Read Kalderash Romani Cornilescu Bible 2020 (Romania) Iov 7 Bible Online

Iov 7 - Kalderash Romani Cornilescu Bible 2020 (Romania) bible

Iov 7

¹E bax le manušesti pe phuw sî sar kha kătanati, thai le des lehkă sî sar khă butearăsti koa des.

²Sar rovel o robo palai ušal, sar ajukrăl o buteari pehko potindimos,

³kadea sî ma i man rig šonendar dukhaimahkă, thai rig mîŕî sî reatea dukhadimahkă.

⁴Sovau, thai phenau: „Kana ušteaua? Kana avela o gor la reateako?” Thai čeailiuau kovleardimatăndar ji kana phaŕadeol o des.

⁵O stato pherdeol mangă terme thai kha koajasa phuwikani, e morči phaŕol mangă thai pîtărdeol.

⁶Ledes mîŕă xurean mai iekhatar sar e suveika le astarimtoresti, jeantar thai manai ma či khă ajukărimos!

⁷An Tukă godi, Devlla, kă e čivava mîŕî sî dăsar khă phurdimos! Le iakha mîŕă či mai dikhăna o baxtalimos.

⁸E iakh, kai dikhăl ma, či mai dikhăla ma; ti iakh rodela ma, thai či mai avaua.

⁹Sar phaŕadeol o noro thai nakhăl, kadea či mai uštela kukoa kai del pe tele ando Than le mullengo!

¹⁰Či mai amboldela pe ande pehko khăr, či mai prinjeanela o than ande sao bešelas.

¹¹Anda kodea nikraua muŕo mui, thai daua duma ando biujimos mîŕă illehko, rovaua ando kărtimos mîŕă duxohko.

¹²Ta khă marea sîm me, or khă xala mareati, ta thodean straja angla mande?

¹³Kana phenau: „O pato lesnila ma, o than potolila le dukha,”

¹⁴atunči daraves ma andel sune, daraves ma andal vedenii.

¹⁵Au! Sahkă kamau mai mišto tidimoskoŕatar, mai mišto o mullimos dă sar kadala kokala!

¹⁶Či dabadikhau le! … či traiua andel veakuri… Mekh ma, kă dăsar khă phurdimos sî mîŕî čivava!

¹⁷So sî o manuši, kaste fal Tu kaditi dă but lestar, kaste les sama lestar,

¹⁸te rodes les ande sako droboimata, thai te zumaves les ande sako le leakuri?

¹⁹Kana atărdeosa ăkdata te dikhăs ma? kana desa mekăsa ma te nakhavau muŕo čiungar?

²⁰Kana bezexardem, so dašti te kărau Tukă, Arakhaitorii le manušengo? Anda soste thodean ma çînta le săjeçăngă Tirăngă, ta arăslem khă pharimos anda mande orta?

²¹Anda soste či iertis muŕo bezex, Thai anda soste či bîstrăs mîŕî bikris? Kă sovaua ande phuw, thai kana rodesa ma, či mai avaua!”