Read Kalderash Romani Cornilescu Bible 2020 (Romania) Iov 6 Bible Online

Iov 6 - Kalderash Romani Cornilescu Bible 2020 (Romania) bible

Iov 6

¹O Iov lea o divano thai phendea:

²Uf! te avilino daštimasa te thol pe ando toll mîŕî dukh, thai te thon pe mangă sal bibaxtalimata ando toll,

³sahkă aven mai phară sar e tišai la mareati: anda kodea jean mangă le divanuri ji koa čeladimos!

⁴Kă le săjeçi Kolehkă Aseazuralehkă pusade ma, o dii muŕo pel lendi otrava, thai dar le Raiesti šol šudrimata ande mande!

⁵Zberîl o čiuši o văšuno kana sî les zălenimos? Çîpil o guruw kana sî les xamahko?

⁶Dašti te xas so sî bi gustohko thai bi lonehko? Sî les vokh gusto le parnimos le anŕăhko?

⁷Or savi buti saveatar či kamaua te azbau ma, kodoa sî muŕo xabe, or sode avela dă sîloso o!

⁸O, te ašundeola pe muŕo kamimos, thai te pherăla o Dell muŕo ajukărimos!

⁹Te kamela o Dell te linčearăl ma, te tinzol Pehko vast thai te mudarăll ma!

¹⁰Ašela ma barim kadoa lašimos, kadoa bukurimos andel dukha savença delma: kă či ăkhdata či ušteadem le mothodimata Kolehkă le Sfîntohkă.

¹¹Ka soste te mai ajukrau kana či mai naštisarau? Ka soste te mai ajukărau, kana jeangleol pe o gor?

¹²E zor mîŕî sî khă zurallimos baŕăhko? O stato muŕo sî xarkumako?

¹³Či sîm me bi kandimastar, thai či našlo o skăpimos mandar?

¹⁴Kukoa kai dukhaol sî les čeačio kai milla le amalesti, orta kana e dar mekăles Kolestar Asa zurallestar.

¹⁵Mîŕă phral sîkadi'le athadimahkă sar khă paioŕo, sar e albia le paiendi kai nakhăn.

¹⁶Khă kotorpaohko biujară lengo thawdimos, o iw gomilil pe pa lende;

¹⁷avel o phabarimos le millahko thai šuteol, avel o tatimos le khamehko, thai šuteon lendi albia.

¹⁸Kîrduri phirimatorengă den pe rigate anda lengo drom, thai xasaon ande pustia thai merăn.

¹⁹Le kîrduri kolengă andai Tema dikhăn orta pe lende, le phiritorea andai Seba sî pherde ajukărimos kana dikhăn le.

²⁰Ta ašen athade ande ajukărimos Lengo, thai ašen mirime kana arăsăn lende.

²¹Kadea san i tume akana anda mande. Tume dikhăn muzŕo năkazo, thai daraon!

²²Phendem tumengă me kadea: „Den ma vareso, potinen andal mandina tumară anda mande,

²³skăpin ma andoa vast le dušmanohko, potinen ma andoa vast le jungalengo?”

²⁴Sîkavena ma, thai ašeauamuto; kărăn ma te atearau ande soste bezexardem.

²⁵O sode dă bimeklimahkă sî le divanuri le čeačimahkă! Ta so čeačearăn le xamata tumară?

²⁶Kamen te den mangă duma anda sa so phendem, thai te na dikhăn dă sar bravall andel divanuri khă biajukărdimatorehkă?

²⁷Tume či kărăn čeačimos le bidaddehkărăs, Našaven tumară amales.

²⁸Dikhănta amande, rudi tume! Ta či xoxavaua tume anglal!

²⁹Ambolde tume, na aven bičeače; ambolde tume thai phenen kă sîm bidošallo!

³⁰Sî vokh bikris pe šib Mîŕî, thai či lel sama muŕo mui so sî nasul?