³Le riga lehkă le masale nikărdeon andekhthan, sar šordine pe leste, bimištime.

²⁴Lehko illo sî zurallo sar o baŕ, zurallo sar o baŕ la moarako kai bešel talalate.

²⁵Kana uštel o, isdran le zuralimata, thai dar thole po našlimos.

²⁶Dăivea sî malado la sabiasa; kă e suliça e săjeata thai pavăza či valosîn khančehkă.

²⁷Anda leste o sastrii sî sar o sulum, e xarkuma, sar o kašt o terno.

²⁸E săjeata či tholes po našlimos, le baŕ andai praštia sî sar e poši anda leste.

²⁹Či dikhăl ande măčiuka dăsar khă thaw sullumehko, thai asal koa šudimos le săjeçăngo.

³⁰Tala lehko pîŕ sî săjeçi skuçome: phenesa kă sî khă grapa tinzome pai čikh.

³¹Kărăl te tireol o fundo la mareako sar khă kăzano, thai mištiles sar khă vaso pherdo miro.

³²Palal o mekăl khă drom străfeaime; thai o andraimos ameal sar le tičii khă phurăhkă.

³³Pe phuw khanči nai lehkă stăpîno; sî kărdo, kaste na daral khančestar.

³⁴Dikhăl bidikhlimasko ka sa so sî vazdino, sî o thagar kolengo mai šukar jiwine.”