Read Kalderash Romani Cornilescu Bible 2020 (Romania) Iov 5 Bible Online

Iov 5 - Kalderash Romani Cornilescu Bible 2020 (Romania) bible

Iov 5

¹Çîpisar akana! Kon dela tu anglal? Savehkă anadal sfinçî desas lehkă duma?

²O čealado xasaol mudardo pehka xolleatar, o dillo merăll mudardo lehkă astardimastar.

³Dikhlem khă čealades astarindoi angluminios; pala kodea andakhdata dem arman lehko bešlimos.

⁴Le šave lehkă nai le bax, sî ušteade andel pînŕă koa udar, thai khonikh či skăpile!

⁵O tidimos lehko sî xalo kolendar le bokhalendar, kai aven te len les orta i andal kanŕă, thai le mandina lehkă sî nakhade le manušendar trušale.

⁶O bibaxtalimos či lulludearăl andai phuw, thai o dukhaimos či înkolçîl andai phuw.

⁷O manuši kărdeo te dukadeol, pala sar e para kărdeol kaste xureal.

⁸Me sahkă prastau koa Dell, le Devllehkă sahkă phenau o năkazo muŕo.

⁹O kărăl butea bară thai biatearimahkă, škuarimata bi dindimahkă.

¹⁰O šorăl o brîšind pe phuw, thai tradel pai pel islazuri.

¹¹O vazdel kolen le meklinetelal, thai skăpil kolen le năkăjimenen.

¹²O xasarăl le planurea le manušengă le čioŕ, thai lengă vast naštin te pherăn le.

¹³O astarăl kolen le xaranen ande lengo čiorimos, thai le planurea le manušengă atxaitorea sî dinemuial:

¹⁴den poa tuneriko ando maškar le desăhko, bîjbîin ando des o baro sar ande reat.

¹⁵Kadeadar, o Dell arakhăl koles le šukăs pa le daraimata lengă, thai skăpiles andoa vast le zurallengo.

¹⁶Kadea o ajukărimos nikrăl koles le bibaxtales, ta e bikris phandavel pehko mui.

¹⁷Baxtalo le manušestar kai kollearăles o Dell! Na bidin o xollarimos Kolehko Sa Zurallehko.

¹⁸O kărăl o šindimos, thai sa O phandeles; O dukhavel, thai o vast Lehko sasterăl.

¹⁹Šovar ankalavela tu andoa năkazo, thai eftavar či azbala tu o nasul.

²⁰O skăpila tu kata o merimos ando čiro le bokhalimahko, thai le malaimatăndar la sabiakă ando čiro le mardimahko.

²¹Avesa koa garadimos le čiuknestar la šibakărăstar, thai avesa bi darako kana avela o pustiimos.

²²Asasa le pustiimastar sar i le bokhalimastar, thai či mai avela tukă dar le jivinendar la phuwekărăndar.

²³Kă kărăsa phanglimos ji pune i le baŕănça le kîmpohkă, thai le jivine la phuweakă avena ando împătimos tusa.

²⁴Avela tu baxtalimos ande ti çăra, arakhăsa te kîrduri întreji,

²⁵dikhăsa ti sămînça barindoi tukă, thai le gloate tiră barindoi sar e čear poa kîmpo.

²⁶Šosa tu ando thanlemerimahko ando phurimos, sar e drăz tidini ka lako čiro.

²⁷Dikta so rodem, thai kadea sî! Ašun, kă sî karing teo valoso!”