Read Kalderash Romani Cornilescu Bible 2020 (Romania) Iov 8 Bible Online

Iov 8 - Kalderash Romani Cornilescu Bible 2020 (Romania) bible

Iov 8

¹O Bildad andoa Šuax lea o divano thai phendea:

²„Ji kana kames te desduma kadea, thai ji kana avena le divanuri te mohkă sar khă bravall zurali?

³Ta delamuial o Dell o čeačio? Or delamuial Kukoa Aseazurallo o čeačimos?

⁴Kana te šave bezexarde pa Leste, dea le po vast la bezexako.

⁵Ta tu, kana prastes koa Dell, kana rudis Koles Asa zuralles,

⁶kana tu san ujo thai bibezexako, atunčeara biathadimahko, O dikhăla pa tute, thai dela tu parpale o baxtalimos le bešlimahko tiro bidošalo.

⁷O purano tiro vazdimos avela çîkno angla kukoa dă mai palal.

⁸Pušta kolen andal Viçe kai nakhle, thai le godi koa nakhlimos lengă daddengo.

⁹Kă ame sam dă arateara, thai či jeanas khanči, amară des pe phuw nai dă sar khă ušal.

¹⁰On sîkavena tu, deana tukă duma, thai ankalavena anda lengo illo kadala divanuri:

¹¹Bareol e papura bi baltako? Bareol e trăstia bi tindimahko?

¹²Avindoi înkă zăleno thai bi te šindeol, oi šuteol mai iekhatar dă sar sal čearea.

¹³Kadea kărdeol pe sa kolengă kai bîstrăn le Devlles, thai o ajukărdimos kolehko bikrisako xasaola.

¹⁴O pateamos lehko sî linčeardo, thai o nikărimos lehko sî khă poxtan talanohko.

¹⁵Nikrăl pe po khăr lehko, ta nai zurallo; astardeol lestar; ta či nikră les.

¹⁶Sar del o kham, zălenil, tinzol pehkă ŕaia pai baŕ pesti,

¹⁷akhuwel pehkă anglunimata maškar le baŕ, arăsăl ji kal zîduri.

¹⁸Ta te çîrdesa les anda lehko than kai bešel, o than kadoa šudel pe lestar, thai phenel: „Či jeanau te prinjeandino tu vokhdata!”

¹⁹Dikta, kadea sî le čeailimata kai anel lehkă le droma lehka čivavakă; pala kodea sa anda kodea phuw lulludearăn aver pala leste.

²⁰Či, o Dell či šudel pe le manušestar bi bezexako, thai či arakhăl kolen le jungalen.

²¹Ta înkă, O perăl teo mui çîpimatănça bukurimahkărănça, thai le ušt dilabaimatănça vesălimahkărănça.

²²Le dušmaia tiră avena pherdine lajavestar, ta e çăra kolendi le jungalendi xasaola.”